საქართველოს საკონსტიტუციო სასამართლოს თავმჯდომარის, გიორგი პაპუაშვილის წინააღმდეგ სასამართლოში, შესაძლოა ახალი, სარჩელი შევიდეს.
საქმე ისაა, რომ ორგანიზაცია "ახალგაზრდა ადვოკატები" მოქალაქე როლანდ ბლადაძის უდანაშაულობის პრეზუმციის დარღვევისთვის, ასევე, მათი საქმიანი რეპუტაციის შელახვის გამო, პაპუაშვილს უჩივიან.
როგორც დღეს ორგანიზაციის ხელმძღვანელმა არჩილ კაიკაციშვილმა მედია-ფორუმზე განაცხადა, პაპუაშვილის მხრიდან, ორგანიზაციის დაცვის ქვეშ მყოფის, როლანდ ბლადაძის მიმართ დაუსაბუთებელი და უსამართლო ბრალდებები გაჭღერდა.
თუმცა, საკონსტიტუციო სასამართლოს პრესსამსახურში აცხადებენ, რომ გიორგი პაპუაშვილის მხრიდან სატელევიზო ეთერში როლანდ ბლადაძის მიმართ არანაირი დაუსაბუთებელი ბრალდება არ გაჟღერებულა.
ასევე, "ახალგაზრდა ადვოკატები" პაპუაშვილის მიერ გაკეთებულ განცხადებასაც აპროტესტებენ, რომლის მიხედვითაც, თითქოს, ისინი ხელისუფლებიდან დაფინანსებას იღებენ.
ორგანიზაციის ხელმძღვანელი აღნიშნავს, რომ თუ გიორგი პაპუაშვილი შესაბამის მტკიცებულებებს არ წარმოადგენს, გამორიცხული არ არის, მის მიმართ ახალი სარჩელი მომზადდეს.
ასევე, ორგანიზაცია წერილით მიმართავს გიორგი პაპუაშვილს, უარყოს ან დაადასტუროს ის ბრალდებები, რომელიც 2016 წლის 1 მარტს, გადაცემა "მაესტროს ფაქტორში" სატელევიზიო ინტერვიუს დროს, როლანდ ბლადაძის მიმართ გამოთქვა.
"არსებული მოვლენების საფუძვლიანი ანალიზი მაფიქრებინებს, რომ გიორგი პაპუაშვილი, საკონსტიტუციო სასამართლოს თავმჯდომარის უფლებამოსილების ამოწურვის შემდგომ, რაც 2016 წლის ივნისში მოხდება, აქტიურად აპირებს პოლიტიკურ ცხოვრებაში გადასვლას. ჩემი ინფორმაციით, პოლიტიკური გაერთიანება "ერთიანი ნაციონალური მოძრაობა" 2016 წლის საპარლამენტო არჩევნებისთვის, გიორგი პაპუაშვილის პარტიული სიის #1 კანდიდატად დასახელებაზე კულუარულად მსჯელობს. ჩემთვის მნიშვნელობა აქვს სადაო ქონებასთან დაკავშირებულ საკითხებს და არა ბატონი გიორგი პაპუაშვილის პოლიტიკურ სიმპატიებს, მაგრამ მინდა მასაც ვთხოვო, რომ ევროსასამართლოში მოსამართლის შესარჩევ კონკურსში დამარცხების გამო, ნუ გააკეთებს პოლიტიკური ხასიათის შეფასებებს, იმსჯელოს საგნობრივად და ამით ჩიხში არ შეიყვანოს საკონსტიტუციო სასამართლოს დამოუკიდებლობისა და მიუკერძოებლობის საკითხი", _ განაცხადა "ახალგაზრდა ადვოკატების" ხელმძღვანელმა არჩილ კაიკაციშვილმა.
დღეს, მედია-ფორუმზე კაიკაციშვილმა განმარტა, რის გამო ვერ მოხვდა პაპუაშვილი ევროსასამართლოს მოსამართლეობის მსურველთა ხუთეულში.
კაიკაციშვილმა საკითხის მიმართ მაღალი საჯარო ინტერესის გამო, იმ სადაო ბინაზეც ისაუბრა, სადაც პაპუაშვილი დღემდე ცხოვრობს და აღნიშნა, რომ პაპუაშვილის მხრიდან ადგილი აქვს საზოგადოების მიზანმიმართულ შეცდომაში შეყვანას.
ცნობისთვის, "ახალგაზრდა ადვოკატები" გიორგი პაპუაშვილის წინააღმდეგ უკვე რამდენიმე წელია სასამართლო დავას აწარმოებენ და აცხადებენ, რომ პაპუაშვილი უკანონოდ ქონებაჩამორთმეული როლანდ ბლადაძის ბინაში ცხოვრობს.
არჩილ კაიკაციშვილის განცხადებით, სამწუხარო რეალობაა, მაგრამ ფაქტია, რომ საქართველოს საკონსტიტუციო სასამართლოს თავმჯდომარე გიორგი პაპუაშვილი დღეს კანონთან კონფლიქტში მყოფ პიროვნებას წარმოადგენს.
კაიკაციშვილი გიორგი პაპუაშვილის მიერ 2016 წლის 1 მარტს, გადაცემა "მაესტროს ფაქტორში" გაკეთებულ განცხადებებსაც გამოეხმაურა და აღნიშნა, რომ გიორგი პაპუაშვილი საკუთარი სამართლებრივი პასუხისმგებლობის დაფარვას პოლიტიკური ხასიათის განცხადებებიც ცდილობს.
მისივე თქმით, სახიფათოა, როდესაც საქართველოს საკონსტიტუციო სასამართლოს თავმჯდომარე ევროსასამართლოში წარდგენასთან დაკავშირებულ კონკურსში მარცხის შემდგომ აკეთებს პოლიტიკური ხასიათის განცხადებებს, რითაც ნებსით თუ უნებლიეთ, სასამართლო ხელისუფლების უმნიშვნელოვანესი რგოლი – საკონსტიტუციო სასამართლო პოლიტიკურად მხარე ხდება.
"ჩვენს გაოგნებას იწვევს გიორგი პაპუაშვილის განცხადებები, რომლითაც ღიად და საჯაროდ, პატივი და ღირსება შეულახა სადაო ქონების პირველ და ერთადერთ კანონიერ მესაკუთრეს – როლანდ ბლადაძეს. გიორგი პაპუაშვილმა აღნიშნა, რომ თითქოსდა როლანდ ბლადაძე სასაზღვრო გამშვებ პუნქტზე საქმიანობის დროს, დანაშაულებრივ ქმედებებში მონაწილეობდა და ამის გამო, სადაო ქონება, დაუსაბუთებლად შეიძინა. ასევე, ბატონმა პაპუაშვილმა აღნიშნა, რომ თითქოსდა როლანდ ბლადაძის წრიდან მის მიმართ არსებობდა მუქარა. ასევე, ჩვენი ორგანიზაციის მიმართ გააკეთა განცხადება, რომ თითქოსდა საკონსტიტუციო სასამართლოს თავმჯდომარის მიმართ, ვაწარმოებთ მიზანმიმართულ კამპანიას და ჩვენ ფინანსურ დახმარებას ხელისუფლება უზრუნველყოფს.
არც ერთი აღნიშნული განცხადება, სერიოზული და ფაქტებზე დაფუძნებული არ არის. შესაბამისად, წარმოადგენს ცილისწამებას. პირველი – როლანდ ბლადაძე 2013 წლის აპრილში, აჭარის ა/რ-ის პროკურატურამ უდანაშაულოდ სცნო წარდგენილ ბრალდებაში. შესაბამისად, დანაშაული, რის გამოც ქონება ჩამოერთვა და შემდეგ გიორგი პაპუაშვილმა, 2007 წელს, სიმბოლურ ფასად – 1000 ლარად მიიღი, არც არასდროს ჩადენილა და არც არსებულა. ამიტომაც, გიორგი პაპუაშვილმა, თავისი საჯარო განცხადებით, უდანაშაულობის პრეზუმცია პირდაპირ ფეხქვეშ გათელა.
მეორე – მე მივმართავ გიორგი პაპუაშვილს, რათა დაასახელოს ის ადამიანები, რომლებიც მას, როლანდ ბლადაძის სახელით მუქარას უთვლიდნენ. ასეთი ფაქტი, ბუნებაში არ არსებობს, რადგანაც როლანდ ბლადაძის 12-წლიანი ბრძოლა წართმეული ქონების დაბრუნებისთვის, არცერთხელ არ გასულა კანონის ჩარჩოდან და მესამე – თუკი გიორგი პაპუაშვილი საზოგადოებას არ წარუდგენს ორგანიზაცია "ახალგაზრდა ადვოკატების" ხელისუფლებიდან დაფინანსების დამადასტურებელ დოკუმენტს, ჩვენ მივმართავთ სასამართლოს საქმიანი რეპუტაციის შელახვის გამო" , _ განაცხადა არჩილ კაიკაციშვილმა.
კაიკაციშვილი გიორგი პაპუაშვილის იმ განცხადებასაც გამოეხმაურა, რომლის მიხედვითაც, თითქოსდა, 2012 წლის შემდგომ, ხელისუფლებამ მას უპასუხა, რომ სადაო ქონებაზე სახელმწიფოს პრეტენზიები არ გააჩნდა. არჩილ კაიკაციშვილის განცხადებით, მართალია, გიორგი პაპუაშვილმა 2012 წლის დეკემბერში მიმართა იუსტიციის მინისტრს და მოითხოვა სადაო ქონებაზე სახელმწიფოს პოზიცია, თუმცა იცრუა, როდესაც აღნიშნა, რომ მინისტრმა თეა წულუკიანმა მას ქონების უნაკლოობა დაუდასტურა.
საქმეში დევს საქართველოს იუსტიციის მინისტრის თეა წულუკიანის 2013 წლის 17 თებერვლის წერილი გიორგი პაპუაშვილის მიმართ, სადაც ცალსახად აღნიშნულია, რომ ქონება სადაოა, რაც გიორგი პაპუაშვილს არ გაუთვალისწინებია.
არჩილ კაიკაციშვილმა განცხადა, რომ მზად არის, საქმეში არსებული ყველა მტკიცებულება საჯარო გახადოს და მათ შორის, მზად არის საჯარო დებატებში მიიღოს მონაწილეობა გიორგი პაპუაშვილთან ერთად.
არასამთავრობო ორგანიზაციის ბრალდებებთან დაკავშირებით "გურია ნიუსი" საკონსტიტუციო სასამართლოს პრესსამსახურს დაუკავშირდა, სადაც აღნიშნავენ, რომ გიორგი პაპუაშვილის მხრიდან სატელევიზიო ეთერში როლანდ ბლადაძის მიმართ არანაირი დაუსაბუთებელი ბრალდება არ გაჟღერებულა.
"გიორგი პაპუაშვილმა ისაუბრა იმ გარემოებებზე, რის გამოც მან ეს ქონება მიიღო. მისი მხრიდან არანაირ უსაფუძვლო ბრალდებას ადგილი არ ჰქონია", _ აღნიშნეს პრესსამსახურში.
დამატებით კითხვებზე კი განგვიცხადეს, რომ სასამართლოს პრესსამსახურს წერილობით მივმართოთ.
რაც შეეხება სადაო ქონების საქმეს, როგორც კაიკაციშვილმა აღნიშნა, თბილისის საქალაქო სასამართლო ახლა განსჯადობის საკითხზე მსჯელობს.
მისი განმარტებით, მიმდინარე თვის ბოლოს გაირკვევა, საქმეს სამოქალაქო კოლეგია განიხილავს თუ ადმინისტრაციული.
კაიკაციშვილმა ისიც აღნიშნა, რომ ახლაგდამოვლენილი გარემოებების გამო, შესაძლოა, საქმის წარმოების დაწყების შემდეგ, ყოფილი თანამდებობის პირებიც დაიკითხონ.
"მაგალითად, შესაძლოა, დაიკითხოს ელენე თევდორაძე, რომელმაც განაცხადა, რომ მან გიორგი პაპუაშვილი ბლადაძის ბინაში შესვლამდე გააფრთხილა, ქონება სადაო რომ იყო. თუმცა ამას პაპუაშვილი უარყოფს და ამბობს, რომ სადაო ქონების შესახებ ინფორმაცია არ ჰქონდა", _ აღნიშნა კაიკაციშვილმა და დასძინა, რომ სასამართლო პროცესები სავარაუდოდ, 2016 წლის აპრილიდან დაიწყება.
ამავე თემაზე:
გიორგი პაპუაშვილის ქონება დააყადაღეს
"ახალგაზრდა ადვოკატები" პარლამენტს გიორგი პაპუაშვილის იმპიჩმენტის საკითხის განხილვისთვის მიმართავს
პროკურატურაში, საკონსტიტუციო სასამართლოს თავმჯდომარის ქმედებაზე, გამოძიება მიმდინარეობს
"პროკურატურის ახალი დეპარტამენტი სამართლიანობის აღდგენას დააჩქარებს"
ვენეციის კომისია "ახალგაზრდა ადვოკატების" კვლევას ეხმაურება
"ამ ადამიანებმა უნდა უჩივლონ სახელმწიფოს და არა გიორგი პაპუაშვილს"
"ახალგაზრდა ადვოკატების" მიმართვა პრეზიდენტ მარგველაშვილს
ევროპარლამენტი უკანონოდ ქონებაჩამორთმეულის სახლში, გიორგი პაპუაშვილის ცხოვრებას ეხმაურება
"ეკონომიკის სამინისტრო უფრო ახლოს დგას გიორგი პაპუაშვილთან, ვიდრე სამართლიანობის აღდგენის პროცესთან"
როდის ეწურება უფლებამოსილების ვადა საკონსტიტუციო სასამართლოს თავმჯდომარეს
