„გურია ნიუსის“ ინფორმაციით, გურიის გუბერნატორი გია სალუქვაძე პრესსამსახურების მუშაობით უკმაყოფილოა.
როგორც გვითხრეს, მხარის პირველ პირს არც მისი პრესსამსახურის ხელმძღვანელის ნინო ლომჯარიას მუშაობა მოსწონს, არც ჩოხატაურისა და ლანჩხუთის გამგეობების პრესსამსახურების.
უფრო მეტიც, ჩვენი ინფორმაციით, სალუქვაძემ ჩოხატაურისა, ლანჩხუთის და ოზურგეთის მუნიციპალიტეტის გამგებლებს მოქმედი პრესსამსახურების თანამშრომლების გაშვება და სამსახურის გადახალისება სთხოვა.
ის რომ გუბერნატორს მის მუშაობასთან დაკავშირებით შენიშვნები ჰქონდა, ჩვენთან საუბრისას დაადასტურა გურიის გუბერნიის პრესსამსახურის ხელმძღვანელმა ნინო ლომჯარიამ:
_ გუბერნატორს ჰქონდა შენიშვნები, რომელიც ვფიქრობ, რომ მართებული იყო. ვისაუბრეთ ამაზე და ამჟამად ჩვეულ რეჟიმში ვმუშაობ, _ აღნიშნა ლომჯარიამ.
ლანჩხუთის მუნიციპალიტეტის გამგეობის პრესსამსახურის ხელმძღვანელმა მაკა სულაბერიძემ კომენტარი ოჯახური მდგომარეობის გამო არ გააკეთა.
აღნიშნული სამსახურის მთავარმა სპეციალისტმა ნინო მშვიდობაძემ კი აღნიშნა, რომ ინფორმაციას არ ფლობს:
_ ჩვენ მუდმივი კავშირი გვაქვს გუბერნატორის პრესსამსახურთან. სოციალური ქსელის ოფიციალურ გვერდზე გურიის მხარე რეგულარულად აშუქებს კონკრეტულად ლანჩხუთის აქტივობებს და ინფრასტრუქტურულ სამუშაოებზეც, ჩვენ, ხშირად ერთად გავდივართ.
ჩვენი მუნიციპალიტეტის გამგებელი ჩვენ ყოველდღიურ მუშაობას სოციალური ქსელის მეშვეობით ხედავს; ჩვენ გვიწევს ელექტრონულ დავალებებზეც პასუხების მომზადება და გაცემა და შემდეგ ამის ასახვა ისევ და ისევ ოფიციალურ გვერდებზე. ეს ინფორმაცია მართლა პირველად მესმის და არა მგონია, ან ბატონი გია იყოს ჩვენი მუშაობით უკმაყოფილო, ან ბატონი ზაზა, _ აღნიშნა „გურია ნიუსთან“ საუბრისას მშვიდობაძემ.
ჩოხატაურის მუნიციპალიტეტის პრესსამსახურის ხელმძღვანელი თეა ბაიაჯანი ამბობს, რომ მსგავსი ინფორმაცია გამგებელს მისთვის არ მოუწოდებია.
თემაზე კომენტარი არ გააკეთა ოზურგეთის მუნიციპალიტეტის გამგეობის პრესსამსახურის ხელმძღვანელმა ეკა მგელაძემ.
ინფორმაციას იმის შესახებ, რომ რომ გუბერნატორმა პრესსამსახურების მუშაობა დაუწუნა, უარყოფენ გამგებლები. ჩოხატაურის მუნიციპალიტეტის გამგებელი ირაკლი კუჭავა ამბობს, რომ ეს ინფორმაცია „ჭორი და ტყუილია“.
ლანჩხუთის მუნიციპალიტეტის გამგებელი ზაზა ურუშაძე ამბობს, რომ გუბერნატორთან ბოლო თათბირზე არ ყოფილა და არც მსგავსი მითითება მოუსმენია. თუმცა, ლანჩხუთის პირველი პირი მიიჩნევს, რომ მისი პრესსამსახური უფრო აქტიურად უნდა მუშაობდეს.
ოზურგეთის მუნიციპალიტეტის გამგებლის მერაბ ჭანუყვაძის თქმით, გუბერნატორს მისთვის მსგავსი რამ არ უთქვამს.
გამგებლებისგან განსხვავებით, ჩვენ მიერ მოპოვებულ ინფორმაციას ადასტურებს გურიის გუბერნატორი გია სალუქვაძე, რომელიც მიიჩნევს, რომ პრესსამსახურის თანამშრომლები საქმეს შემოქმედებითად უნდა მიუდგნენ:
_ ბატონო გია, როგორც გვითხრეს, ნინო ლომჯარიას მუშაობით უკმაყოფილო ხართ…
_ ეს უფრო სამსახურებრივი, შიდა უწყებრივი საკითხია. ჩვენი ხედვები, ერთ ეტაპზე არ იყო თანხვედრაში. საუბარი იყო იმ აქტივობის გაშუქებაზე, რომელსაც ჩვენ ვახორციელებთ. ვისაუბრე ამაზე ნინოსთან დ მან თავიდან ბოლომდე გაითავისა. ჩემი მოთხოვნა ის არის, რომ არ შემოვიფარგლოთ მხოლოდ გუბერნატორის აქტივობით და ვაჩვენოთ საზოგადოებას ლანჩხუთი, ჩოხატაური, თითონ ოზურგეთის სათემო ქალაქი.
_ გვითხრეს, რომ ლომჯარიას სამსახურიდან გათავისუფლებას აპირებდით. გადაიფიქრეთ?
_ არსად არ ვუშვებ. მომწონს მისი ბოლო პერიოდში გაწეული მუშაობდა და თუ ასე გააგრძელა, კმაყოფილი ვიქნები.
_ ჩოხატაურზე, ლანჩხუთზე და ოზურგეთის მუნიციპალიტეტზე რას გვეტყვით? ჩვენი ინფორმაციით, გამგებლებს პრესსამსახურის თანამშრომლების გათავისუფლების მითითება მიეცით…
_ ეს აბსოლუტურად არასწორი ინფორმაციაა, ვინაიდან ასეთ მითითებას გუბერნატორი ვერ მისცემს. ზოგადად, როცა იყო საუბარი გაშუქებასთან, აქტივობასთან დაკავშირებით, ჩემი მოსაზრება გავუზიარე ჩემს პრესამსახურთან დაკავშირებით ჩემს მეგობრებს _ გამგებლებს და მათაც გაიზიარეს.
დამეთანხმნენ, რომ გადასახედია მათი მუშაობა. თითონვე ჩათვალეს საჭიროდ, რომ ამ სამსახურის თანამშრომლებს მისცემდნენ კონკრეტულ მითითებას, როგორი ხედვა არის უკეთესი. სხვათაშორის, მე თქვენს ხედვებსაც ვიზიარებ, თქვენ გაშუქებულ მასალებსაც, რომელიც სიღრმისეულია და მინდა, რომ ჩემებმაც ასე გააკეთონ.
არ შეიძლება პრესამსახური მხოლოდ იმ აქტივობებით იყოს შემოფარგლული, რომელსაც რაღაც ინფრასტრუქტურული პროექტები ჰქვია. კარგია იგივე ბახმაროს თემა, გომის მთის თემა. ანუ, უფრო სიღრმისეული კვლევაა საჭირო. ასევე, საჭიროა საერთაშორისო ორგანიზაციებთან ურთიერთობა.
_ პრესსამსახურის თანამშრომლებს სტატიების წერას სთხოვთ?
_ არა. მე ვითხოვ, რომ არა მარტო აქტივობები გააშუქონ, არამედ ნახონ რა ხდება საქართველოს სინამდვილეში. შემდეგ კი, გუბერნიის იმ სამსახურების ანალიზის საფუძველზე, რომლებიც ამ საკითხზე მუშაობენ, მისეული ხედვა წარმოუდგინონ. უფრო შემოქმედებითად უნდა მიუდგნენ, თორემ სტატიების წერა არ არის მათი საქმე. მარტო ფოტო და ვიდეო გადაღებებით არ უნდა შემოიფარგლონ.
გურიის გუბერნატორი დასძენს, რომ მისი პრესსამსახური აქტიურად აწოდებს მედიაში გაშუქებულ თემებს და რეაგირებაც ხდება:
_ პრესაში გამოქვეყნებული ყველა მასალა ჩემი დღის ბოლოს ჩემთან იყრის თავს. მერე ვაგზავნით იმ მუნიციპალიტეტში, რომელსაც ეხება. ამაზე სპეციალური ჯგუფი მუშაობს და მუდმივ მორიტორინგს აწარმოებს. ჩვენ რეკომენდაციებს ვაძლევთ მუნიციპალიტეტს და ვითხოვთ რეაგირებას.
მინდა მედიას, თქვენ მადლობა გადაგიხადოთ, რადგან ბევრი საკითხი რომელიც გაშუქდა, უკვე მოგვარდა. „გურია ნიუსის“ ბევრ მასალაზე მოხდა რეაგირება და ამაზეც მივაწვდით მალე საზოგადოებას ინფორმაციას, _ გვითხრა სალუქვაძემ.
