ლანჩხუთში, ქალაქის ერთ-ერთ ცენტრალურ უბანში მდგარი სტალინის ბიუსტის აღების თაობაზე, რიგითი მოქალაქის პოზიციიდან, საკრებულოს ოფიციალური განცხადებით მიმართა "თავისუფალი დემოკრატების" ადგილობრივი ორგანიზაციის თავმჯდომარემ, ვახტანგ ზენაიშვილმა.
ზენაიშვილის აზრით, დაუშვებელია ლანჩხუთის ერთ-ერთ ცენტრალურ მოედანზე იდგეს მსოფლიოს უდიდესი დიქტატორის, დამოუკიდებელი საქართველოს ჯალათის და გახელისუფლებული ბანდიტის იოსებ სტალინის ბიუსტი.
"დიდი ხანია დროა საკრებულომ მიიღოს გადაწყვეტილება სტალინის ბიუსტის აღების თაობაზე. ამას თქვენ კანონი გავალდებულებთ. იმედი მაქვს, ამ საკითხს საკრებულოს უახლოეს სხდომაზე განიხილავთ და ადეკვატურ გადაწყვეტილებას მიიღებთ." – წერია ზენაიშვილის განცხადებაში. ბატონი ვახტანგის აზრით, წლების წინ ამ ბიუსტს ბუტაფორიული მნიშვნელობა ქონდა, თუმცა დღეს სამწუხაროდ, სხვა დატვირთვა მიეცა, რის გამოც აუცილებელია მისი დემონატაჟი.
საკრებულოს სხდომამდე მოქალაქე ზენაიშვილის განცხადება განხილივის საგანი იყო ეთიკის კომისიის სხდომაზე, რომლის თავმჯდომარე, რომან ბიწაძეც მხარს უჭერს ბიუსტის დემონტაჟს. მეტიც, მისი თქმით, თავის დროზე იგი კანონის დარღვევით დაიდგა, თანაც ესთეტურად არ გამოიყურება კარგად.
ზენაიშვილის მიერ დაფიქსირებულ პოზიციას ბოლომდე იზიარებს საკრებულოს წევრი კახა ასკურავა, რომელიც მიიჩნევს, რომ იქ, სადაც ახლა სტალინის ბიუსტი დგას, ქვეყნის ერთიანობისთვის დაღუპულთა მემორიალი მოეწყოს, ხოლო მიმდებარე ტერიტორიას "გმირთა მოედანი" ეწოდოს.
"აქტიურად ვიწყებთ საკრებულოში განხილვებს ამ საკითხთან დაკავშირებით, ვნახოთ, ვის რა პოზიცია ექნება. ისე, ავიღებთ თუ არა სტალინის ბიუსტს, ეს არ არის საკრებულოს კეთილ ნებაზე დამოკიდებული, ამას პირდაპირ კანონი არეგულირებს", -დასძენს ასკურავა.
უმრავლესობის წარმომადგენელი ლანჩხუთის საკრებულოში, გურამ კერესელიძე მართალია ბიუსტის აღებას არ ეწინააღმდეგება, თუმცა, დასძენს- "ხუთიოდე ვეტერანი თუ იქნება შემოჩენილი, რომელიც 9 მაისს მივა სტალინის ბიუსტთან. მოდი ამ ხალხს ვცეთ პატივი".
რომან ბიწაძის მოსაზრებით ეს საკითხი უმჯობესია საკრებულოს სხდომაზე დეპუტატაბმა განიხილონ და იქ მიიღონ გადაწყვეტილება, რა ბედი ეწევა ლანჩხუთში სტალინის ბიუსტს.
