საქართველოს სახალხო დამცველის აპარატი ძველ, 2009 წელს გამოშვებულ 7 ათას ლარად შეფასებულ Hyundai Tucson-ს, ახალი, 105 ათას ლარად ღირებული მერსედესის მარკის ავტომობილით ანაცვლებს.
ამის შესახებ ინფორმაციას ინტერნეტ გამოცემა on.ge ავრცელებს, რასაც სახალხო დამცველის ოფისშიც ადასტურებენ.
როგორც გავრცელებულ ინფორმაციაშია აღნიშნული, ომბუდსმენის ოფისმა 2016 წლის 23 მარტს ტენდერის გარეშე, გამარტივებული, პირდაპირი შესყიდვის წესით ხელშეკრულება გააფორმა შპს ავტო თრეიდ ინთან, რომლის მიხედვითაც ის აღნიშნული კომპანიისგან ყიდულობს ახალ, 2016 წელს გამოშვებულ, შავი ფერის ავტომობილს Mercedes-benz GLA 250 4matic.
შპს "ავტო თრეიდ ინ"-მა სახალხო დამცველის ოფისს ახალი ავტომობილი 2016 წლის 15 აპრილამდე უნდა მიაწოდოს, სანაცვლოდ კი კომპანია 7 ათას ლარად შეფასებულ Hyundai Tucson-ს მიიღებს. გარდა ამისა, ფასთა სხვაობა – 98 500 ლარი ომბუდსმენის ოფისმა კომპანიას მიღება-ჩაბარების აქტის გაფორმებიდან 5 საბანკო დღეში უნდა გადაურიცხოს. დაფინანსების წყარო სახელმწიფო ბიუჯეტია.
ავტომობილის შესყიდვის ხელშეკრულებას ხელს სახალხო დამცველის პირველი მოადგილე პაატა ბელთაძე აწერს.
გავრცელებული ინფორმაციით, სახალხო დამცველის აპარატმა იგივე კომპანიისგან მიმდინარე წლის 10 თებერვალს ასევე იყიდა ახალი, 2015 წლის Toyota land cruiser 150, რომლის ღირებულებაც არის $48 500, სანაცვლოდ კი მას გადასცა 2008 წელს გამოშვებული, 25 000 ლარად შეფასებული Volkswagen Touareg. ფასთა შორის სხვაობა უნაღდო ანგარიშსწორებით დაიფარა.
"გურია ნიუსი" ინფორმაციის გადასამოწმებლად სახალხო დამცველის მოადგილეს, პაატა ბელთაძეს დაუკავშირდა, რომელიც აღნიშნავს, რომ ავტომანქანის შეძენისას აპარატმა "შესყიდვების შესახებ" კანონით იმოქმედა.
"ზემოაღნიშნული ავტოსატრანსპორტო საშუალებების მიმდინარე რემონტისთვის გაწეული ხარჯების ზრის გამო, ავტოსატრანსპორტო საშუალებების ჩანაცვლება განხორციელებულია შემდეგი კანონების და ინსტრუქციების შესაბამისად: "საქართველოს სახალხო დამცველის შესახებ" საქართველოს ორგანული კანონის 26-ე მუხლის, "სახელმწიფო შესყიდვების შესახებ" საქართველოს კანონის მე-101 მუხლი მე-3 პუნქტის "ე" ქვეპუნქტის, სახელმწიფო შესყიდვების სააგენტოს თავმჯდომარის 2015 წლის 17 აგვისტოს №13 ბრძანებით დამტკიცებული "გამარტივებული შესყიდვის კრიტერიუმების განსაზღვრისა და გამარტივებული შესყიდვის ჩატარების წესის" მე-3 მუხლის პირველი პუნქტის "ე" ქვეპუნქტის, საქართველოს ეკონომიკური განვითარების მინისტრის 2008 წლის 24 ნოემბრის N1–1/2688 ბრძანებით დამტკიცებული ,,შესყიდული ავტოსატრანსპორტო საშუალებისა და კომპიუტერული ტექნიკის ახალი, იმავე ან გაუმჯობესებული პარამეტრების მქონე ავტოსატრანსპორტო საშუალებითა და კომპიუტერული ტექნიკის ჩანაცვლების მიზნით მათი ღირებულების შეფასების და მიმწოდებლისათვის დაბრუნების ან სხვა ფიზიკური ან იურიდიული პირისათვის, რომელიც ახდენს მსგავსი პროდუქციის (საქონლის) რეალიზაციას, გადაცემის წესის," _ აღნიშნავს ბელთაძე.
მისივე განმარტებით, "ავტომობილების შესყიდვა გამოიწვია იმ გაზრდილმა ხარჯმა, რაც აპარატში რეგიონული ოფისების მატებას უკავშირდება".
"გარდა ამისა, ინტენსიურ მუშაობას სხვადასხვა მიმართულებით. კიდევ უფრო მეტ შეხვედრებს რეგიონებში, ასევე საქმიანობის გაზრდამ და გააქტიურებამ დააყენა დღის წესრიგში სატრანსპორტ საშუალებების ჩანაცვლების საკითხი. ორივე სატრანსპორტო საშუალება, რომელიც ახლით ჩავანაცვლეთ, 2002 წელს იყო გამოშვებული. შევამოწმეთ და დადგინდა, რომ უმჯობესი იქნებოდა ახლით ჩანაცვლება, რაც მომავალში გამოიწვევს ეკონომიურობას. სხვა ჩანაცვლება ამ ახლო წარსულში არ განხორციელებულა სატრანსპორტო საშუალებებზე", _ აღნიშნავს ბეთაძე და დასძენს, რომ ისევ მიმდინარეობს აპარატის სატრანსპორტო საშუალებების შემოწმების პროცვესი და არ არის გამორიცხული, სხვა ავტომობილების ჩანაცვლების საკითხიც დადგეს.
"გადავხედავთ კიდევ ერთხელ, როგორია ჩვენი ავტოპარკი. რამდენიმე ძველი 2009-2010 წელს გამოშვებული ავტომანქანის მდგომარეობის შემოწმება ახლა მიმდინარეობს და თუ გამოიკვეთა საჭიროება, ასეთ შემთხვევაში ჩანაცვლებაზე ვიფიქრებთ. მაგრამ ამ ეტაპზე მიმდინარეობს შემოწმება", _ აღნიშნავს ბელთაძე.
კითხვაზე: რატომ 105 ათას ლარად ღირებული ავტომობილი და არა უფრო იაფიანი იგივე მონაცემებით? _ ბელთაძე გვპასუხობს: ავტომანქანის შეძენა ჩანაცვლების გზით როდესაც ხორციელდება, კანონის ერთ-ერთი სავალდებულო მოთხოვნა არის, რომ უნდა იყოს იგივე კლასის ან უფრო მაღალი გამავლობის ავტომობილით ჩანაცვლებული. ჩავატარეთ ერთგვარი "რისერჩი" სხვადასხვა შემოთავაზებების და იმ კონკრეტული მოცემულობის დროს რეალურად იყო ეს ვარიანტი, რომელიც შეესაბამებოდა იმ საჭიროებებს, რომელიც მიგვაჩნია, რომ მნიშვნელოვანია. "სახლახო დამცველის შესახებ" კანონში არის ასეთი ჩანაწერი, რომ სახელმწიფომ უნდა უზრუნველყოს სახალხო დამცველი ყველა იმ ტექნიკური და საჭიროებებით, რაც აუცილებელია მისი საქმიანობის წარმართვისთვის".
მისივე თქმით, სხვა ტექნიკური საშუალებების ჩანაცვლების საკითხი ამ ეტაპზე ომბუდსმენის აპარატში არ დგას.
"ჩანაცვლება, განახლება საკმაოდ მაღალი ცვეთის მქონე მატერიალურ-ტექნიკური საშუალებების ეს არის განგრძობითი და ჩვეულებრივი საქმიანობა ნებისმიერი საჯარო დაწესებულებისთვის. მაგრამ ამ ეტაპზე სხვა ტექნიკური საშუალებების ჩანაცვლება უახლოეს ხანში დაგეგმილი არ არის, თუმცა ჩვენ როდესაც ვახორციელებთ ზოგადი სურათის შესწავლას, თუ რა მდგომარეობაშია სხვადასხვა ტექნიკური საშაულებები, ამის შემდგომ მიიღება ყოველი ასეთი გადაწყვეტილება და დამოკიდებულია კონკრეტულ მოცემულ პერიოდში ჩვენ საჭიროებებს და ტექნიკური საშუალებების მდგომარეობაზე", _ აღნიშნა ბელთაძემ "გურია ნიუსთან" საუბრისას.
