ქუთაისში, ორი დღის განმავლობაში, ადგილობრივი გაზეთ “P.S.”-ის ჟურნალისტს ირაკლი ვაჩიბერაძეს ცენტრალური თუ ადგილობრივი ხელისუფლების წარმომედგენლები და სამართალდამცავები სასტიკად უსწორდებოდნენ.”გურია ნიუსთან” საუბრისას ირაკლი ვაჩიბერაძე ცემის ფაქტის თვითმხილველებს შორის ასახელებს ქუთაისის მერიის მედიასთან და საზოგადოებასთან ურთიერთობის სამსახურის უფროსს, ქეთი დეისაძეს. ვაჩიბერაძის განცხადებით, ქეთი დეისაძე მის ცემას ბოძს ამოფარებული უყურებდა და არაერთგზის თხოვნის მიუხედავად, ძალადობის ფაქტზე არანაირი რეაგირება არ მოუხდენია.
“გურია ნიუსი” ქეთი დეისაძეს დაუკავშირდა.
_ ქალბატონო ქეთი, ჟურნალისტი ირაკლი ვაჩიბერაძე ამბობს, რომ მისი ცემის ფაქტის თვითმხილველი ხართ. ის შველას გთხოვდათ, თქვენ კი არ დაეხმარეთ.
_ შემიძლია გითხრათ, რომ ჟურნალისტის ცემის არანაირ ფაქტს არ შევსწრებივარ. თვითონ დამირეკა დაახლოებით ორი საათის წინ და მასაც იგივე ვუთხარი, რომ არ დამინახავს, თუ ვინმემ ცემა ან ვინმემ რამე წაართვა. არც ის გამიგონია, რომ მეძახოდა. დღეს ირაკლი ვაჩიბერაძე საერთოდ არ დამინახავს. რა გავაკეთო, როცა ასე ხელაღებით ამბობს, რომ ქეთი დეისაძე მიუყურებდა, შველას ვთხოვდი და არ დამეხმარაო?! სატელეფონო საუბარში მასაც იგივე უთხარი, არ დამინახიხარ და არ შევსწრებივარ ამ ყველაფერს,-მეთქი.
_ როგორც ჟურნალისტი ამბობს, ამ ფაქტს რამდენიმე მედიასაშუალების წარმომადგენელი შეესწრო, მათ შორის ქრისტინე ქარჩხაძე…
დეისაძემ კითხვა არ დამამთავრებინა: _ ქრისტინე ქარჩხაძე ამბობს, რომ იქ იყო ქეთი დეისაძეო?! არ ყოფილა ასეთი რამე ბუნებაში და მაშინ ინგლისის დედოფლობაც შეიძლება დამაბრალოთ.
_ მე არ მითქვამს, რომ ქარჩხაძემ თქვა, დეისაძე იქ იმყოფებოდაო…
_ აბა რას ადასტურებენ?! ჩემს წინ არც ერთი ჟურნალისტი არ უცემიათ არც ახლა და არც… 20 წელია ჟურნალისტი ვარ.
_ ვაჩიბერაძე საუბრობს, აგრეთვე იმაზე, რომ რეგიონულ მედიას, განსაკუთრებით კი ბეჭდურ მედიას უჭირს სახელისუფლებო შეხვედრებზე მოხევდრა და მათ იქ არ უშვებენ.
_ ქუთაისის მერიის ეგიდით თუ რამე ღონისძიება ტარდება, აბსოლუტურად ყველა მედია საშუალება არის მოწვეული და ყველგან არიან წარმოდგენილები, მოსაწვევები აქვს ყველა საინფორმაციო საშუალებას. არც ერთი შეხვედრა, ეს იქნება საერთაშორისო წარმომადგენლობა, პრეზიდენტი, ადმინისტრაცია, პარლამენტის თავმჯდომარე იქნება, ვერ იტყვის ვერც ერთი ჟურნალისტი, რომ სადმე წარმოდგენილები არ არიან. ქუთაისში თუ რამე საჯარო შეხვედრა ტარდება, აბსოლუტურად ყველა მედია საშუალებაა წარმოდგენილი.
_ ვანო მერაბიშვილის შეხვედრა მოსახლეობასთან დახურული იყო?
_ ვერ გეტყვით. მე არ ვიყავი შეხვედრაზე.
_ ე.ი. თქვენ, ქუთაისის მერიის მედიასთან და საზოგადოებასთან ურთუიერთობის სამსახურის უფროსმა, არ იცით შეხვედრა დახურული ფორმატის იყო თუ საჯარო?
_ არ ვიცი. ეს არ იყო პრესისთვის. ის რაც არ არის პრესისთვის, შესაძლებელია პრესსამსახურისთვისაც იყოს უცნობი. ეს არ იყო მერიის ორგანიზებული და საერთოდ არ ვიცი, რა შეხვედრაზე მელაპარაკებით. არც ცემის ფაქტს შევსწრებივარ. პატივს გცემთ იმიტომ, რომ კოლეგიალურობას ვითვალისწინებ.
_ როგორც მედიასთან და საზოგადოებასთან ურთიერთობის სამსახურის უფროსი, რა შეფასებას მისცემთ ჟურნალისტის ცემის ფაქტს, რომელსაც ადგილი ჰქონდა ქუთაისში?
_ ამაზე ინფორმაცია არ მაქვს, მაგრამ სასურველია ჟურნალისტებს მსგავსი პრობლემები არ ჰქონდეთ. ფაქტზე, რომელზეც არ მაქვს ინფორმაცია, შეფასებას ვერ გავაკეთებ.
ქრისტინე ქარჩხაძე, “ახალი გაზეთის” ჟურნალისტი:
_ ირაკლი ვაჩიბერაძის ცემის ფაქტთან დაკავშირებით გირეკავთ. როგორც გავიგეთ, თქვენ ამ ფაქტის თვითმხილველი ხართ.
_ რომელ ფაქტთან დაკავშირებით? რომელიც გუშინ მოხდა თუ დღეს?1
_ ორივე ფაქტთან დაკავშირებით.
_ გუშინ, ქუთაისობა აღინიშნებოდა ქალაქში. ძალიან ბევრი ღონისძიება იყო დაგეგემილი. ერთ-ერთი იყო, რებიტილირებული ლადო მესხიშვილის სახელობის თეატრის გახსნა, რომელიც პრეზიდენტს უნდა გაეხსნა. თითქმის ყველა მედია შაუალება ელოდებოდა გახსნის ცერემონიალის დაწყებას. დიდი ხანი მოგვიხდა ლოდინი. აღმოჩნდა, რომ რეგიონული მედიასაშუალებები შიგნით ვერ შევიდოდით და ვერ გავაშუქებდით ამ ფაქტს. ჩვენთან ერთად “მაესტროც” ვერ შევიდა, მხოლოდ ცენტრალური ტელეკომპანიები შევიდნენ. მოხდა ისე, რომ ირაკლი ვაჩიბერაძემ მოახერხა თეტრის შენობის შიგნით შეღწევა. მოსაწვევებით უშვებდნენ მოქალაქეებს, რომლებიც ნაციონალური მოძრაობის ახალგაზრდული ფრთის წარმომადგენელები, აკაკი წერეთლის სახელობის უნივერსიტეტის სტუდენტური თვითმმართველობის წევრები და ის მასწავლებელები იყვნენ, ვისაც დირექტორებმა დაავალეს, იქ მისულიყვნენ. მოგვიანებით ვაჩიბერაძემ დაინახა, რომ დაცვამ გაჩერა ვიღაც ქალი, რომელსაც მოსაწვევისთვის ქსეროასლი ჰქონდა გადაღებული და ისე აპირებდა შესვლას. ამის გადაღება რომ დაიწყო, დაცვამ შეამჩნია, წაართვეს კამერა და უთხრეს, შენნაირი ტიპები არიან, რომ იღებენ და შემდეგ ტვირთავენ და ტვირთავენ იუთუბზეო. კისერში წაავლეს ხელი და გარეთ გამოათრიეს.
_ თქვენ ფაქტის თვითმხილველი ხართ?
_ მე ამ ფაქტის არ შევსწრებივარ. დღეს დახურული ფორმატის შეხვედრა იყო, სადაც იყვნენ ნაციონალური მოძრაობის აქტივისტები. ამ შეხვედრას უძღვებოდნენ ვანო მერაბიშვილი და მიხეილ მაჭავარიანი. ირაკლიმ აქაც მოახერხა შესვლა, რადგან ნაციონალი ეგონათ, მაგრამ როგორც კი დიწყო იქ ჩანიშვნების გაკეთება, მიხვდნენ, რომ არ იყო ნაციონალების წევრი და იყო ჟურნალისტი. ამის შემდეგ გამოიყვანეს გარეთ. როგორც ამბობს, წიხლებს თავში ურტყამდნენ.
_ ქრისტინე, თქვენ ირაკლის ცემას უშუალოდ შეესწარით?
_ ცემის ფაქტის? ირაკლი იყო შიგნით, ჟურნალისტები ვიყავით გარეთ. მე შიგნით არ ვყოფილვარ. გუშინდელ შემთხვევას თუ გულისხმობთ, შიგნით არ შეგვიშვეს.
ნატო გუბელაძე, “P.S”-ის რედაქტორი: “ორი დღეა, რაც ეს ფაქტი ხდება. გუშინ იყო ორმაისობა. პრეზიდენტი იყო ჩამოსული და საზოგადოებასთან ჰქონდა შეხვედრა. მაგრამ, როგორც ჩანს, საზოგადოებაში მარტო ნაციონალური მოძრაობის წევრები იგულისხმეს. რადგან ძირითადად ამ შეხვედრაზე ეს ხალხი იყო დაპატიჟებული. ჟურნალისტმა, ირაკლი ვაჩიბერაძემ მოახერხა ამ შეხვედრაზე შესვლა და იქ ერთ-ერთ ასეთ ფაქტს წააწყდა _ ერთ-ერთ ქალბატონს ძალით უშვებდნენ გარეთ, რომ თქვენ არ ხართ ნაცმოძრაობის წევრი, რატომ შემოხვედით შეხვედრაზეო და ეს გადაიღო ჟურნალისტმა. ამის გამო, მე რამდენადაც ვიცი, დაცვის წევრები უშვერი სირტყვებით დაუწყეს ლანძღვა-გუნება, მუჯლუგუნებით გაუმასპინძლდნენ, ფიზიკური შეურაცხყოფა მიაყენეს და გამოაძევეს გარეთ. ეს იყო გუშინ. დღეს იყო ანალოგიური შეხვედრა _ ჩამოსულები იყვნენ ვანო მერაბიშვილი, მიხეილ მაჭავარიანი და ნაციონალური მოძრაობის სხვა წარმომადგენლები. ამ შეხვედრაზე იყო ირაკლი მისული და იქაც დაცვის წევრებმა უკვე არამარტო მუცელში მუჯლუგუნები, არამედ თავშიც კარგად ჩაარტყეს. დაცვის წევრებს, როგორც შეეძლოთ, სასტიკად სცემეს. ყველაზე სამწუხარო ის არის, რომ თვითონ ქუთაისელები, ნაციონალური მოძრაობის წევრები, საკრებულოს წევრები კახა ნემსიწვერიძე, გოგი სვანიძე იდგნენ და უყურებდნენ ამ ფაქტს და რეაქცია არ ჰქონიათ. ასევე, ქუთაისი პრეს-სამსახურის ხელმძღვანელი ქეთი დეისაძე. ირაკლიმ თქვა, ვთხოვდი, ქეთი, მომეხმარე, მიშველეო და არც გამომხედაო.
ჩემი აზრით, ეს არის აგონიაში მყოფი ხელისუფლების მოქმედებები. ეს არ არის პირველი შემთვევა, როდესაც ჟურნალისტებს სცემენ. რადგან არჩევნები ახლოვდება, ალბათ, კუნთმაგარ ბიჭებს დაიქირავებენ და უფრო მეტად დაერევიან ჟურნალისტებს, რომლებიც შეეცდებიან, ფაქტებზე დაყრდნობით სიმართლე დაწერონ. ჟურნალისტები უნდა გავერთიანდეთ, უფრო მეტად უნდა ვიყოთ ერთმანეთის მიმართ კოლეგიალურები და ვერ შეძლებენ დაგვამარცხონ. ვგულისხმობ დამოუკიდებელ მედიას, თორემ დარწმუნებული ვარ, სახელმწიფო მედია _ “რუსთავი “2, პირველი არხი და ა.შ. ამაზე ხმასაც არ ამოიღებს.
