რამდენიმე დღის წინ, ჩოხატაურის მუნიციპალიტეტის ფარცხმის თემის მოსახლეობამ აქცია გამართა. აქციის მონაწილეთა მთავარი მოთხოვნა სოფლის გაზიფიცირების დასრულება იყო. აქციას მუნიციპალიტეტის გამგებელი ირაკლი კუჭავა, ფარცხმის მაჟორიტარი დეპუტატი მალხაზ ჩხიკვაძე და სოფლის წარმომადგენლები ესწრებოდნენ.
მუნიციპალიტეტის გამგებელმა ირაკლი კუჭავამ აქციის მონაწილეებს ის პროექტები შეახსენა, რომლებიც 2012 წლის შემდეგ ფარცხმის თემში გახორციელდა და მოსახლეობას მიმართა: "რაც შეეხება გაზიფიცირებას, თქვენ აგაღელვათ ალბათ, ახალმა პროექტმა, რომლის მიხედვით, მთავრობამ გადაწყვიტა, გამოყოს 2 000 0000 ლარი, სამოცამდე სოფელში გაზის შესაყვანად, ჩამონათვალში კი თქვენი სოფელი ვერ ნახეთ. ჩვენი მიდგომა ასეთია _ სანამ დაიწყება ახალი სოფლის გაზიფიცირება, უნდა დასრულდეს სამუშაოები ნახევრადგაზიფიცირებულ სოფლებში", _ თქვა ირაკლი კუჭავამ.
შეკრებილები სოფლის მაჟორიტარ დეპუტატს მალხაზ ჩხიკვაძეს "სოკარის" ხელმძღვანელ პირებთან შეხვედრას სთხოვდნენ:
"ბატონო მალხაზ, თქვენგან, როგორც სოფლის დეპუტატისგან, მოვითხოვთ, გამონახოთ გზები და შეგვახვედროთ "სოკარის" ხელმძღვანელებს, კერძოდ, მას, ვისაც კონკრეტული საქმე ევალება, თორემ თუ საჭირო გახდა, გზასაც გადავკეტავთ", _ ამბობენ აქციის მონაწილეები.
მალხაზ ჩხიკვაძემ მოსახლეობას ასეთი პასუხი გასცა: "ზემო ფარცხმაში 2015 წლამდე მხოლოდ 40-მდე ოჯახი იყო გაზიფიცირებული, დაახლოებით 80 ოჯახი _ შუა ფარცხმაში. გასულ წელს ზემო ფარცხმაში მოხდა ქვედა მხარის გაზიფიცირება. ეს, ერთი მხრივ, სოფლისთვის წინსვლაა. "სოკარს" ჩვენს სოფლებზე პროექტი გაკეთებული აქვს. მათი გეგმა გრაფიკში შეიძლება ჩაჯდეს წელს, ან გაისად. ვცდილობთ, რაღაც ზემოქმედების მექანიზმი მოვნახოთ. გზის გადაკეტვით პრობლემა არ მოგვარდება".
ფარცხმის მოსახლეობა წყლისა და გზის პრობლემის მოგვარებასაც ითხოვს, რაზეც მუნიციპალიტეტის გამგებელი პასუხობს, რომ უმჯობესია, გზა დაიგოს უბან-უბან, ვიდრე მოიხრეშოს ერთდროულად და შემდეგ წვიმის დროს ისევ დაზიანდეს.
შუა ფარცხმელები მადლობას იხდიან სოფლის სასაფლაოს შეღობვისთვის, თუმცა, სხვა პრობლემების მოგვარებასაც ითხოვენ:
"კარგია, რომ გაითვალისწინეს ჩვენი თხოვნა და სასაფლაო შეგვიღობეს. ახლა სხვა პრობლემებთან ერთად, გარე განათების პრობლემა გვაქვს. მართალია, ზოგან დგას საქუჩო განათების ბოძები, მაგრამ ეს საკმარისი არაა. ვითხოვთ, წყლის მრიცხველების დაყენებას; აგრეთვე, გვინდა აღდგეს შუა ფარცხმის ტყე-პარკი და მას ძველი ფუნქცია დაუბრუნდეს", _ თქვა აზა შანიძემ.
საბოლოოდ, აქციის მონაწილეები, მუნიციპალიტეტის გამგებელი და სოფლის მაჟორიტარი დეპუტატი შეთანხმდნენ, რომ სოფლის გაზიფიცირების პრობლემასთან დაკავშირებით მაქსიმალურად მიაწოდებენ ინფორმაციას ყველა დაინტერესებულ მხარეს, როგორც სს "სოკარს", ასევე, სხვა სახელმწიფო სტრუქტურებს, რომ მაქსიმალურად დაჩქარდეს სოფლის გაზიფიცირება.
