მოქალაქე დიანა ქართლელიშვილის ოჯახი გურჯაანის რაიონული სასამართლოს მოსამართლეებსა და პროკურატურის მაღალჩინოსნებს მაქინაციურ გარიგებებში ადანაშაულებს და თავისი კუთვნილი 38 ათასი ლარის ანაზღაურებას ითხოვს.
საქმე იმაშია, რომ ქართლელიშვილის ოჯახმა 2014 წლის 22 სექტემბერს გურჯაანში მდებარე ღვინის კომპანია "ჰელიოს +"-ში 11-ტონამდე საფერავის ჯიშის ყურძენი ჩააბარა, თუმცა ყურძნის საფასურიდან მხოლოდ 13 ათასი ლარი აქვთ აღებული, დანარჩენ თანხას, 27 112 ლარს, უკვე ერთ წელზე მეტი ითხოვდნენ. ამ დრომდე არც სასამართლოს გადაწყვეტილება არსებობდა, ეკუთვნოდა თუ არა აღნიშნული თანხა ქართლელიშვილების ოჯახს.
დაახლოებით ერთი თვის წინ, 2015 წლის 29 დეკემბერს, გურჯაანის რაიონულმა სასამართლომ დიანა ქართლელიშვილის ოჯახის სასარგებლოდ გადაწყვეტილება გამოიტანა და ღვინის კომპანიას 38 ათასი ლარის გადახდა დააკისრა. თუმცა, ქართლელიშვილები კუთვნილი თანხის მიღებას ისევ ვერ ახერხებს.
ამ საქმესთან დაკავშირებით "გურია ნიუსმა" ერთი სტატია უკვე გამოაქვეყნა – ღვინის ქარხანას, პროკურატურასა და სასამართლოს შორის "დაკარგული" 27 ათასი ლარი, სადაც დეტალურადაა აღწერილი, როგორ მოატყუეს ქართლელიშვილის ოჯახი კომპანიის წარმომადგენლებმა და შუამავალმა.
საქმე ისაა, რომ ქართლელიშვილის ყურძენი სწორედ შუამავლის, იოსებ ხუტიაშვილის სახელზე იყო გაფორმებული, რისი თანხმობაც მას ქართლელიშვილებისგან არ ჰქონია. სწორედ ამის გამო, სასამართლომ ხუტიაშვილი საბუთების გაყალბებასა და თაღლითობისთვის დამნაშავედ სცნო, ქარხანას კი დარჩენილი თანხის ნაწილისა და მიყენებული ზარალის ანაზღაურება დააკისრა.
თუმცა, ახლა ქართლელიშვილებს სხვა პრობლემა გაუჩნდათ. იმის გამო, რომ ქარხნის მეპატრონეს სასამართლოს გადაწყვეტილებას ვერ აბარებენ, ამ გადაწყვეტილების კანონიერ ძალაში შესვლა ვერ ხერხდება.
ამასთანავე, მეორე მხარემ, იოსებ ხუტიაშვილმა სასამართლოს გადაწყვეტილება გაასაჩივრა, რაც პროცესს კიდევ უფრო აჭიანურებს.
ქართლელიშვილები კი მიიჩნევენ, რომ ამ ყველაფერს ხელს პროკურატურის მაღალჩინოსნები და მოსამართლეც უწყობს.
როგორც "გურია ნიუსთან" საუბრისას დაზარალებული დიანა ქართლელიშვილი ამბობს, გურჯაანის რაიონული სასამართლოს თავმჯდომარის დავით ნარიმანიშვილის და მოსამართლე ნანა ჩალათაშვილის ინტერესში შედის, რომ პროცესი რაც შეიძლება დიდხანს გაჭიანურდეს. ქართლელიშვილი ეჭვობს, რომ მოსამართლეები პროკურორთან ერთად ქარხნის მეპატრონესთან გარიგებაში არიან შესულები და, სავარაუდოდ, ქრთამიც აიღეს. რის გამოც, ქართლელიშვილმა იუსტიციის უმაღლესი საბჭოს ეთიკის კომისიას მიმართა. საქმეზე მოკვლევა უკვე დაწყებულია.
"მიუხედავად იმისა, რომ სასამართლოს გადაწყვეტილება ჩემს სასარგებლოდ არის გამოსული, კუთვნილ თანხას მაინც ვერ ვიღებ. საუბარია 38 225 ლარზე, რაც ქარხანას სასამართლომ ჩემს სასარგებლოდ დააკისრა. 29 დეკემბრის შემდეგ, სასამართლო ვერ ახერხებს მხარეებს გადაწყვეტილება ჩააბაროს, ეს კი პროცესს აჭიანურებს. რაც, ვფიქრობ, სასამართლოს თავმჯდომარის დავით ნარიმანიშვილის და მოსამართლე ნანა ჩალათაშვილის ინტერესში შედის. რადგან ისინი პროკურორთან ერთად ქარხნის მეპატრონე როზმან რუსიასთან გარიგებაში არიან შესულები და მათ ინტერესში არ არის მეორე მხარისთვის გადაწყვეტილების ჩაბარება.
ვფიქრობ, როზმან რუსიას ეს თანხა უკვე გადახდილი აქვს პროკურორ სანდრო გიორგაშვილისთვის და მოსამართლისთვის. თუმცა, ვის რამდენი მისცა და როგორ გადანაწილდა ჩემთვის გადასახდელი თანხა არ ვიცი. თუ ქარხანას ამ თანხის გადახდა ხელახლა მოუხდება, რუსია აუცილებლად იტყვის სიმართლეს, რომ პროკურორი და მოსამართლე მასთან გარიგებაში იყვნენ შესულები. ამიტომ სასამართლოს თავმჯდომარე და მოსამართლე თვითონვე ცდილობენ, რომ სასამართლოს გადაწყვეტილება რუსიას არ ჩაბარდეს", _ აღნიშნავს ქართლელიშვილი.
მისივე თქმით, მოსამართლემ გადაწყვეტილების ჩაბარებისას ბარიერები ხელოვნურად შექმნა.
"არ ვიცი, რატომ აგზავნის მოსამართლე ამ გადაწყვეტილებას სენაკში ჩასაბარებლად, სადაც ქარხანაა რეგისტრირებული? როცა რეალურად, ეს ქარხანა გურჯაანში მდებარეობს. ვფიქრობ, ეს მოსამართლის ინტერესებში შედის, რადგან იციან რომ იქ არავინ ჩაიბარებს. ამასთანავე, ეჭვის საფუძველს მიჩენს ისიც, რომ იოსებ ხუტიაშვილმა საქმის გაჭიანურების მიზნით, ეს გადაწყვეტილება გაასაჩივრა და აღნიშნა, რომ ჯერ კიდევ 2015 წლის ნოემბერში, სასამართლოს მიერ მიღებული გადაწყვეტილება არ ჩაბარებია, რომლითაც ის სისიხლის სამართლის დანაშაულში დაადანაშაულეს. კერძოდ, საბუთების გაყალბებასა და თაღლითობაში. ხუტიაშვილი ამბობს, რომ კონვერტი, რომელიც მის რძალს ჩააბარეს, ცარიელი იყო. ეს ხომ აბსურდია. თუ კონვერტი 2015 წლის ნოემბერში ცარიელი ჩაბარდა, ახლა რატომ ითხოვს მის გასაჩივრებას? ან როგორ აპირებს დამტკიცებას რომ კონვერტი, რომელიც მას მიუვიდა (მის რძალს ჩაბარდა, ავტ.) ცარიელი იყო? ეს უბრალოდ არის დროის გაყვანა და როგორც ჩანს, ცდილობენ, სასამართლო პროცესები ერთი-ორი წელი კიდევ ატრიალონ. დღეს რომ ხუტიაშვილი თავისუფლად დადის გარეთ, ესეც პროკურორის და მოსამართლის ინტერესშია, მას ის გირაოც კი არ აქვს გადახდილი, რომელიც სასამართლომ დააკისრა (ქართლელიშვილის ამ ინფორმაციას თავად ხუტიაშვილიც ადასტურებს "გურია ნიუსთან" საუბრისას. იხ. სტატია, ავტ.). საქმეში დევს თავად ხუტიაშვილის აღიარებითი ჩვენება, რომ მან გააყალბა ქვითრები და ისე აბარებდა ყურძენს ქარხანას. ამ აღიარებითი ჩვენების საფუძველზეა გირაოთი გათავისუფლებული და სწორედ ამ ამ გირაოს სანაცვლოდ იყენებენ.
მე ეს საქმე მოგებული მაქვს, სასამართლო განაჩენი და გადაწყვეტილებაც უკვე ჩამბარდა. რამდენიმე დღის წინ შევიტანე პრემიერ-მინისტრის სახელზე წერილი, სადაც ყველა დოკუმენტაციაა თანდართული. ველოდები რეაგირებას", _ ამბობს ქართლელიშვილი.
როგორც დაზარალებული დიანა ქართლელიშვილი აღნიშნავს, საქმის კურსშია მთავარი პროკურორი ირაკლი შოთაძე და იუსტიციის საბჭოს მდივანი ლევან მურუსიძე.
"საქმის კურსში ჯერ ყოფილი მთავარი პროკურორი გიორგი ბადაშვილი იყო, ახლანდელი მთავარი პროკურორი ირაკლი შოთაძეც და პროკურატურის გენინსპექციაც. ასევე ვაცნობე პარლამენტის დეპუტატებს, სოფლის მეურნეობის მინისტრ ოთარ დანელიას, ეროვნული ღვინის სააგენტოს ხელმძღვანელობას, ყოფილი პრემიერ ირაკლი ღარიბაშვილს. ფაქტიურად, უწყება არ დარჩენილა, ვისთვისაც არ მეცნობებინოს. სწორედ ამის შემდეგ გამოიტანა გადაწყვეტილება სასამართლომ. პროცესები ერთი წლის განმავლობაში გრძელდებოდა.
მთავარ პროკურატურაშიც ძალიან კარგად იციან, რომ გურჯაანის პროკურორებმა ქრთამი აიღეს. თავიდან ქარხნის მეპატრონე როზმან რუსიამ კონტაქტი დაიწყო გურჯაანის რაიონის პოლიციის უფროსის მოადგილე ლევან მაისურაძესთან. მაისურაძის საშუალებით კი დაუკავშირდა სანდრო გიორგაშვილს. წრეც აქედან შეიკრა. გიორგაშვილმა და მაისურაძემ კი მოსამართლეები და სასამართლოს თავმჯდომარეც ჩაითრიეს, საიდანაც ასე უხმაუროდ ვერ გამოვლენ.
თუმცა მიუხედავად იმისა, რომ სახელებით და გვარებით ვამბობდი, ვინ იდგა ამ საქმის უკან, რეაგირება არ მომხდარა. შოთაძის გადასაწყვეტია ამ რეაგირებას მოახდენს თუ არა, ან სჭირდება კი ასეთი პროკურორები უწყებაში?! მადლობა გენინსპექციის პროკურორს ზურაბ ბენდელიანს, რომ გადაწყვეტილების გამოტანამდე ყოველდღიურ რეჟიმში რეკავდა საოლქო პროკურატურაში და ავალებდა მათ, რომ დროულად გამოსულიყო გადაწყვეტილება", _ აღნიშნავს ქართლელიშვილი და დასძენს, რომ საქმემ სამი მოსამართლე გამოიცვალა, რაც კიდევ უფრო ამწვავებს ეჭვებს, რომ პროცესი ხელოვნურად ჭიანურდებოდა, რისი ინტერესიც მაღალი თანამდებობის პირებს ჰქონდათ.
"ჩემი განცხადების საფუძველზე, მოსამართლე ნანა ჩალათაშვილის წინააღმდეც უკვე მოკვლევა აქვს დაწყებული იუსტიციის უმაღლესი საბჭოს ეთიკის კომისიას. საქმის კურსშია საბჭოს მდივანი ლევან მურუსიზეც, რომელიც კანონის ფარგლებში მუდმივად მეხმარებოდა", _ ამბობს ქართლელიშვილი.
"გურია ნიუსი" ეცადა დაკავშირებოდა საქმის პროკურორს სანდრო გიორგაშვილსა და გამომძიებელ ლევან მაისურაძეს, თუმცა, ისინი ჩვენს სატელეფონო ზარებს არ პასუხობენ. "გურია ნიუსი" მზად არის, დაკავშირების შემთხვევაში, მათი პოზიცია შემოგთავაზოთ.
რაც შეეხება საქმის ერთ-ერთ მონაწილეს, იოსებ ხუტიაშვილს, მან აღნიშნულთან დაკავშირებით, კომენტარის გაკეთება არ ისურვა.
"თუ შეიძლება მაგ საქმეზე ნუღარ დამირეკავთ", _ გვითხრა ხუტიაშვილმა.
სატელეფონო ზარებსა და სმს შეტყობინებებს არ პასუხობენ ქარხნის მეპატრონე როზმან რუსია და ამავე ქარხნის ბუღალტერი მანანა ელიკაშვილი. ხოლო მიიღო თუ არა გურჯაანის რაიონულმა სასამართლომ იოსებ ხუტიაშვილის საჩივარი და რა რეაგირება მოჰყვება მას სააპელაციო სასამართლოში, უცნობია.
("გურია ნიუსმა" გურჯაანის რაიონულ სასამართლოს წერილობით მიმართა. ვითხოვეთ, ეცნობებინათ ჩვენთვის, მიიღო თუ არა იოსებ ხუტიაშვილის სარჩელი წარმოებაში ან გაასაჩივრა თუ არა როზმან რუსიამ გურჯაანის რაიონული სასამართლოს 2015 წლის 29 დეკელმბერს მიღებული გადაწყვეტილება. აღნიშნულთან დაკავშირებით, სასამართლოს პასუხს მოგვიანებით შემოგთავაზებთ. ავტ.)
აღსანიშნავია, რომ სასამართლოს გადაწყვეტილების ჩაბარებისა და გასაჩივრების ვადები ჯერჯერობით ამოწურული არ არის.
იურისტი ლევან ალაფიშვილი "გურია ნიუსთან" საუბრისას განმარტავს, რომ კანონი გადაწყვეტილების მხარეების ჩაბარებისთვის და გასაჩივრებისთვის სპეციალურ ვადას ადგენს, რომლის გასვლის შემდეგაც, გადაწყვეტილების აღსრულება დაიწყება.
"ამ საქმეზე, სასამართლო გადაწყვეტილება ჯერ კანონიერ ძალაში შესული არ არის, რადგან მხარეებს არ ჩაბარებიათ. ამისთვის სპეციალური ვადები არსებობს. როდესაც გადაწყვეტილება მხარეს ჩაბარდება, 2 კვირის ვადაში ასაჩივრებს მას, ან ეთანხმება. თუ არ გაასაჩივრებს, გადაწყვეტილება კანონიერ ძალაში მხოლოდ იმ შემთხვევაში შედის.
სამოქალაქო საპროცესო კოდექსი ადგენს, რომ, სასამართლოს გადაწყვეტილების გამოტანიდან, 20-დან 30 კალენდარული დღის გასვლის შემდგომ მხარე ვალდებულია, მივიდეს და ჩაიბაროს ეს გადაწყვეტილება სასამართლოში. თუ ამას არ გააკეთებს, 30-ე დღის გასვლის შემდგომ დაიწყება გასაჩივრების 2-კვირიანი ვადის ათვლა ავტომატურად. ამის გასვლის შემდგომ კი, მხარეს გასაჩივრების უფლებაც არ ექნება და სასამართლოს გადაწყვეტილება კანონიერ ძალაში შევა.
თუკი გაეგზავნა მხარეს სასამართლოს გადაწყვეტილება და საფოსტო განყოფილებიდან ბრუნდება ის, რადგან მხარეს ვერ აბარებენ, როგორც წესი, სასამართლოების პრაქტიკაა, გადაწყვეტილება საჯაროდ გამოაცხადოს პრესაში ან სასამართლოს ვებ-გვერდზე. გამოქვეყნებიდან 2 კვირაში, თუ მხარემ არ გაასაჩივრა გადაწყვეტილება, ის კანონიერ ძალაში შევა.
ჩაბარების ეს ვადები და პროცედურები აითვლება თითოეული მონაწილის მიმართ. თუკი ორი მოპასუხეა ორივეს მიმართ უნდა იყოს ეს ვადები დაცული. თუმცა, თუკი ერთმა გაასაჩივრა და მეორეს არ გაუსაჩივრებია ჯერ, ამ შემთხვევაში შესაძლებელია სასამართლომ საქმე გააგზავნოს ზემდგომი ინსტანციის სასამართლოში, ან მას შეუძლია, მიუხედავად იმისა, რომ ერთმა მონაწილემ სააპელაციო საჩივარი შეიტანა, მაინც დაიტოვოს საქმე, დაელოდოს სხვა დანარჩენი მონაწილეების გასაჩივრების ვადის ამოწურვას და მხოლოდ ამის შემდგომ გააგზავნოს საქმე ზემდგომი ინსტანციის სასამართლოში", _ აღნიშნავს ალაფიშვილი.
