სააკაშვილის გარიგება _ 9 მილიონიანი ქონება ციხისძირში 1 ლარად ვალდებულებების გარეშე

მიღებული პრაქტიკის თანახმად, სახელმწიფო ქონების სიმბოლურ ფასად გასხვისების შემთხვევაში, მყიდველი კომპანია იღებს გარკვეულ საინვესტიციო ვალდებულებას, რომელიც, როგორც წესი, გაცილებით მეტი უნდა იყოს, ვიდრე მიღებული ქონების საბაზრო ღირებულება.

ეკონომიკის სამინისტროდან გამოთხოვილი დოკუმენტაციით ირკვევა, რომ აღნიშნული ქონების სიმბოლურ ფასად მიღების დროს REDMAN FEDERATION INC-ს რაიმე საინვესტიციო ვალდებულება არ აუღია.

აღნიშნული გარიგების შესახებ ორი დოკუმენტია გაფორმებული – პრეზიდენტის განკარგულკება და ნასყიდობის ხელშეკრულება, ორივე დოკუმენტში პრივატიზების ერთადერთ პირობად სიმბოლური თანხის – 1 ლარის გადახდა სახელდება.

აღნიშნული ქონების საბაზრო ღირებულება დაახლოებით 9 მილიონი აშშ დოლარია. შესაბამისად, გამოდის, რომ აჭარის სანაპიროზე, პრესტიჟულ ზონაში მდებარე მიწის ნაკვეთი პრეზიდენტის გადაწყვეტილებით, პრაქტიკულად, გაჩუქებულ იქნა,” _ აღნიშნა “გურია ნიუსთან” საუბრისას კუკულაძემ.

მისივე თქმით,  აღნიშნული გარიგება ეწინააღმდეგება ყველანაირ ეკონომიკურ ლოგიკას:

_ აქ საუბარია არა მხოლოდ დანაკარგზე, რაც სახელმწიფოს შეიძლებოდა აღნიშნული ქონების პრივატიზაციით მიეღო, არამედ აჭარის რეგიონში საინვესტიციო პროცესის შეფერხებაზე – ვინაიდან მყიდველმა ეს ქონება საინვესტიციო პირობის გარეშე მიიღო, მას არ ჰქონია ამ ტერიტორიის განვითარების მოტიცაცია, შესაბამისადმ შავი ზღვის პირას, მაღალი საინვესტიციო პერსპექტივის მქონე აქტივი ეკონომიკური პროცესიდან ამოვარდა.

 აღნიშნული გარიგება და ამ გარიგების მოტივაცია არის ძალიან ბუნდოვანი და აჩენს საფუძვლიან ეჭვს, რომ ადგილი ჰქონდა კორუფციულ გარიგებას”, _ ამბობს კუკულაძე.

კუკულაძისგან გასხვავებით, “მეგობრულ გარიგებას” უწოდებს 9 ჰექტარი მიწის 1 ლარად გადაცემას ჩვენი წყარო, რომელსაც ვინაობის გამხელა არ სურს. მისი თქმით, ზემოთ აღნიშნული უცნობი კომპანიის უკან, შესაძლოა, ბელორუსიის პრეზიდენტი ალექსანდრე ლუკაშენკო იდგეს.

წყარო ამტკიცებს, რომ სააკაშვილმა ლუკაშენკოს ზღვისპირეთის მიწები საჩუქრად გადასცა. წყარო არ გამორიცხავს, რომ მიწების ნაწილის მფლობელი მიხეილ სააკაშვილის მეუღლე, სანდრა რულოვსიც იყოს, რომელთან დაკავშირება ჩვენ ამ დრომდე ვერ შევძელით.

აღსანიშნავია ისიც, რომ როგორც “გურია ნიუსმა” გაარკვია,  redman federation inc-ს  საკუთრების რეგისტრაცია 2011 წლის 5 აგვისტოს საჯარო რეესტრში საჯარო მოხელემ მოახდინა _  საქართველოს ეკონომიკისა და მდგრადი განვითარების სამინისტროს მონიტორინგის დეპარტამენტის  უფროსის იმჟამინდელმა მოადგილე თინათინ ჩაჩანიძემ.

ჩაჩანიძე ახლა სახელმწიფო ქონების ეროვნული სააგენტოს სამართლებრივი უზრუნველყოფის დეპარტამენტის უფროსია.

ჩვენთან საუბრისას ამბობს, რომ კომენტარს ვერ გააკეთებს, რადგან საკითხზე გამოძიებაა დაწყებული:

_ ამ საკითხთან დაკავშირებით მიმდინარეობს გამოძიება მთავარ პროკურატურაში პრივატიზების კანონიერების თაობაზე. მეც ვარ მოწმედ დაკითხული და ჩვენებაზე მაქვს ხელი მოწერილი, რომლის თანახმადაც, ინფორმაცია არ უნდა გავცე გამოძიების ინტერესებიდან გამომდინარე. ხვალაც დაბარებული ვარ. ამიტომ, ამ საკითხზე ვერ დაგელაპარაკებით, სამწუხაროდ.

_ ქალბატონო თინათინ საჯარო მოხელე რა შუაში იყო ამ კომპანიასთან?  რატომ დაურეგისტრირეთ საკუთრება უცნობ კომპანიას?

_ როგორც გითხარით,  მე ვარ მოწმედ დაკითხული ამ საქმეზე და შესაბამისად, არ მაქვს უფლება რაიმე ტიპის კომენტარი გავაკეთო. ამ შემთხვევაში უკვე აღარ წარმოვადგენ უწყებას, არამედ ვარ პიროვნება, რომელიც მოწმედ არის დაკითხული სისხლის სამართლის საქმეზე, _ გვითხრა ჩაჩანიძემ, რომლის ინფორმაციით, ამ საკითხზე გამოძიება 2013 წლიდან მიმდინარეობს.

ამავე თემაზე: სააკაშვილის მიერ 1 ლარად გაყიდული მიწები უცნობ კომპანიას საჯარო მოხელემ დაურეგისტრირა _ ექსკლუზივი;  მოჭრა შეიძლება, გადარგვა არა _ რეპორტაჟი ციხისძირიდან, სადაც ტყეები გაჩეხილია