დღეს დიდი ქართველი პოეტის გალაკტიონ ტაბიძის დაბადების დღეა. პოეტის დაბადებიდან 124-ე წლის აღსანიშნავად პოეტის მემორიალურ ბინა-მუზეუმში მისი შემოქმედებითი საღამო გაიმართა.
საღამოზე მსახიობმა მურმან ჯინორიამ გალაკტიონის ლექსების მიხედვით დადგმული მონო – სპექტაკლი "ქარი მწყურია მე პირდაპირი" წარმოადგინა.
გალაკტიონის ბინა-მუზეუმი რამდენიმე დღის წინ განახლდა. დამონტაჟდა სპეციალური ტექნიკა, რომლის საშუალებითაც დამთვალიერებელს საშუალება ექნება, უწყვეტ რეჟიმში, მოისმინოს გალაკტიონის მიერ წაკითხული ლექსების ჩანაწერები, დაათვალიეროს მისი ფოტოსურათები და ვიდეო მასალა. თბილისის მერიის კულტურის საქალაქო სამსახურის მხარდაჭერით, მუზეუმის კომერციალიზაციისა და პოპულარიზაციის მიზნით, დამზადდა გალაკტიონის ფოტოებითა და ხელნაწერებით გაფორმებული ბლოკნოტები, მაისურები, ჩანთები და მაგნიტები.
მუზეუმის პოპულარიზაციის პროექტის ფარგლებში დაიბეჭდა წიგნი "მე ვკითხულობ გალაკტიონს", სადაც აღბეჭდილია რიგითი მოქალაქეების მიერ გალაკტიონის ლექსების კითხვის პროცესი. წიგნის პრეზენტაცია გალაკტიონის დაბადების დღეზე გაიმართა.
