ქალაქ ლანჩხუთში სტიქიის სალიკვიდაციო სამუშაოების ფარგლებში აღმაშენებლის პირველ ჩიხში სანიაღვრე არხის მოწყობა და საერთო საცხოვრებლის მიმდებარე ტერიტორიის მოხრეშვა იგეგმება. საამისოდ კი 14 307 ლარია დასახარჯი იმ 350 ათასი ლარიდან, რომელიც ინფრასტრუქტურის სამინისტროსგან მუნიციპალიტეტმა 11 ნოემბერს მომხდარი სტიქიის სალიკვიდაციოდ მიიღო.
განსახორციელებელ სამუშაოებთან დაკავშირებით უკმაყოფილებას გამოთქვამენ აღმაშენებლის პირველი ჩიხის მაცხოვრებლები, რომლებმაც გვთხოვეს, საკითხის მათთვის სასიკეთოდ გადაჭრაში დავხმარებოდით. მათი თქმით, მას შემდეგ, რაც ადგილზე ტექნიკა შემოვიდა, ქუჩაზე მდგომარეობა უფრო გაუარესდა და გავლა შეუძლებელი გახდა.
აღსანიშნავია, რომ მოსახლეობა "გურია ნიუსს" მას შემდეგ დაუკავშირდა, რაც ადგილზე მუნიციპალიტეტის გამგებელმა ზაზა ურუშაძემ ინფრასტრუქტურისა და არქიტექტურის სამსახურის უფროსთან, ლევან ჩხაიძესთან ერთად აქ სტიქიის სალიკვიდაციო სამუშაოები მოინახულა.
"ჩვენი მოთხოვნა არის გზა გაგვიკეთონ ნორმალურად. გვაინტერესებს, რა კრიტერიუმით შეარჩიეს სხვა ქუჩები, სადაც ასფალტიც დააგეს და სანიაღვრე არხებიც გაიყვანეს. რა, ხალხი არ ვართ? კაციშვილი ჩვენ არ გვაქცევს ყურადღებას. ეზოში ვერ შევდივართ, ისეთი მდგომარეობაა. თუკი ნორმალურად არ აკეთებენ, მაშინ საერთოდ დაანებონ თავი და დატოვონ ისე, როგორც არის. მოიტანეს ძველი, დაჟანგული მილები და ის უნდა ჩააწყონ. შეიძლება ამ გზაზე საერთოდ გავლა?! თუკი ხვდებიან რომ გასაკეთებელია, წესიერად გაგვიკეთონ, რად გვინდა ეზოების წინ ამხელა ორმოებს რომ გვითხრიან და ჟანგიან მილებს ყრიან შიგნით. რომელი საუკუნეა, ასეთი არხი რომ გაყავთ? გაკეთონ კაპიტალურად, როგორც წესია ბეტონის სანიაღვრე არხი და მოხრეშონ მთლიანად გზა. არავითარ შემთხვევაში არ მივცემთ უფლებას ჩვენი ჭიშკრის წინ ჟანგიანი მილები ჩაყარონ.
ეს ქუჩა ყოველთვის პრესტიჟული იყო, უყურადღებოდ არც ერთ დროში არ დარჩენილა და ახლა რა გახდა ასეთი, რომ აბუჩად გვიგდებენ? აქაც ხალხი ვცხოვრობთ და ბავშვები გვყავს. როგორც გავიგეთ, სტიქიის სალიკვიდაციო თანხით აკეთებენ ამ არხს, თუმცა არ ვიცით, როდის დაატყდა თავს ჩვენს ქუჩას ეს სტიქია, ალბათ რომ გვეძინა მაშინ და ვერ გავიგეთ. სიმართლე თუ გინდათ, სტიქია ახლა არის ჩვენს ქუჩაზე, ვერ გაივლი ადამიანი. მოკლედ, ჩვენი მოთხოვნაა წესიერი სანიაღვრე კვლები გაგვიკეთონ და მოხრეშონ. გამგებელი როცა იყო ადგილზე მოსული, გავაცანით ჩვენი პოზიცია და პასუხად მივიღეთ, რომ ამ ეტაპზე მეტის გაკეთება ვერ მოხერხდებოდა, ახლა ეს თანხაა ასათვისებელი, გაისად გაკეთდება დანარჩენიო " – აცხადებდნენ აღმაშენებლის ჩიხის მაცხოვრებლები, რომლებიც სიტუაციაში უკეთ გასარკვევად ადგილზე გამგეობის ინფრასტრუქტურისა და არქიტექტურის სამსახურის უფროსის, ლევან ჩხაიძის მოსვლას ითხოვდნენ.
თუმცა, ჩხაიძის მოსვლამდე ადგილზე სამუშაოების მწარმოებელი გიორგი ჯიბლაძე გამოცხადდა, რომლისთვისაც ბუნდოვანი იყო მოსახლეობის ეს პოზიცია.
"თუ რამე სათქმელი გქონდათ, ეს გამგებლისთვის უნდა გეთქვათ, როცა აქ იყო მოსული და შეხვდით. პროექტით სანიაღვრე კვლები უნდა ამოვიღო და შიგ რკინის მილები ჩავაწყო. გზის მთლიანი მოხრეშვა ნამდვილად არ იგეგმება. ხომ დაგპირდათ გამგებელი, რომ მომავალი წლისთვის მოეწყობოდა ბეტონის სანიღვრე არხები და გზაც მოიხრეშებოდა?"- განუცხადა მოსახლეობას ჯიბლაძემ.
მოსახლეობის თქმით კი მათ არა დაპირება, არამედ კონკრეტული საქმე ჭირდებათ.
"ასე ბევრჯერ დაგვპირდნენ, მაგრამ ტყუილი აღმოჩნდა. ამ დაპირებით, წელს ეს ქუჩა სრულად უნდა გაკეთებულიყო, თუმცა, რას და როგორ აკეთებენ აგერაა ფაქტი. თუკი მომავალ წელს მართლაც იგეგმება ამ ქუჩის სრული რეაბილიტაცია, მაშინ ახლა რატომღა ხარჯავენ ტყუილად ფულს. ნუღარ იღებენ ახლა კვალს, დატოვონ ისე როგორც არის და მომავალ წელს გააკეთონ, ისე როგორც საჭიროა. გაკეთების ნაცვლად უფრო გააფუჭეს გზა" – პოზიციებს არ თმობდა მოსახლეობა
მოსახლეობა შეუვალობას იჩენდა და ადგილზე გამგეობის წარმომადგენლის მოსვლას ითხოვდა, საქმის მწარმოებლებს კი არ აძლევდა საშუალებას პროექტით გათვალისწინებული სამუშაოები დაეწყო.
მოსახლეობასთან შესახვედრად ლევან ჩხაიძე მარტო გამოცხადდა. მან მოსახლეობას არსებული მდგომარეობა გააცნო და შესაძლებლობის დონეზე პირობაც დადო, რომ სამომავლოდ მოსახლეობის მიერ დაყენებული მოთხოვნა სასიკეთოდ გადაწყდებოდა.
"იმ თანხით, რომელიც ამ ეტაპზე გაგვაჩნია, იმაზე მეტის გაკეთება, რაც იგეგმება, შეუძლებელია. გაწვიმებისას აქ ისეთი მდგომარეობაა, რომ გავლა შეუძლებელია. როცა სტიქია მოხდა, შევამოწმეთ ქუჩები, აქ საკმაოდ გაუსაძლისი მდგომარეობა დაგვხვდა, კაცს რომ რამე გაგჭირვებოდა, სასწრაფო ვერ შეძლებდა მოსვლას. ჩვენი უპირველესი ამოცანაა წყალი, რომელიც გზაზე და მოსახლეობის ეზოებში დგება, დაიწრიტოს. გადაჭრით ნამდვილად არ შემიძლია იმის თქმა, რომ მომავალ წელს აქ ბეტონის სანიღვრე არხები გაკეთდება და გზა მოიხრეშება, თუმცა პირობას გაძლევთ, რომ ეს ქუჩა ერთ-ერთი პრიორიტეტულია და ყველანაირად ვეცდებით 2016 წელს ქუჩის სრული რეაბილიტაცია მოხდეს" – განაცხადა ჩხაიძემ.
მიუხედავად იმისა, რომ შეკრებილ მოსახლეობას ლევან ჩხაიძემ გარანტია ვერ მისცა, ამ ქუჩის სრული რეაბილიტაცია მომავალ წელს აუცილებლად განხორციელდებოდა, მან მაინც მოახერხა ადგილობრივები სამუშაოების გაგრძელებაზე დაეთანხმებინა.
აღმაშენებლის პირველი შესახვევის მცხოვრებლები ქუჩის ბოლომდე გაკეთებას ითხოვენ და ეტაპობრივ წინსვლას, უმნიშვნელო საქმედ მიიჩნევენ.
