"ძაღლებს ამწყვდევენ, კვებავენ, მაგრამ სინათლეს უთიშავენ და უნთებენ ხშირ-ხშირად. ძაღლები ნერვიულობისგან იღუპებიან!" _ აკადემიკოსი და მედიკოსი ვახტანგ ბოჭორიშვილი, შევარდნაძის დროინდელი პარლამენტის წევრი" _ ასე იწყება წერილი, რომელიც "გურია ნიუსს" ქვემო და ზემო ერკეთის მოსახლეობამ გამოუგზავნა.
ერკეთელების თქმით, "მოუთმენელი გაჭირვების გამოსახატად" აქციის გამართვას გეგმავდნენ: "ჩვენი გულისტკივილის კი არა, უკვე მოუთმენელი გაჭირვების გამოსახატად ვგეგმავდით პროტესტის სხვა გზას დავდგომოდით, მაგრამ "გურია ნიუსის" 4 იანვრის ნომერმა აზრი შეგვაცვლევინა _ იქნებ ამ გაზეთით სჯობს ბრძოლის დაწყება?!
ჩვენ აღარ გვიკვირს ბნელში ცხოვრება, არც ის, რომ იანვარში გურიის მთებში თოვლი მოვიდა! არც ის, რომ ყველა დასაბრალებელი თოვლს ბრალდება! არც ის, რომ ოპოზიციამ ამ თემით ახალი ამბავი აღმოაჩინა და ეს ყველაფერი ახლა არ დაწყებულა… ათეული წლებია ჩვენი წუხილი ნარნარით მიმავალ ქარავანს ადევნებული ძაღლების ყეფაა! მიდიან ახალ-ახალი ქარავნები, გაწბილებული ძაღლები უკან უხალისოდ ბრუნდებიან. ვინაა მშველელი? ვეძებთ ასეთ ძალას და ყველა გზა "ენერგო-პრო ჯორჯიას" ჩოხატაურის ფილიალთან იყრის თავს.
მერე რა? ათასგვარი ყოფითი პრობლემებით გულშემოყრილ მოსახლეობას მათგან არასოდეს მიუღია ადამიანური, საქმის მოსაგვარებელი პასუხი, დახმარება, თანაგრძნობა… შეღავათმა ჯვარი დაგწერათ! ერთადერთი, რაც ჩვენ ამ კომპანიასთან გვაკავშირებს, არის რამენაირად, ყველა საშუალებით, თუნდაც თავხედური მოქმედებით, ელექტროენერგიის საფასურის ამოღება. წინა ხელისუფლების დროს, თითქმის ყაჩაღური გზით გვღლეტდნენ დაუხარჯავი, ან სხვის მიერ დახარჯული დენის საფასურს," _ აღნიშნულია წერილში.
წერილის ავტორები "ენერგო-პრო ჯორჯიას" ჩოხატაურის სერვისცენტრის ხელმძღვანელისგან კონკრეტულ კითხვებზე პასუხებს ითხოვენ:
"ახლახან, ერთმა მოხუცმა თანხის წამღები ვერ იშოვა. ნახევარი დღის დაგვიანებისთვის 2 ლარი უმალ წაღლიტეს, დააჯარიმეს. ბევრმა აბონენტმა არც იცის, ვინ "აკვეხებს" ქვითარს ჭიშკარში, რომელიც ზოგჯერ სველდება, ხან ქარს მიაქვს და სულაც იკარგება. გვიპასუხეთ, ბატონო ჭარბაძე _ თქვენ ასრულებთ კანონს, მაგრამ თქვენი ზემდგომი "კანონისტებისთვის" მოგიწოდებიათ ოდესმე ამ საშინელი კანონის შეცვლისაკენ ან რაღაც შეღავათისკენ? ხელფასს რომ აძლევთ "მანტიორის" სახელით შემორჩენილ თანამშრომლებს, გიკითხავთ ჩვენთვის, თუ გვინახავს ისინი ან როგორ "გვემსახურებიან?"
მოსახლეობა იძულებულია ყოველი ნიავის შემდეგ, ჭოკებით ირბინოს შუკა-შუკა (ვისაც ფეხზე დგომა ჯერ კიდე შეუძლია) და გადაკვანძული სადენები განაცალკევოს. სწორედ, ამის გამო დაიღუპა სურებში ახალგაზრდა ვაჟკაცი _ სიმონიკა დოლიძე _ დავრდომილი დედ-მამის ერთადერთი უცოლშვილო ვაჟი. ვინ აგებს ამაზე პასუხს? დაუდევრობას ნუ ააფარებთ დავსილ თვალებზე უბედურ მშობლებს. დაუდევრობა რომ არ არსებობდეს, იმიტომ არსებობს ეს სამსახური, რომელსაც "ენერგო-პრო ჯორჯია" ჰქვია და რომელსაც, ნერვების გლეჯის, თითქმის არარსებული მომსახურების და აგერ ახლახან _ სიკვდილის მეტი, არაფერი მოუტანია.
ჩვენ არ ვიცით, თქვენ ირიგებთ თუ არა პრემიებს ხალხის "მაღალი დონის" მომსახურებისთვის. ეს არცაა ჩვენი საქმე! თქვენ რომ კერძო კომპანია ხართ(!) და თუ ეს "კერძოობა" არის მთავარი, კერძო ვართ ჩვენც, თითოეული ადამიანი, რომელთა სიცოცხლე, უბრალოდ, არსებობა, აუტანელი გახდა!
ჩვენ ვაპირებთ, მალე ერთ დიდ "კერძო", მაგრამ გამწარებულ კომპანიად ვიქცეთ და ის მაინც შევძლოთ, კარები აგიჭედოთ! ახლა მკითხველს აუხსენით, რატომ აღმოჩნდა ეს ორი სოფელი სხვებისგან განსხვავებულ მძიმე ვითარებაში. მაშინ, როცა სრულიად წყნარ ამინდში, ზოგჯერ ზაფხულშიც, დაბა და ყველა სოფელი განათებულია, ერკეთი და ქვემო ერკეთი ბნელია!
ადრეც ასე იყო, მაგრამ რაც სურებმა ელექტროენერგია მიიღო, ძალიან ხშირად ითიშება სურები, ვითიშებით ჩვენც. არავინ იფიქროს დიდი სიხარულით არ შევხვედროდით სურების განათებას. სურებს თავისი დაუსრულებელი გასაჭირი ღრღნის მუდამ, მაგრამ ახლა ერთნაირად გაჭირვებულები აღმოვჩნდით ჩვენც და სურებიც.
მოსაყვედურეებს მრავალი ამბები ამოაქვთ "ენერგო პროდან". ერთი ასეთია (იქნებ, არცაა მართალი) _ 1 200 დოლარი უნდა ამ საქმესო! რაა?! ხომ არ აპირებთ მოსახლეობისთვის ამ თანხის აცინცვლას? ეს რა თანხაა იმასთან შედარებით, რაც ამ გატყავებული ხალხისგან წაგიღიათ? მათ შორის, უკანონოდაც?
ვფიქრობთ შეასრულებთ თქვენს ვალდებულებას და მიხედავთ ამ საქმეს. ჩვენც არ გვაქვს სურვილი, ღამის ბესლეთიდან ამ საშინელ ამინდში ბრძოლა გავაჩაღოთ.
ბატონო ჭარბაძე, ალბათ, ამავე გაზეთით გაგვცემთ პასუხს. ხელწერების წარმოდგენას აზრი არ აქვს. ეს არის სასიცოცხლო საკითხი, რომელსაც ყველა აწერს ხელს. ვიცით, რომ ამავე აზრისაა სურების მოსახლეობა და ისინიც შემოგვიერთდებიან", _ აღნიშნულია მოსახლეობის წერილში.
ერკეთელების კითხვებზე პასუხების გაცემა "ენერგო-პრო ჯორჯიას" ხელმძღვანელობას ვთხოვეთ.
კომპანიის საზოგადოებასთან ურთიერთობის დეპარტამენტის უფროსის ავთანდილ დვალიშვილის მიერ მოწოდებული ინფორმაციის თანახმად, "ელექტროენერგიის დავალიანების გამო გათიშული აბონენტისთვის ელექტროენერგიის მიწოდების აღდგენის საფასური შეადგენს 2 ლარს დღგ-ს ჩათვლით":
_ აღნიშნული საფასური დადგენილია სემეკის #20 დადგენილების (2008 წლის 18 სექტემბერი), 29 მუხლის 3-პუნქტიის თანახმად და ქვითარზე, შესაბამისად, ირიცხება ელენერგიის აღდგენის შემდეგ. მოხმარების წესებს ადგენს სემეკი და არა "ენერგო პრო ჯორჯია", _ ამბობს ჩვენთან საუბრისას დვალიშვილი.
როგორც გაირკვა, კომპანიის ცენტრალურ ოფისში კარგად იციან ჩოხატაურის სოფლებში არსებული პრობლემების შესახებ. იციან ისიც, რომ ჩატარებული სამუშაოები საკმარისი არ არის: _ როგორც სურების, ასევე, ერკეთის და ქვემო ერკეთის დაბალი ძაბვის ქსელის რეაბილიტაცია უკვე გააკეთა კომპანიამ, თუმცა, სამწუხაროდ, პრობლემების სრულად მოგვარებისთვის ეს არაა საკმარისი. ჩვენ კარგად ვიცით, თუ რა პრობლემები არსებობს სოფელ სურებში და ჩოხატაურის რაიონის სხვა სოფლებში ელექტროენერგიის მიწოდებასა და სტაბილურ მომარაგებასთან დაკავშირებით. მაგალითად _ იმისთვის, რომ აღნიშნული პრობლემები საფუძვლიანად მოგვარდეს, მხოლოდ სურებში ქსელის მასშტაბური რეაბილიტაციისთვის საჭირო ინვესტიცია შეადგენს 500 000-დან 700 000 ლარს. დიახ, შესაძლოა ეს იყოს სიახლე აბონენტისათვის და მას აღნიშნული რიცხვები სულაც არ აინტერესებს, თუმცა, კომპანია გეგმავს, მომავალში დეტალური განმარტებები გააკეთოს და უფრო ნათლად აუხსნას მოსახლეობას, რომ ელექტროენერგიის მიწოდების ხარისხის კიდევ უფრო მეტად გაუმჯობესება არ არის დამოკიდებული მხოლოდ კომპანიის სურვილზე და ამისთვის საჭიროა შესაბამისი ფინანსური სახსრები, ხოლო ამ ფინანსური სახსრების ერთიანად მოზიდვა და ინვესტირება თავის მხრივ ავტომატურად გამოიწვევს ტარიფების კორექტირებას, რაც მძიმე ტვირთად დააწვება იგივე აბონენტებს. მეორე მხრივ, "ენერგო-პრო ჯორჯიაში" არსებობს დეტალური მოკვლევა, რომელშიც ასახულია თითოეული ბოძის თუ სატრანსფორმატორო ჯიხურის შესახებ ინფორმაცია და ნამდვილად ცნობილია, რა ოდენობის დამატებითი ინვესტიციაა საჭირო ქსელის სრული განახლებისთვის. შესაბამისად, კომპანიის სტრატეგიაა, რომ ეტაპობრივად, ისე რომ მძიმე ტვირთად არ დააწვეს აბონენტს, მოახდინოს ქსელის განახლება და რეაბილიტაცია", _ ამბობს დვალიშვილი.
კითხვაზე, უკვე ხომ მოხდა ტარიფის კორექტირება და რატომ არ აისახა ეს ქსელის მდგომარეობაზე, დვალიშვილი ასე პასუხობს: "პირველი _ გაზრდილი ტარიფით მიღებული დამატებითი შემოსავალი კომპანიამ სრულად მიიღო სექტემბრის ბოლოს. მეორე _ სამწუხაროდ, ეს ზრდა არ არის კავშირში ქსელის რეაბილიტაციასთან, რადგან აღნიშნული ზრდის დროს გათვალისწინებული იყო მხოლოდ კომპანიის მიერ შესყიდული ელექტროენერგიის ღირებულება, რომელიც კომპანიას გაუძვირდა ეროვნული ვალუტის დევალვაციის გამო".
"ენერგო-პრო ჯორჯიას" ცენტრალურ ოფისში განმარტავენ, რომ სურების ენერგომომარაგების საკითხი დამოკიდებული არ არის ერკეთის და ქვემო ერკეთის ენერგომომარაგებაზე.
_ მიუხედავათ იმისა, რომ ეს სოფლები ერთი ხაზით იკვებებიან, ტექნიკურად არის იმის შესაძლებლობა, რომ შეზღუდვის შემთხვევაში, ჩაიხსნას დაზიანებული უბანი და დანარჩენ სოფლებს მიეწოდოს ელექტროენერგია, _ გვითხრა დვალიშვილმა.
_ ბატონო ავთანდილ, თუკი ეს ტექნიკურად შესაძლებელია, რატომ არ აკეთებს ამას ადგილობრივი სერვისცენტრი და რატომ ხდება სურებთან ერთად ერკეთის გათიშვაც?
_ არ არის ყოველთვის ეგრე. თავიდან, როცა დენი მიდის, შეიძლება რამდენიმე წუთი იყოს მასე ანუ, სანამ ჩაიხსნება, _ ამბობს დვალიშვილი.
კომპანიაში კომენტარს არ აკეთებენ სურებში გარდაცვლილი მამაკაცის შესახებ, რაც წინასწარ არსებული ინფორმაციით, ჩამოგდებულმა ელექტროგადამცემმა ხაზმა გამოიწვია: _ მიმდინარეობს გამოძიება და გამოძიების დასრულებამდე აღნიშნულ საკითხზე კომენტარს ვერ გავაკეთებთ, _ განმარტავენ კომპანიაში.
"ენერგო-პრო ჯორჯიაში" მწუხარებას გამოთქვამენ "განვლილ სადღესასწაულო დღეებში გურიის (ისევე, როგორც მთელს დასავლეთ საქართველოში) არსებული შეფერხებების გამო".
გარდა ამისა, კომპანია სრულ მზადყოფნას გამოთქვამს, რომ მონაწილეობა მიიღოს დისკუსიაში, თუ რატომ არ არის აბონენტთა ენერგომომარაგების ხარისხი კიდევ უფრო მაღალი და რა არის საჭირო ამის მისაღწევად.
აღსანიშნავია, რომ "ენერგო პრო ჯორჯიას" გაწეულ სამუშაოებთან დაკავშირებით საჯარო შეკითხვები ერთადერთმა პოლიტიკოსმა _ საპარლამენტო უმრავლესობის ლიდერმა, ზვიად კვაჭანტირაძემ დაუსვა. ოზურგეთის მუნიციპალიტეტის მაჟორიტარი დეპუტატი აღნიშნავდა, რომ კომპანიას პასუხს მთელი სიმკაცრით მოსთხოვდა.
კვაჭანტირაძეს ტელეეთერით უპასუხა კომპანიის გენერალურმა დირექტორმა მიხეილ ბოცვაძემ და აღნიშნა, რომ "ვერანაირ ბრალდებებს ვერ მიიღებდნენ". ბოცვაძემ ახალი წლის დღეებში შექმნილ პრობლემებზეც ისაუბრა და განაცხადა, რომ "არც ერთ ქვეყანაში არ ხდება ისე, რომ სტიქიის დროს სიცოცხლის რისკის ფასად მომუშავე კოლექტივს თავს ესხმოდნენ".
"ენერგო-პრო ჯორჯიას" გენერალური დირექტორის კომენტარი უპასუხოდ არ დაუტოვებია კვაჭანტირაძეს: "სტიქია რაა, ყველას გვესმის. როგორ მოამზადეთ სისტემა ზამთრისთვის და სხვა ვალდებულებებს როგორ ასრულებს "ენერგო-პრო ჯორჯია", ამაზე ერთად, სერიოზული მსჯელობა და თქვენ კი გადაწყვეტილებების მიღება მოგიწევთ", _ აღნიშნა კვაჭანტირაძემ.
ჯერჯერობით, მედიით გაჟღერებული ამ ურთიერთბრალდებების იქით საქმე არ წასულა. პრობლემა პრობლემად რჩება. იმის გასაგებად, ხომ არ აპირებს კომპანიის ხელმძღვანელების პარლამენტში დაბარებას და რა გეგმები აქვს საზოგადოებისთვის ერთ-ერთი ყველაზე მნიშნელოვანი საკითხის ირგვლივ, "გურია ნიუსი" ზვიად კვაჭანტირაძეს დაუკავშირდა.
_ დღეს მხოლოდ იმის თქმა შემიძლია, რომ ენერგეტიკის მინისტრის მოადგილე ჩამოდის უახლოეს დღეებში გურიაში "ენერგო-პროს" მენეჯმენტთან ერთად. გაიმართება სამუშაო შეხვედრა ყველა მუნიციპალიტეტში არსებული კონკრეტული პრობლემების იდენტიფიცირებისა და აღმოფხვრისთვის, დაწესდება მკაცრი კონტროლი მის შესრულებაზე. ასე ვართ შეთანხმებულები და მომდევნო კვირაში (საუბარი ჩაწერილია 15 იანვარს) აუცილებლად მოხდება ეს შეხვედრა, რომელშიც აქტიურად მივიღებ მონაწილეობას, _ გვითხრა ზვიად კვაჭანტირაძემ.
