მამუკა იოსავა საქართველოს ეროვნული გვარდიის დეპარტამენტის უფროსი ერთ-ერთი მათგანია იმ ჩამოთვლილთაგან, ვისაც ირაკლი ალასანია შეიარაღებული ფორმირებების შექმნასა და დაფინანსებაში ადანაშაულებს.
“ახალაიებმა კონკრეტული დავალებები მისცეს რომან შამათავას, ნუგზარ ფანგანს, სერგო უბილავას, ფრიდონ შენგელიას, თორნიკე მალაზონიას, კობა თოდუას, მამუკა იოსავას, ზაზა ჯანჯღავას, ზვიად გაგუას და დავით დარსმელიძეს. ეს ის პიროვნებები არიან, რომლებიც წარმოადგენენ სხვადასხვა სამართალდამცავ სტრუქტურებს და ისინი აკონტროლებენ, აირაღებენ და აფინანსებენ ამ შეიარაღებულ ფორმირებებს.”, _ განაცხადა ბრიფინგზე “თავისუფალი დემოკრატების” ლიდერმა ირაკლი ალასანიამ.
როგორც “გურია ნიუსმა” გაარკვია, ეს სწორედ ის მამუკა იოსავაა, რომლის გამოც თავდაცვის სამინისტროს ერთხელ უკვე მოუწია ბოდიშის მოხდა ჟურნალისტისთვის მასალების განადგურების გამო.
ეს ამბავი 2011 წლის 26 დეკემბერს ზუგდიდის თეატრის წინ მოხდა.
ლივეპრესს.გე-ს კორესპონდენტს თამუნა ზანთარიას მამუკა იოსავამ, რომელიც მას როგორც თავდაცვის სამინისტროს თანამშრომელი, ისე გაეცნო, ის ვიდეოკადრები წაუშალა, რომელიც ჟურნალისტმა ზუგდიდის თეატრის წინ გადაიღო.
მაშინ, ზუგდიდის თეატრში თავდაცვის სამინისტროს შეხვედრა ჰქონდა მოსახლეობასთან, სადაც მათ ნებაყოფლობითი სამხედრო-სარეზერვო სამსახურის გავლას თავაზობდნენ, კერძოდ, 5-დღიან გადამზადებას სენაკის ბაზაზე.
თამუნა ზანთარიას თქმით თქმით, შეხვედრა დახურული იყო და ამის გამო თეატრიდან გამოსული ხალხისგან ინტერვიუებს თეატრის წინ, ქუჩაში, იწერდა. იმ ადგილიდანვე იღებდა ვიდეოკამერით კადრებს, თუ როგორ გამოდიოდნენ თეატრიდან შეხვედრის მონაწილენი.
ამ დროს, მასთან მივიდა რამდენიმე სამხედრო პირი და განუცხადეს, რომ გადაღება არ შეიძლებოდა. მას შემდეგ, რაც ჟურნალისტმა აუხსნა, რომ საჯარო ადგილას იღებდა და ამის უფლება ჰქონდა, წავიდნენ.
მისივე თქმით, როდესაც მან გადაღება დაასრულა და რედაქციისკენ წავიდა, გზაში მანქანა წამოეწია, გაჩერდა, საიდანაც რამდენიმე სამხედრო პირი გადმოვიდა:
“ერთ-ერთმა მათგანმა მითხრა, რომ ის იყო მამუკა იოსავა, თავდაცვის უწყების წარმომადგენელი და მითხრა, ყველაფერი უნდა წაშალო, რაც გადაიღეო. მე ვუთხარი, რა არის აქ წასაშლელი, გარეთ, ქუჩაში, საჯარო სივრცეშია გადაღებული ეს კადრები-მეთქი. არ შეიძლებაო. თუ არ მოგვცემთ ამის უფლებას, კამერას წავიღებთო, თქვენც წამოხვალთ ჩვენთან ერთად და მაინც წავშლითო და წაშალეს კამერიდან ყველა კადრი,” _ აცხადებდა “ნეტგაზეთთან” ინტერვიუში ჟურნალისტი.
მაშინ, თავდაცვის სამინისტროს პრესსამსახურის უფროსმა სალომე მახარაძემ “ნეტგაზეთთან” საუბრისას დაადასტურა, რომ მამუკა იოსავა ნამდვილად მუშაობდა მათ უწყებაში, კერძოდ კი, გვარდიაში. მისივე თქმით, ზუგდიდში შეხვედრა მოსახლეობასთან ნებაყოფლობითი რეზერვის თაობაზე გაიმართა.
“როგორც იქ მყოფმა სამხედროებმა მითხრეს, მათ თხოვნით მიმართეს ჟურნალისტებს. რა თქმა უნდა, არავითარი უფლება არ ჰქონდათ არც ამის, რომ მასალა წაეშალათ. ჩვენდა სამწუხაროდ, ამ შემთხვევაში, ამ ადამიანმა პრესასთან ურთიერთობის წესები ან კარგად ვერ გაიხსენა, ან… მამუკა იოსავამ ჩემგან საყვედური მიიღო ამის გამო და ამას რა გაგრძელება მოყვება, არ ვიცი. მე ბოდიშს ვიხდი იმისთვის, რომ მასალა განადგურდა სამხედროს ინიციატივით. მან როგორც მითხრა, უბრალოდ ვთხოვეო, არ მინდა კადრში გამოჩენაო და წაშალეს ჩვეულებრივად ეს კადრები ისე, რომ ზედმეტ შელაპარაკებასაც არ ჰქონია ადგილიო. ნებისმიერ შემთხვევაში მე თავდაცვის სამინისტროს სახელით მაინც ბოდიშს ვიხდი”, – განუცხადა “ნეტგაზეთს” სალომე მახარაძემ.
შეგახსენებთ, რომ ბიოგრაფიული მონაცემების მიხედვით, მამუკა იოსავა საქართველოს უშიშროების აკადემიის კურსდამთავრებულია.
სამხედრო სავალდებულო სამსახური 1984-1986 გაიარა. 1994-2005წლებში ის მუშაობდა საქართველოს უშიშროების სამინისტროში. 2005-2009 წლებში კი საქართველოს შინაგან საქმეთა სამინისტროში.
მისი კარიერა თავდაცვის სამინისტროში 2009 წელს დაიწყო.
2009-2010 მამუკა იოსავა იყო სამხედრო დაზვერვის დეპარტამენტის უფროსის მოადგილე. მოგვიანებით ის დააწინაურეს და 2010-2011 წლებში სამხედრო დაზვერვის დეპარტამენტის უფროსად დაინიშნა. 2011 წელს, სამხედრო თავდაცვის სამინისტროშივე გადაიყვანეს პოლიციის დეპარტამენტის უფროსის მოადგილედ. 2011 წელს ეროვნული გვარდიის დეპარტამენტის უფროსის პირველ მოადგილედ დაინიშნა საქართველოს შეიარაღებული ძალების გაერთიანებულ შტაბში.
დღეის მდგომარეობით კი ის ამავე შტაბის უფროსი გახლავთ.
პოლკოვნიკი მამუკა იოსავა არაერთი ჯილდოს მფლობელია. 2005 წელს ის ღირსების მედლით დააჯილდოვეს, 2006 წელს კი მხედრული მამაცობისთვის. 2010 წელს მას სამი მედალი აქვს მიღებული: უწყებრივი მედალი “ქაქუცა ჩოლოყაშვილი“; “ღირსების ორდენი” და მედალი “სამშობლოსათვის თავდადებული”.
ასე რომ, ხუთგზის მედალოსანი პოლკოვნიკის სახელმა უკვე მეორედ გაიჟღერა სკანდალურ ინფორმაციებში.
“გურია ნიუსთან” საუბრისას, რომელიც სწორედ მეორე სკანდალს ეხებოდა, სალომე მახარაძემ ასეთი კომენტარი გააკეთა.
_ ირაკლი ალასანიამ დღევანდელ ბრიფინგზე განაცხადა, რომ იქმნება გაურკვეველი ტიპის შეიარაღებული ფორმირებები, რა კომენტარს გააკეთებდით ამაზე?
_ მე არ მაინტერესებს რა თქვა. ის, რაც ზუსტად ვიცი და ვხედავ, ის არის, რომ გეგმის მიხედვით კეთდება რეზერვი. ალასანიას აბსურდის დეტალები არ მაინტერესებს.
_ ალასანიას მიერ სხვა ჩამოთვლილ პირთა შორის, რომელთაც თითქოსდა კავშირი აქვთ შეიარაღებულ ფორმირებებთან, ნახსენები იყო ეროვნული გვარდიის დეპარტამენტის უფროსი, მამუკა იოსავაც.
_ არავითარ ფორმირებებთან არ არის კავშირში მამუკა იოსავა. არავითარი კავშირი არა აქვს მსგავს ფორმირებებთან. ის მუშაობს და თავის სამსახურს ასრულებს. და საერთოდ, მე არ ვიცი საქართველოში თუ არის რაიმე ფორმირებები. დანამდვილებით მხოლოდ ის შემიძლია გითხრათ, რომ მამუკა იოსავა ასრულებს თავის თანამდებობრივ მოვალეობას. ის არის ეროვნული გვარდიის დეპარტამენტის უფროსი, მას ეხება რეზერვის მომზადება.
_ ალასანიამ განაცხადა, რომ უშიშროების საბჭოს კონკრეტულ ფაქტებს და გადასცემს.
_ თქმა არ ნიშნავს ფაქტების და მტკიცებულებების დადებას. ფაქტი და მტკიცებულება ნიშნავს იმას, რომ რაღაცა თვალნათელია და არის რეალური ფაქტი. თუ მასეთ ფაქტებს დადებენ, დამირეკეთ და აუცილებლად გაგიკეთებთ მაგაზეც კომენტარს.
