"ნაციონალური მოძრაობის" მიერ ორგანიზებული საპროტესტო აქცია "არა გაზპრომს" დაახლოებით ერთ საათს გაგრძელდა.
აქციის მონაწილეები შეკრებილები იყვნენ რუსეთის ფედერაციის ყოფილი საელჩოდან მთავრობის ადმინისტრაციამდე და ე.წ. ცოცხალი ჯაჭვი ჰქონდათ შეკრული.
აქციის ორგანიზატორები ასევე აპირებენ შეაგროვონ ხელმოწერები, რის შემდეგაც ხელმოწერილ პეტიციას მთავრობის ადმინისტაციაში ჩააბარებენ. პეტიციის მთავარი მოთხოვნაა "არა გაზპრომს!"
აქციამდე რამოდენიმე დღით ადრე საქართველოს ენერგეტიკის მინისტრმა კახა კალაძემ განაცხადა. რომ საქართველო აზერბაიჯანიდან დამატებით 500 მილიონ კუბურ მეტრ ბუნებრივ აირს მიიღებს.
"მოგეხსენებათ საქართველოში გაზის გაზრდილი მოხმარების გამო დღის წესრიგში დადგა დამატებითი მოცულობების მოძიების საკითხი. რამდენიმე შეხვედრის და პროდუქტიული მუშობის შედეგად ჩვენმა პარტნიორმა აზერბაიჯანის მთავრობამ და კომპანია სოკარის ხელმძღვანელობამ მიიღო გადაწყვეტილება ეს დამატება შახ –დენიზის მილსადენიდან განხორციელდეს.
ჩვენს ქვეყანას შესაძლებლობა ექნება მომავალი წლის განმავლობაში დამატებით 500 მილიონი კუბური მეტრი გაზი მიიღოს აზერბაიჯანიდან. უაღრესად მნიშვნელოვანი და ხაზგასმით აღსანიშნავია – აზერბაიჯანის მხარემ ყველაფერი გააკეთა იმისთვის, რომ ტექნიკური შეზღუდვის გამო წარმოშობილი პრობლემა აღმოეფხვრა და მათი მხრიდან შესაძლებელი გახდა დამატება სამხრეთ კავკასიური , იგივე შაჰ–დენიზის მილსადენის საშუალებით."-განაცხადა კალაძემ.
ამ განცხადების შემდეგ საზოგადოებაში გაჩნდა აზრი, რომ "ნაციონალური მოძრაობის" მიერ 6 მარტს დაანონსებული აქციის -"არა გაზპრომს!" -გამართვა აზრს დაკარგავდა.
"მთავარმა ოპოზიციურმა ძალამ" უკან აღარ დაიხია და კალაძის ამ განცხადების მიუხედავად, აქცია მაინც ჩაატარა.
"ნაციონალური მოძრაობის" ერთ-ერთმა ლიდერმა დავით ბაქრაძემ აქცია შეაფასა, როგორც საზოგადოების გამარჯვება მთავრობაზე.
"ჯერ მოვისმინეთ, რომ აზერბაიჯანს არ შეუძლია დამატებითი გაზის მოცემა, შემდეგ მოვისმინეთ, რომ ამას გაზსადენის სიმძლავრე არ ყოფნის, შემდეგ გვითხრეს, რომ თუ ჩვენ "გაზპრომს" არ შემოვიყვანთ, მაშინ რუსეთი ირანიდან მოამარაგებს სომხეთს და დავიღუპებით, შემდეგ გვითხრეს, რომ მსოფლიო სავაჭრო ორგანიზაციის წესებით, აუცილებლად მონეტიზაცია უნდა მოხდეს. მთელი 6 თვე ჩვენ გვასმენინებდნენ ტყუილებს და ხელისუფლება ცდილობდა "გაზპრომის" შემოყვანას. ეს იყო პირველი სერიოზული გამარჯვება საზოგადოების, მაგრამ ეს გამარჯვება უნდა მივიყვანოთ ბოლომდე. დღევანდელი აქციის გზავნილი იყო ის, რომ "ნაციონალური მოძრაობა" ქართულ საზოგადოებასთან ერთად არ დავუშვებთ, ქვეყანა დაბრუნდეს რუსულ წყვდიაში"-განაცხადა ბაქრაძემ.
საქართველო ბუნებრივი აირის ტრანზიტისთვის "გაზპრომიდან" გატარებული გაზის 10% იღებს.
ენერგეტიკის მინისტრის ინფორმაციით, მთავრობა მოლაპარაკებებს კომპანია "გაზპრომთან" კვლავ აგრძელებს. კალაძის განმარტებით, ამ მოლაპარაკების მთავარი მიზანია შეინარჩუნონ არსებული სტატუს-ქვო.
