ფინანსთა მინისტრმა ნოდარ ხადურმა პრემიერ-მინისტრის ირაკლი ღარიბაშვილის თხოვნით სხვადასხვა უწყებაში შრომის ანაზღაურების კუთხით არსებულ ვითარებაზე მთავრობის დღევანდელ სხდომაზე ისაუბრა.
ფინანსთა მინისტრის განმარტებით, პრემიების საკითხი მოწესრიგებულია მთავრობის დადგენილებით და მისი გაცემა შეზღუდულია, როგორც მოცულობაში, ისე რაოდენობრივად.
„რაც შეეხება შრომის ანაზღაურების ფონდს, ის მართლაც გაზრდილია, მაგრამ მინდა კიდევ ერთხელ განვმარტო რა არის ზრდის ძირითადი წყაროები. უპირველეს ყოვლისა, უნდა აღინიშნოს, რომ 2012 წელთან შედარებით, 113 მილიონი ლარით გაიზარდა ჯარისკაცების ხელფასები და აქ საუბარი არ არის მაღალი თანამდებობის პირებზე.
ასევე, 106 მილიონი ლარითაა გაზრდილი რიგითი პოლიციელების ხელფასები, რომლებიც იცავენ საზოგადოებრივ წესრიგს. სახელმწიფო ბიუჯეტში 44 მილიონი ლარია გათვალისწინებული სახანძრო-სამაშველო სამსახურების ხელფასებზე, რასაც 31 დეკემბრამდე ადგილობრივი მუნიციპალიტეტები იხდიან, 1-ელი იანვრიდან კი გადაიხდის შინაგან საქმეთა სამინისტრო", – განაცხადა ფინანსთა მინისტრმა.
მან ასევე ისაუბრა ცალკეული უწყებების შესახებ და განმარტა ის მიზეზები, რამაც რიგი სამინისტროს შემთხვევაში შრომის ანაზღაურების ზრდა გამოიწვია.
„10 მილიონი ლარით გაზრდილია გამომძიებლების ხელფასები; სასამართლოებში 21 მილიონი ლარით გაზრდილია როგორც მოსამართლეების, ისე სასამართლოს აპარატის თანამშრომლების ხელფასები; გარემოს დაცვის სამინისტროში, აღდგა ადრე გაუქმებული სამსახურები, რომლებიც იცავენ ბუნებას, ესენია – გარემოს ზედამხედველობის სამსახური, სამინისტროს დაუბრუნდა სატყეო სააგენტო, მხოლოდ აქ არის ზრდა, ხელფასების მატებას ადგილი არ ჰქონია;
სოფლის მეურნეობის სამინისტრომ ევროკავშირთან აღებული ვალდებულების შესაბამისად, უნდა განახორციელოს სურსათის უვნებლობის ხარისხის კონტროლი, ეს სამსახურები ასევე გაუქმებული იყო და მათ აღდგენას მოჰყვა არითმეტიკული მატება; კულტურის სამინისტროს ცენტრალურ აპარატში ხელფასები შემცირებულია, 14 ათასი ლარით. სამინისტროს სისტემაში არის 80-მდე სსიპ, რომლებიც ფინანსდებოდა სუბსიდიების მუხლიდან, რაც გასწორდა და ხელფასს დაერქვა ხელფასი, თანხა კი იგივე დარჩა“, – განაცხადა ნოდარ ხადურმა.
მინისტრის ინფორმაციით, ფინანსთა სამინისტროს ხელფასები შემცირებულია 2 მლნ ლარით; ეკონომიკის სამინისტრომ რამდენიმე მნიშვნელოვანი პროექტი დაიწყო, შეიქმნა ინოვაციების და მეწარმეობის სააგენტოები და ზრდა არის ამ მიმართულებით; განათლების სამინისტროში ზრდა გამოწვეულია სსიპ-ებით.
მინისტრმა ასევე ხაზგასმით აღნიშნა, რომ მასწავლებლების ხელფასი წელს ჯამში 25 მილიონით გაიზარდა, ხოლო მომავალ წელს ზრდა დაახლოებით 45 მილიონი ლარი იქნება;
„შრომის ანაზღაურება გაზრდილი აქვს საქართველოს პარლამენტს, მაგრამ ეს გამოწვეულია იმ ფაქტით, რომ დეპუტატებს უწევთ ბინების დაქირავება ქუთაისში, კანონის შესაბამისად კი ეს უნდა უზრუნველყოს სახელმწიფომ;
სასჯელაღსრულების სამინისტროს ხელფასები გაზრდილია 2012 წლის სექტემბერში და თუ 2012 წელს ეს შეეხო 3-4 თვეს, წელს ეხება ყველა თვეს;
აუდიტის სამსახურში 2012 წელს შრომის ანაზღაურება შეადგენდა 5,1 მლნ ლარს, მომავალ წელს იქნება 11,8 მილიონი ლარი; ადგილობრივ თვითმმართველობებში ჯამში დაახლოებით 50 მლნ ლარით არის გაზრდილი შრომის ანაზღაურება, მაგრამ ეს არის საქართველოს ყოფილი პრეზიდენტის 2012 წლის ნოემბრის განკარგულება, რომლის თანახმად, მნიშვნელოვნად გაიზარდა ზედა ზღვარი“, – განმარტა ფინანსთა მინისტრმა.
