ოზურგეთის მუნიციპალიტეტის სოფელ ბაილეთში, ახალი წლის ღამეს ტრაგედია დატრიალდა. სოფელში მცხოვრებ ზაზა ებრალიძის მრავალსულიანი ოჯახი ღია ცის ქვეშ დარჩა, მათ საცხოვრებელ, ორსართულიან სახლს ცეცხლი გაუჩნდა, რის შედეგადაც ოჯახის დიასახლისი დაიღუპა.
ტრაგედიის დროს სახლში ოჯახის ფეხმძიმე რძალი და ორი არასრულწლოვანი ბავშვი იმყოფებოდნენ.
ხუთი თვის ფეხმძიმე შორენა გოგრაჭაძე "გურია ნიუსთან" ხანძრის დეტალებს ყვება:
"1 იანვარი თენდებოდა, ჩემი დედამთილი უცებ გამოვარდა, საშინელი დამწვრის სუნიაო, წამოვვარდით ყველანი და უკან აივნიდან გადავხტით, ბავშვებიც, ყველანი საცვლების ამარა, თავად ვერ მოასწრო გამოსვლა და ცეცხლის ალში დაიწვა. მანქანა დაგვეწვა, 3 ტონა თხილი და ასევე 3 000 დოლარის ოქრო მქონდა სახლში.
რამ გამოიწვია ხანძარი, არ ვიცით. აბსოლუტურად ვერაფერი ვერ გადავარჩინეთ. ახლა მეზობელთან ვართ შეფარებული და ხელისუფლების დახმარების მოლოდინში ვართ."
ბაილეთის მაჟორიტარი დეპუტატის პაატა კიღურაძის ინფორმაციით, 70 წლის ქალბატონი მაშინვე გადაიყვანეს რეანიმობილით თბილისში, თუმცა, მალე გარდაიცვალა.
დაზიანება მიიღო ერთ-ერთმა არასრულწლოვანმაც. ოჯახის ახლობლების ინფორმაციით, მის სიცოცხლეს საფრთხე აღარ ემუქრება.
ხანძრის გამომწვევ სავარაუდო მიზეზად შეშის ღუმელი სახელდება.
შემთხვევის ადგილზე ადგილობრივი ხელისუფლების წარმომადგენლები იმყოფებოდნენ.
ოზურგეთის მუნიციპალიტეტის გამგებლის მერაბ ჭანუყვაძის განცხადებით, ბაილეთში ხანძრის შედეგად დაზიანებული ებრალიძეების ოჯახის მდგომარეობა სპეციალურმა კომისიამ ადგილზე შეისწავლა. მუნიციპალიტეტის გამგებელმა ოჯახს პირობა მისცა, რომ სამშენებლო მასალებით დაეხმარება:
" ოზურგეთის მუნიცპალიტეტის გამგეობა მათ ცემენტს, თუნუქის სახურავს და ხის მასალას უახლოეს პერიოდში გადასცემს,"- აღნიშნა მერაბ ჭანუყვაძემ.
