ლანჩხუთში "ქართული ოცნების" პარტიულმა კონფერენციამ 40 წუთს გასტანა, რომელსაც ვიცე-პრემიერი კახი კალაძე, პარტიის აღმასრულებელი მდივანი ირაკლი კობახიძე, ჩოხატაურისა და ლანჩხუთის მაჟორიტარი დეპუტატები – თემურ ჭკუასელი და თემურ ჩხაიძე ესწრებოდნენ. კონფერენცია ჟურნალისტებისთვის დახურულ კარს მიღმა წარიმართა. ადგილობრივი ხელმძღვანელი პირების გარდა შეხვედრაზე იმყოფებოდნენ გურიის გუბერნატორი გია სალუქვაძე და მისი მოადგილე სოსო ერქომაიშვილი. სწორედ ერქომაიშვილის დირექტივით დაგვატოვებინეს კონფერენციის დაწყებიდან ხუთიოდ წუთში დარბაზი.
შეხვედრაზე გამგეობის, საკრებულოს, სხვადასხვა ა(ა)იპ-ის თანამშრომლებისა და ადმინისტრაციული ერთეულებში გამგებლის წარმომადგენლების სრული მობილიზება შეიმჩნეოდა. ცნობისთვის, კონფერენციას ის საჯარო მოხელეებიც ესწრებოდნენ, რომელთაც შეხვედრის დაწყებამდე ჩვენთან საუბრისას განაცხადეს, რომ აქ მოსვლას არ გეგმავდნენ.
კონფერენციას გამგეობის პრესასთან და საზოგადოებასთან ურთიერთობის განყოფილება სრული შემადგენლობით ესწრებოდა და ფოტოგადაღებასაც აწარმოებდა. თუმცა, ჩვენთან საუბარში განყოფილების სპეციალისტმა ქრისტინე ზენაიშვილმა განაცხადა, რომ აღნიშნული ფოტოკამერა გამგეობის საკუთრება არ იყო და შესაბამისად, პარტიულ კონფერენციაზე ადმინისტრაციული რესურსი არ იყო გამოყენებული.
პასუხი კითხვაზე – რომელი კანონის საფუძველზე იმყოფებიან საჯარო სამსახურში დასაქმებული პირები პარტიულ შეხვედრაზე, ყოველი მათგანისგან ერთი იყო, რომ განცხადება აქვთ დაწერილი და სამსახურიდან დროებით გათავისუფლებულები არიან.
რაც შეეხება უშუალოდ კონფერენციას, "ქართული ოცნების" ლანჩხუთის საოლქო ორგანიზაციის ბიუროს წევრის ია ჩხაიძის თქმით, დაანონსებული აღმასრულებელი მდივნის არჩევა რამდენიმე დღით გადაიდო.
"კონფერენციამ პარტიის თავმჯდომარედ ისევ გოგი ხელაძე დატოვა, სამაგიეროდ განახლდა ბიუროს შემადგენლობა. მასში ახალ წევრებად მოგვევლინენ ბესიკ ტაბიძე, დავით წულაძე, სოფიო ჩხაიძე, კახა ურუშაძე, ძველი შემადგენლობიდან კი მხოლოდ მე დავრჩი.
რაც შეეხება პარტიის ყრილობაზე წარსადგენ დელეგატებს, იგი შვიდი წევრით განისაზღვრა- ლადო ნანაძე, ზაზა ურუშაძე, გოგი ხელაძე, ალეკო სარიშვილი, თემურ ჩხაიძე, ბესიკ კუპრაძე და სოფიო ორაგველიძე."-განაცხადა ია ჩხაიძემ "გურია ნიუსთან."
