რელიგიურ ნიადაგზე დაპირისპირების შემდეგ, ახლა ადიგენში შედარებით სიმშვიდეა, ადგილზე პოლიცია სიტუაციას აკონტროლებს. საქმეზე გამოძიება დევნის მუხლით დაიწყო, თუმცა, რა შედეგი მოჰყვება დაწყებულ გამოძიებას და დაისჯებიან თუ არა ინცინდენტში მონაწილე პირები ჯერჯერობით უცნობია.
დაბა ადიგენში რელიგიურ ნიადაგზე დაპირისპირება 29 თებერვალს მოხდა. ადგილობრივი მუსლიმი თემის განმარტებით, ქრისტიანების ჯგუფი (20-30-მდე ადამიანი) სოფლის ცენტრში მდგარ მუსლიმებს, რომლებიც ადიგენის გამგებელთან და მის მოადგილესთან ერთად სოფელში მუსლიმური საფლავისთვის მიწის გამოყოფის საკითხს იხილავდნენ, თავს დაესხნენ. კოლექტიური თავდასხმის შედეგად სამმა მუსლიმმა ფიზიკური დაზიანება მიიღო, მათ აღენიშნებათ დაზიანებები სახეზე და თავზე, მათ შორის, ერთ-ერთს გატეხილი აქვს თავი.
მათი თქმით, ქრისტიანები სიძულვილის ენას იყენებდნენ მუსლიმების მიმართ და მუქარას და აგრესიას ავლენდნენ.
მუსლიმი თემი ამბობს, რომ პოლიცია ადგილზე ცოტა მოგვიანებით გამოცხადდა, თუმცა, სიტუაციაში ჩარევა, ასევე თავდამსხმელების იდენტიფიცირება და ნაცემი პირების გამოკითხვა არ უცდია.
განსხვავებული პოზიცია აქვთ შინაგან საქმეთა სამინისტროში. უწყებაში აცხადებენ, რომ შსს-მ დროული როგორც რეაგირება მოახდინა და ადიგენში სიტუაცია უკვე განმუხტულია.
შეგახსენებთ, რომ დაბა ადიგენის მუსლიმი თემი სოფელში მუსლიმური საფლავისთვის მიწის ნაკვეთის გამოთხოვას რამდენიმე თვეა ითხოვს, რადგან მათ საკუთარი მიცვალებულის დაკრძალვა 3 კმ.-ზე მდებარე სოფელ ზანავში უწევთ. ქრისტიანულ სასაფლაოზე მუსლიმის დაკრძალვა კი რელიგიური წესების დარღვევაა. ამ მოთხოვნაზე დადებითი რეკომენდაცია გასცა რელიგიის საკითხთა სახელმწიფო სააგენტომ. სიტუაციის ესკალაცია სწორედ ამ ფაქტის გასაჯაროებას მოჰყვა.
"სამხრეთის კარიბჭეს" გავრცელებული ინფორმაციით, დაპირისპირება გასული წლის გაზაფხულიდან დაიწყო, როდესაც ადიგენის მცხოვრები რევაზ მიქელაძე გარდაიცვალა. მიქელაძე ადიგენის ქრისტიანულ სასაფლაოზე არ დაკრძალეს და მეზობელ სოფელში დაასაფლავეს.
მუსლიმები ამბობენ, რომ მათ სურთ, ცალკე სასაფლაო ჰქონდეთ, ხოლო ქრისტინები მიიჩნევენ, რომ სასაფლაოსთვის ტერიტორიის გადაცემის შემდეგ მუსლიმები მეჩეთს ააშენებენ, რაც მათთვის მიუღებელია.
ცნობისთვის, ბოლო ორი წლის განმავლობაში ადიგენის მუნიციპალიტეტში უკვე სამი რელიგიური დაპირისპირება მოხდა.
დღესვე, ორივე აღმსარებლობის სასულიერო პირების შეხვედრაც გაიმართა. თუმცა, მხარეების განცხადებით, მათ ვერ შეძლეს შეთანხმება სასაფლაოსთან დაკავშირებით, მაგრამ თანხმდებიან, რომ სოფელში სიმშვიდის შენარჩუნებაზე ორივე მხარე პასუხისმგებელი იქნება.
მუსლიმი თემის წარმომადგენლები აცხადებენ, რომ არცერთ რელიგიურ წიგნში არ წერია, რომ მუსლიმის და ქრისტიანის საფლავი ერთად შეიძლება იყოს.
თუმცა, ქრისტიანული აღმსარებლობის წარმომადგენლები, რომლებიც დღეს შეხვედრას ესწრებოდნენ, აღნიშნავენ, რომ მათ საერთო საფლავის საწინააღმდეგო არაფერი აქვთ.
"აქამდეც ჩვენთან ერთად ასაფლავებდნენ და კარგად იყვნენ. ერთი სასაფლაო გვაქვს და გვგონია, რომ აქ ქრისტიანიც დაეტევა და მუსლიმანიც", _ ამბობენ ისინი.
ადგილობრივმა ხელისუფლებამ უკვე მიიღო გადაწყვეტილება და გამოყოფილია მიწა ახალი სასაფლაოსთვის, თუმცა მოსახლეობის ის ნაწილი, რომელიც ქრისტიანულ თემს მიეკუთვნება, ამ გადაწყვეტილებას ეწინააღმდეგება.
არასამთავრობო ორგანიზაცია "ადამიანის უფლებების სწავლებისა და მონიტორინგის ცენტრის" შეფასებით, "მუნიციპალიტეტში ადგილობრივ ქრისტიანი სასულიერო პირების გავლენა განსაკუთრებით მაღალია. ადგილობრივი პოლიცია კი რეპრესიული და დისკრიმინაციული მუსლიმი თემის მიმართ".
ორგანიზაციის წარმომადგენლები და იურისტები მომხდარს უკვე სწავლობენ.
ინცინდენტის შესწავლა დაიწყო სახალხო დამცველის აპარატმაც. უჩა ნანუაშვილი მხარეებს შეთანხმებისა და სიმშვიდისკენ მოუწოდებს.
რაც შეეხება პოლიტიკურ შეფასებებს, მმართველ გუნდში აცხადებენ, რომ რელიგიური დაპირისპირება ადგილზე არ ხდება და სხვადასხვა რელიგიის წარმომადგენლები შეხვედრაზე შემთხვევით მოხვდნენ.
"რელიგიური დაპირისპირება საქართველოში საუკუნეების მანძილზე არ ყოფილა. ადამიანები როცა საკუთრების საკითხზე უპირისპირდებიან ერთმანეთს, შესაძლებელია, დაპირისპირებულ მხარეებს შორის რელიგიური ჯგუფებიც აღმოჩნდეს; ან თუნდაც ეროვნებით განსხვავებული ადამიანები. ვიმედოვნებ, სამართალდამცველები ყველაფერს გაარკვევენ," _ აცხადებს "ქართული ოცნების" ერთ-ერთი ლიდერი გია ვოლსკი.
თუმცა, "ნაციონალური მოძრაობა" ხელისუფლებას არასაკმარის რეაგირებაში ადანაშაულებს სხვა შემთხვევებთან დაკავშირებით, რამაც, მათი თქმით, უკვე გუშინდელი ძალადობა გამოიწვია.
"ნაციონალური მოძრაობის" წევრი, ზურაბ ჩილინგარაშვილი მოსახლეობას მოუწოდებს სიმშვიდისკენ და სთხოვს, პროვოკაციას არ აყვნენ.
"ეს გამოწვეულია იმით, რომ სამი წლის წინ ცნობილი მინარეთის ინცინდენტის საქმეზე არცერთი პირი არ დასჯილა. არაფერი გამოუძიებიათ. ეს ყველაფერი ამ ამბების გამოძახილია", _ ამბობს ჩილინგარაშვილი.
