საქართველოს აგრარიკოსთა მოძრაობის თავმჯდომარე, ანდრო ხეთერელის თქმით, კომბოსტო ერთ-ერთი ყველაზე მეტად გავრცელებული ბოსტნეული კულტურაა მსოფლიოში. მისივე თქმით, იგი ერთ-ერთი ყველაზე მაღალ მოსავლიანი კულტურაა და შესაბამის აგროტექნიკურ პირობებში მისი მოსავლიანობა შეადგენს 60-80 ტონას ერთ ჰექტარზე.
_ ძირითადად, კომბოსტო, ორწლიანი კულტურაა, თუმცა, არსებობს ერთწლიანი კომბოსტოებიც _ ყვავილოვანი კომბოსტო, ბროკოლი და პეკინური. გარდა გავრცელების ინტენსივობისა, ვეგეტაციის პერიოდის ხანგრძლივობის (დროის მონაკვეთი აღმოცენებიდან ტექნიკურ სიმწიფემდე) მიხედვით, კომბოსტოს ჯიშებს/ჰიბრიდებს ჰყოფენ საადრეო, საშუალო, საშუალოდ საგვიანო და საგვიანო ჯიშებად/ჰიბრიდებად. გარდა კომბოსტოს ჯიშის ან ჰიბრიდისათვის დამახასიათებელი თვისებებისა, მისი ვეგეტაციის ხანგრძლივობა დამოკიდებულია, ასევე, წლის კლიმატურ პირობებზე და კულტურის წარმოების ტექნოლოგიურ დეტალებზე. ჩითილით წარმოების შემთხვევაში, საადრეო კომბოსტო შემოდის 103-130 დღეში, საშუალო _ 131-145 დღეში, საშუალოდ საგვიანო _ 146-160 დღეში, ხოლო საგვიანო კი 161-185 დღეში, _ აღნიშნავს ჩვენთან საუბრისას ხეთერელი.
საუკეთესო წინამორბედ კულტურას კომბოსტოსთვის წარმოადგენს მრავალწლიანი ბალახები, კარტოფილი, კიტრი, ხახვი, პომიდორი და საშემოდგომო ხორბალი. ხეთერელის თქმით, არ არის რეკომენდებული კომბოსტოს წარმოება ბოლოკის, კომბოსტოსა და მისი ოჯახის სხვა წარმომადგენლების შემდეგ, 3-4 წელიწადზე ნაკლები შუალედით.
_ ხარისხიანი და მაღალი რაოდენობრივი მაჩვენებლების მქონე კომბოსტოს მოსავლის მისაღებად, საჭიროა მცენარე მთელი ვეგეტაციის განმავლობაში დაცული იქნას მავნებელ-დაავადებათა უარყოფითი ზემოქმედებისგან, რისი უზრუნველყოფაც შესაძლებელია მხოლოდ წამლობათა სქემის სწორი შერჩევით და მისი ოპტიმალურ ვადებში გახორციელებით, _ ამბობს აგრარიკოსთა მოძრაობის თავმჯდომარე და ჩვენს მკითხველს კომბოსტოს წამლობათა სქემას სთავაზობს, რომელიც აგრონომის განმარტებით კარგ და ეფექტურ შედეგს იძლევა.
I წამლობა
პირველი წამლობა ტარდება მაშინ, როდესაც ახლად აღმოცენებულ კომბოსტოს განუვითარდება პირველი ნამდვილი ფოთოლი. წამლობა ტარდება პრეპარატ “პრევიკურით “, შემდეგი წესით: 15 გრ პრეპარატი იხსნება 10 ლ წყალში და ხდება ჩითილების მორწყვა ისე, რომ 1 კვ/მ-ზე დაიხარჯოს 2-4 ლ ხსნარი.
II წამლობა
მეორე წამლობა საჭიროა ჩატარდეს პირველი წამლობიდან 12-15 დღის შემდეგ. ამ დროს 30 გრ ანტრაკოლი და 1 გრ დეცის პროფი იხსნება 10 ლიტრ წყალში და ხდება შესხურება ისე, რომ ერთ ჰა-ზე დაიხარჯოს 500-600 ლიტრი ხსნარი.
III წამლობა
მესამე წამლობა ტარდება მეორე წამლობიდან 10-12 დღის შემდეგ და ანალოგიურია მეორე წამლობისა.
IV წამლობა
მეოთხე წამლობა საჭიროა ჩატარდეს მესამე წამლობიდან 10-12 დღის შემდეგ. ამ დროს 100 გრ ბორდოს ხსნარი და 1 გრ დეცის პროფი იხსნება 10ლიტრ წყალში და ხდება შესხურება ისე, რომ ერთ ჰა-ზე დაიხარჯოს 500-600 ლიტრი ხსნარი.
V წამლობა
მეხუთე წამლობა ტარდება მეოთხე წამლობიდან 10-12 დღის შემდეგ და ანალოგიურია მეოთხე წამლობისა.
