ატყუებს თუ არა მუნიციპალიტეტის გამგეობა სამინისტროს

ვაზიანის დასახლების მაცხოვრებელთა პრობლემა ჯერჯერობით კვლავ მოუგვარებელი რჩება. 56 კორპუსში მცხოვრები 5 ათასამდე ადამიანი ხელისუფლებას დახმარებას უკვე 3 თვეა სთხოვს. საქმე იმაშია, რომ ნაგვის ურნების არარსებობის გამო, მოსახლეობა იძულებულია ნაგავი ტერიტორიაზე დაყაროს, თუმცა მუდმივი ქარის გამო, ნარჩენები იფანტება. ადგილობრივები ტერიტორიის გაწმენდას და ელემენტარული გარემო-პირობების გაუმჯობესებას ითხოვს.

აღსანიშნავია ისიც, რომ 10 ნაგვის ურნა ერთ ადგილზე, დასახლებული პუნქტიდან საკმაოდ მოშორებით დგას. თუმცა, იმის გამო, რომ ტერიტორიაზე 100-მდე მაწანწალა ძაღლია, ურნებთან მიახლოებას ადგილობრივები ვერ ახერხებენ.

აღნიშნული პრობლემის შესახებ "გურია ნიუსმა" პირველი სტატია 23 სექტემბერს გამოაქვეყნა. სტატიის გამოქვეყნებიდან რამდენიმე დღეში საკითხით გარემოსდაცვითი ზედამხედველობის დეპარტამენტი დაინტერესდა და პრობლემის ადგილზე შესასწავლადაც იყო ჩასული. ვიზიტიდან მეორე დღეს კი დეპარტამენტმა გარდაბნის მუნიციპალიტეტის გამგეობას წერილით მიმართა და რეაგირება მოსთხოვა. თუმცა, ამ დრომდე სამინისტროს გარდაბნის მუნიციპალიტეტისგან ოფიციალური პასუხი არ მიუღია. რამდენიმეთვიანი დანაპირებების შემდეგ, წერილი სამინისტროში 2 დღის წინ მივიდა.

წერილის ასლი კი, "გარდაბნის მუნიციპალიტეტმა "გურია ნიუსსაც" გამოუგზავნა, სადაც აღნიშნულია, რომ პრობლემებთან დაკავშირებით მუშაობა მუნიციპალიტეტს უკვე დაწყებული აქვს.

რაც შეეხება გარემოსდაცვითი ზედამხედველობის დეპარტამენტის მიერ გარდაბნის მუნიციპალიტეტისთვის მიცემულ რეკომენდაციებს, რომ გაიწმინდოს ტერიტორია ნაგვის ნარჩენებისგან ჯერჯერობით შეუსრულებელი რჩება.

"გარდაბნის მუნიციპალიტეტის გამგეობაში შემოსული თქვენი მომართვის პასუხად,  "გურია ნიუსი"-ს ვებ–გვერდზე გამოქვეყნებულ სტატიასთან დაკავშირებით, რომელიც შეეხებოდა ვაზიანის სამხედრო დასახლების   სხვადასხვა საყოფაცხოვრებო პრობლემებს, მოგახსენებთ, რომ დასრულებულია ტენდერი ნაგვის ურნების შესყიდვაზე, შესაბამისი პროცედურების შემდეგ მოხდება ნაგვის ურნების განაწილება ადმინისტრაციულ ერთეულზე. დასუფთავების საკითხთან დაკავშირებით, შესაბამის კომპანიებს მიეცა გაფრთხილება და დაწყებულია დასუფთავების სამუშაოები. საკანალიზაციო სისტემის მოწესრიგება (შეძლებისდაგვარად) დაგეგმილია 2016 წელს, რაც შეეხება მაწანწალა ძაღლების პრობლემას, ვინაიდან მუნიციპალიტეტის ტერიტორიაზე არ არსებობს მაწანწალა ცხოველების თავშესაფარი საკითხის მოგვარება სცილდება მუნიციპალიტეტის გამგეობის კომპეტენციას", _ აღნიშნულია გარდაბნის მუნიციპალიტეტის მიერ გარემოსდაცვითი ზედამხედველობის დეპარტამენტისთვის გაგზავნილ წერილში.

თუმცა, წერილში აღნიშნული, რომ უკვე დაწყებულია დასუფთავების სამუშაოები, სიმართლეს არ შეესაბამება. ტენდერის დასრულების მიუხედავად, ტერიტორიაზე არც ახალი ნაგვის ურნები მიუტანიათ. 

"გურია ნიუსი" ვაზიანის დასახლებაში" რამდენიმე დღის წინ, წერილის მიღების შემდეგ, ტერიტორიის შესამოწმებლად იმყოფებოდა.

ტერიტორიის გაწმენდის ნაცვლად, ადგილზე ნაგვის ახალი კერებია გაჩენილი და საყოფაცხოვრებო ნარჩენები იმაზე მეტ ფართობზეა გაშლილი, ვიდრე იყო.

მოსახლეობასთან გასაუბრების შემდეგ აღმოჩნდა, რომ ტერიტორია ოქტომბრის შუა რიცხვებში საკუთარი ძალებით გაუსუფთავებიათ. სპეციალურად დაქირავებული ტრაქტორით ორმოები ამოუჭრიათ და შიგ ჩაუყრით. თუმცა, იმის გამო, რომ ვაზიანს ყოველდღიურად დასუფთავების სამსახური არ ემსახურება, ადგილობრივ მაცხოვრებლებს ნაგვის დაყრა ისევ ძველი ნაგავსაყრელის ადგილზე უწევს.

"ერთი რაღაც მაინც დაიწყონ და გააკეთონ, აბსლუტურად, არაფერი გაკეთებულა. ყველაფერს გვატყუებენ. დღეს იქნება-ხვალ იქნებაში გადის დრო. ორმო ოქტომბერში ამოვთხარეთ, ძველი ნაგავი ტრაქტორით ჩავაყრევინეთ და ზემოდან მიწა დავაყარეთ. მეორე ორმოც ამოვთხარეთ ახალი ნაგვის ჩასაყრელად, მაგრამ ისიც უკვე ამოივსო. რასაც ვითხოვდით, ნაგვის ურნებს, ტრანსპორტს, გარე განათებების დამონტაჟებას, ტერიტორიის გაწმენდას, არაფერი გაუკეთებიათ. ისევ იგივე პირობებში გვიწევს ცხოვრება.

პატარა ნაგვის მანქანა მოდის ზემოთა დასახლებაში, იქვე გაასუფთავებენ ურნებს და მიდიან, დანარჩენ ტერიტორიაზე გაშლილი რომ არის ნაგავი მაგას ვერ ხედავენ. არც ქვედა დასახლებაში ჩამოდიან. თამაც, ეს მანქანა მხოლოდ იმ დროს მოდის, როცა შემოწმებაზე აპირებს ვინმე სამინისტროდან მოსვლას", _ აცხადებენ ვაზიანის დასახლების მაცხოვრებლები.

ვაზიანის დასახლების წამომადგენელმა თამაზ მარგიანიმა "გურია ნიუსის" ჟურნალისტთან შეხვედრაზე უარი განაცხადა, მიზეზად გარდაბნის მუნიციპალიტეტის გამგებლის გარდაცვალება დაასახელა. თუმცა, სატელეფონო საუბრისას აცხადებს, რომ კარგად იცნობს ვაზიანის პრობლემებს და "როგორც ხალხი ამბობს ყველაფერი ისე არ არის".

"ეს პრობლემები "ნაციონალების" დროსაც იყო, ახლა კიდევ გამოკეთებულია და წინ რომ მიდის, ფაქტია. ნაგავი გააქვთ ტერიტორიიდან, მაგრამ ხალხი ისევ ყრის. თქვენ რომ იცოდეთ, თუ გინდათ, ჩავატაროთ ექსპერიმენტი, დილით ჩამობრძანდით და ნახავთ როგორ აბინძურებს მოსახლეობა ამ ტერიტორიას. გამოდის სახლიდან და ნაგავი ურნამდე კი არ მიაქვს, იქვე მიაგდებს კორპუსთან. ნაგვის ურნები არის, ქვემოთა დასახლებაშიც იყო, მაგრამ ერთი მოიპარეს, დანარჩენები ზემოთ ამოიტანეს და ახლა სადაც მოეხასიათებათ ნაგავს იქ ყრიან", _ აცხადებს მარგიანი.

კითხვაზე: რამდენად დაზუსტებული ინფორმაცია აქვს, მაშინ, როდესაც გარდაბნის მუნიციპალიტეტში ამბობენ, რომ ურნები მხოლოდ ერთ ადგილზეა და საკმარისი არ არის", _ მარგიანი გვპასუხობს:

"შარშანწინ დავურიგეთ ეს ნაგვის ურნები. ყველგან იყო თავიდან. ახლა ერთ ადგილზეა თავმოყრილი. დაახლოებით, 20 ცალ ნაგვის ურნას ველოდებით, მუნიციპალიტეტმა უნდა შემოიტანოს და დასუფთავების მანქანაც უფრო ინტენსიურად ივლის. ტენდერი უკვე მოგებულია და ყოველდღე ველოდებით რომ  ურნებს მოგვიტანენ", _ აცხადებს მარგიანი.

იმ ფონზე, როდესაც სამინისტროს მიმართვას მუნიციპალიტეტის გამგეობა თვეების განმავლობაში არ პასუხობს, აღებული ვალდებულებები კი ამ დრომდე არ შეუსრულებია, უცნობია, როდის მოგვარდება ვაზიანის მაცხოვრებელთა პრობლემა. თუმცა, "გურია ნიუსი" აგრძელებს თემაზე მუშაობას და უახლეს ინფორმაციებს მირებისთანავე შემოთავაზებთ.

ამავე თემაზე: