სურსათის უვნებლობის სააგენტოს გურიის რეგიონული ოფისის ხელმძღვანელმა, კახა თავბერიძემ თანამდებობიდან წასვლის შესახებ განცხადება რამდენიმე დღის წინ დაწერა.
სამსახურის დატოვების მიზეზებზე თავბერიძე კომენტარს ამ დრომდე არ აკეთებს, თუმცა, როგორც მისი აწ უკვე ყოფილი თანამშრომლები გვეუბნებიან, ეს იძულებით მოხდა:
_ ნოლიდან შექმნა ყველაფერი. არაჩვეულებრივი უფროსი და პროფესიონალი იყო. დიდი ხნის განმავლობაში მიდიოდა მასზე ზეწოლა და როგორც ჩანს მიაღწიეს მიზანს, _ გვითხრეს სურსათის უვნებლობის სააგენტოს გურიის რეგიონული ოფისის თანამშრომლებმა.
თანამშრომელზე ზეწოლას უარყოფენ სააგენტოს პრესსამსახურში და აღნიშნავენ, რომ "კახა თავბერიძემ თავად დაწერა განცხადება წასვლის თაობაზე".
„გურია ნიუსის“ ინფორმაციით თავბერიძის სამსახურიდან გაშვება გურიის გუბერნატორს გია სალუქვაძე უკავშირდება, რასაც მხარის პირველი პირი უარყოფს:
_ ეს არის მტკნარი სიცრუე. არავითარი კავშირი არა მაქვს ამ საქმესთან და ხატის წინაშე შემიძლია დავიფიცო. ერთი ზარიც კი არ მაქვს განაშვები სამინისტროში ამ თემაზე და სხვათაშორის, კახასთან ძალიან კარგად ვთანამშრომლობდი. სამინისტრო წყვეტს მისი კადრის გაშვება-დატოვებას და ამაში გუბერნია და გუბერნატორი ვერ ერევა, _ აღნიშნა ჩვენთან საუბრისას სალუქვაძემ.
გუბერნატორი ამბობს, რომ ამ თემაზე სპეციალურ განცხადებას გააკეთებს, რადგან „პრესაში ატეხილი აჟიოტაჟი და არასწორი ინფორმაციის გავრცელება უნდა დასრულდეს“.
ამ ყველაფრის ფონზე კი, კახა თავბერიძის შემცვლელად სამი დღის წინ გიორგი ნაფეტვარიძე სამინისტროს წარმომადგენელმა დავით აშორდიამ წარადგინა, თუმცა, როგორც გავიგეთ ნაფეტვარიძის თანამდებობაზე ყოფნამ ერთი დღე მიითვალა:
_ გუშინ დაიბარეს სამინისტროში, განცხადება დააწერინეს და კადრების განკარგულებაში გადაიყვანეს, _ გვითხრა წყარომ.
სააგენტოს პრესსამსახურში ადასტურებენ, რომ „სურსათის ეროვნული სააგენტოს გურიის რეგიონული სამმართველოს ოფისის მენეჯერის მოვალეობის შემსრულებელს გიორგი ნაფეტვარიძეს მხოლოდ ერთი დღე მოუწია ახალ სამსახურში მისვლა“:
_ ეს ადამიანი იყო მოვალეობის შემსრულებელი, მაგრამ მისი განცხადების საფუძველზე აღარ შეასრულებს მოვალეობას, _ გვითხრეს სურსათის ეროვნული სააგენტოს პრესსამსახურში.
„გურია ნიუსის“ ინფორმაციით სააგენტოს გურიის ოფისის ხელმძღვანელის პოსტზე ამჟამად ორი კანდიდატურა განიხილება. ჩვენი წყაროს თქმით, ერთ-ერთი, დავით მარტიკოვი გურიის გუბერნატორის მოადგილის სოსო ერქომაიშვილის კადრია. მეორე კი, სურსათის უვნებლობის სააგენტოს ხელმძღვანელის მოადგილის ირაკლი ჩავლეიშვილის დეიდაშვილი ზურაბ ესაძე.
სოსო ერქომაიშვილი ამბობს, რომ მარტიკოვს არ იცნობს:
"რ ვადასტურებ მაგ ინფორმაციას. მარტიკოვს არ ვიცნობ. არც მაგ საკითხში ვარ ჩართული. თუმცა, თუ ვინმეზე მკითხავენ ვინ, რა და როგორ არის, ამას ჩვეულებრივი მოქალაქეობრივი პოზიციიდან და ჩემი თანამდებობიდან გამომდინარე ვუპასუხებ", _ გვითხრა ერქომაიშვილმა და აღნიშნა, რომ სამინისტროდან დასანიშნ კადრზე ჯერ აზრი არ უკითხავთ:
_ ჯერ არ ყოფილა შემთხვევა, რომ ეკითხათ, თუმცა, შესაძლოა ესეც იყო და რაიმე პრობლემაა ამაში?! _ დასძინა ერქომაიშვილმა.
სოფლის მეურნეობის სამინისტროს პრესსამსახურის ხელმძღვანელი ნანიკო ჩინჩილაკაშვილი ამბობს, რომ სააგენტოს გურიის რეგიონული ოფისის ხელმძღვანელის მოვალეობის შემსრულებელი უკვე დანიშნულია:
_ არასწორ ინფორმაციებს გაწვდიან. არც სააგენტოს უფროსის მოადგილის დეიდაშვილი ინიშნება და არც სხვა ვინმეს. მოვალეობის შესრულება დაეკისრა მოქმედ თანამშრომელს _ ლევან კეკელიძეს, _ აღნიშნა „გურია ნიუსთან“ საუბრისას ჩინჩილაკაშვილმა.
