იანვრის ბოლოს გურიაში მოსულმა უხვმა თოვლმა რეგიონის ყველა მუნიციპალიტეტში დააზარალა მოსახლეობა.
"გურია ნიუსს" დღემდე უკავშირდებიან მოქალაქეები, რომლებიც საცხოვრებელი სახლის გარეშე არიან დარჩენილნი და უმძიმეს პირობებში უწევთ ოჯახებთან ერთად ცხოვრება.
ჩვენ უკვე ვწერდით წყალწმინდაში მცხოვრებ სვეტლანა იმნაძის პრობლემაზე, რომლის სახლს თოვლმა სახურავი დაუზიანა. სვეტლანა იმნაძის პრობლემის გაშუქებისას, დავუკავშირდით ლანჩხუთის მუნიციპალიტეტის გამგეობის პრესასთან და საზოგადოებასთან ურთიერთობის სამსახურსაც, საიდანაც გვაცნობეს, რომ აღნიშნული მოქალაქის პრობლემას იცნობენ, საბუთები თბილისში, ინფრასტრუქტურის და რეგიონალური განვითარების სამინისტროშია გადაგზავნილი და ელოდებიან კომისიის დასკვნას, რომ შეძლონ დაზარალებული ოჯახის დახმარება.
პირველი წერილის გამოქვეყნების შემდეგ სამ კვირაზე მეტი დროა გასული, მაგრამ როგორც აღმოჩნდა, სვეტლანა იმნაძის და მის დღეში მყოფთა დასახმარებლად ჯერაც არავინ მისულა.
დღეს წყალწმინდიდან კიდევ ერთი დაზარალებული დაგვიკავშირდა. როგორც სოფიო სარიშვილი ამბობს, უხვმა თოვლმა მათი საცხოვრებელი სახლის სახურავიც გამოიყვანა მწყობრიდან. ახლა ის და მისი მრავალრიცხოვანი ოჯახი, მცირეწლოვანი ბავშვების ჩათვლით, ხანდაზმული ბებიის ერთოთახიან სამზად სახლში ცხოვრობს. დაზიანებულ სახლში ცხოვრებას, სახურავის ჩამონგრევის შიშით ვერ ბედავენ.
"23 თებერვალს ლანჩხუთში წავედით გამგებელთან შესახვედრად. როგორც ვიცით, მოქალაქეთა მიღების დღე სამშაბათობით აქვს გამგებელს. გამგეობის კანცელარიაში ბუხუტი ბარამიძემ გვითხრა, რომ გამგებლის ნახვას დღეს ვერ შევძლებდით. თურმე ფეხბურთის საყურებლად ყოფილა წასული. ჩვენი დარდი არავის აქვს. მხოლოდ არჩევნებზე ვახსენდებით მთავრობას. არც გამგებლის წარმომადგენელი წყალწმინდაში გურამ ჩუბინიძე დაინტერესებულა ჩვენი პრობლემით. ახლა გვეუბნებიან, რომ სოფლის გამგებელი ავადაა, მაგრამ ჩვენი სახლები თვეზე მეტია დაზიანებულია. მოვიდნენ ლანჩხუთის გამგეობიდან და ცელოფნის "ბრეზენტი" გადააფარეს დაზიანებულ სახურავს. ეს "ბრეზენტი" კი ქარმა ერთ კვირაში დაგლიჯა.სახლი ჩემი მამამთილის თეიმურაზ დობორჯგინიძის სახელზეა რეგისტრირებული, მაგრამ გამგეობაში მე წავედი. ახლა გადაწყვეტილი გვაქვს, თუ ისევ არავინ იკითხავს ჩვენს ამბავს, შევიკრიბოთ წყალწმინდელი დაზარალებულები და რომელიმე ტელევიზიას მოვუყვეთ ჩვენი გასაჭირის შესახებ. ხელისუფლებას არ უყვარს, როცა ტელევიზიით შუქდება მსგავსი ამბები"-ამბობს სოფიო სარიშვილი.
ლანჩხუთის მუნიციპალიტეტის გამგეობის პრესსამსახურში ამბობენ, რომ თავად სოფიო სარიშვილს გამგეობაში განცხადებით არ მიუმართავს.
"23 თებერვალს ფეხბურთი, რომელზედაც ეს ქალბატონი საუბრობს, დაიწყო 14 საათზე, მიღება იყო 12 საათზე, ანუ ჩვეულებრივ ჩატარდა და ქალბატონ სოფიოს რომ მოემართა განცხადებით, ცხადია, უარს არავინ იტყოდა.
ამავეს ამბობს ბუხუტი ბარამიძეც, რომლის განცხადებით, სოფიო სარიშვილის განცხადება გამგეობაში არ შემოსულა. ამას გარდა, ცნობა იმის თაობაზე, რომ წყალწმინდაში სოფიო სარიშვილს დაენგრა სახლი დიდთოვლობის დროს, გამგეობის ინფრასტრუქტურის სამსახურში არ არსებობს. ღრმაღელეში წარმომადგენელის მოვალეობის შემსრულებელის დავით რუსიძის თქმით კი, თუ ვინმეს სახლი დაუზიანდა დიდთოვლობაზე, ყველას ინფორმაცია გადაცემულია როგორც გამგეობაში, ასევე ინფრასტრუქტურის სამინისტროში. სოფიო სარიშვილის სახელზე კი მსგავსი მასალები არ არსებობს, რადგან ვიმეორებ, ამ ქალბატონს განცხადებით არ მოუმართავს ადგილობრივი ხელისუფლებისთვის.
დობორჯგინიძეს რაც შეეხება, მაგ ადამიანის საბუთები გადაცემულია ინფრასტრუქტურის სამინისტროში. საბუთები გადაიგზავნა და იქიდან ველოდებით პასუხს.
სულ 30-მდე სახლი დაზიანდა დიდთოვლობის დროს
ყველა სახლის ფოტო მასალა გადაიგზავნა ინფრასტრუქტურის სამინისტროში და ველოდებით კომისიის დასკვნას"-გვითხრა გამგეობის პრესსამსახურის წარმომადგენელმა ნინო მშვიდობაძემ.
მოკლედ, წყალწმინდელ დაზარალებულებს მხოლოდ ისღა დარჩენიათ, დაელოდნონ ინფრასტრუქტურისა და რეგიონალური განვითარების სამინისტროს კომისიის დასკვნას, რომელიც კაცმა არ იცის, როდის მიაღწევს სოფლამდე.
