"წამოდით, ნახეთ, რა მდგომარეობაა ჩვენს ქუჩაზე და თუ იფიქრებთ, რომ აქ ადამიანები დადიან და ავტომობილები გადაადგილდებიან?! წლებია, ამ ქუჩის რეაბილიტაციით არავინ დაინტერესებულა. ქალაქში მცხოვრებლები გვქვია, მაგრამ ტალახში ვიხრჩობით. ასფალტს თუ არ დააგებენ, სანიაღვრე არხები მაინც გაიყვანონ, ან მოხრეშონ", _ "გურია ნიუსის" რედაქციას ქალაქ ოზურგეთის ჯორჯიაშვილის ქუჩის ერთ-ერთმა მცხოვრებმა მიმართა და დახმარება ითხოვა.
ჩვენც ადგილზე გავეცანით არსებულ ვითარებას. ქალაქ ოზურგეთში, ჯორჯიაშვილის ქუჩის დასაწყისიდან ყველანაირ კომუნიკაციას მოკლებული დასახლება იწყება _ არ არის გარეგანათება, ქუჩა თხრილებითაა სავსე, უვარგისი სამანქანო გზა ჯერ კიდევ საბჭოთა კავშირის დროინდელი პანსიონატის ნანგრევებთან მიდის, რომელიც, მოსახლეობის თქმით, ქვეწარმავლების ბუდე და საშიში კერაა. ნანგრევების გავლის შემდეგ, მიადგებით კიდევ ორ საცხოვრებელ კორპუსს, რომელიც ჯორჯიაშვილის ქუჩის კვეთაში, შევარდნაძის ქუჩაზე მდებარეობს, სადაც პრობლემებით დაღლილი მოსახლეობა ცხოვრობს.
ბინებში წყალი ჩადის და კედლებს აზიანებს _ სადარბაზოს დათვალიერებისას მარტივად შეამჩნევთ ჩამორეცხილ და წვიმისგან დაზიანებულ კედლებს, რაც სახლს დანგრევით ემუქრება.
უმუშევრობა, მძიმე სოციალური ფონი, წყლის მოუწესრიგებელი სისტემა, გადაუხურავი სახლები, ავარიულ მდგომარეობაში მყოფი ბინები, წყლისა და კანალიზაციის 
მოუწესრიგებელი სისტემა… განსაკუთრებით მძიმე მდგომარეობაა ბინების შესასვლელთან:
"არ გვაქვს კანალიზაცია. გზა, წარმოგიდგენიათ, რა მდგომარეობაში ვიქნებით?! ჩვენთან მაშინ მოდიან, როცა არჩევნებია. დამთავრდება არჩევნები და არავის ვახსოვართ, არავის ვჭირდებით!" _ აღნიშნავს ეთერ ჯიბლაძე.
ჯორჯიაშვილის ქუჩის მოსახლეობა ადგილობრივ ხელისუფლებას უკანასკნელ არჩევნებს კიდევ ერთხელ ახსენებს და დაპირების შეუსრულებლობაში ადანაშაულებს: "ორი წლის წინ, ადგილობრივი ხელისუფლების წარმომადგენლები მოვიდნენ _ დაგვეხმარეთ, მოდით არჩევნებზე და გპირდებით, ერთი კვირის შემდეგ დავიწყებთ მუშაობასო, შეგვპირდნენ მაშინ, თუმცა, იმ დღიდან ორი წელი გავიდა და არავინ გამოჩენილა".
მათივე ინფორმაციით, ამ დაპირების შემდეგ, ოზურგეთის მუნიციპალიტეტის გამგეობასა და ქალაქ ოზურგეთის მერიას განცხადებით რამდენჯერმე მიმართეს, თუმცა შედეგი არ არის:
იური დარჩია: "არჩევნებამდე დაგვპირდნენ, რომ მოაწესრიგებდნენ ინფრასტრუქტურას, მაგრამ არაფერი ჩანს. რამდენჯერაც მთავრობა იცვლება, იმდენჯერ გვატყუებენ. აქვეა სტადიონი, სადაც მოზარდები თამაშობენ და ვარჯიშობენ. უნდა ნახოთ წვიმასა და ცუდ ამინდში ბავშვები ტალახში როგორ ცურავენ. რა დავაშავეთ ასეთი, რომ ყურადღებას საერთოდ არ გვაქცევენ? ნახეთ, როგორ სამარცხვინოდ დგას ელექტროგადამცემი 
ბოძი. ერთადერთი ბოძია ამხელა ქუჩაზე, ისიც საცაა წაიქცევა და ვინმე შეიძლება შეიწიროს კიდეც".
რიტა ბიბილური: "ასეთ მდგომარეობაში მყოფი ქუჩა თუ სადმე იქნება ოზურგეთში, მაშინ მოვიხდით ბოდიშს. მივმართეთ ხელისუფლებას, მაგრამ _ არაფერი, გარე განათება არ გვაქვს და მთავარი ქუჩიდან რომ გადმოუხვევ, სადღაც მიტოვებულ კუნძულზე იგრძნობთ თავს".
ქნარიკ შკოიანი: "მარტოხელა პენსიონერი ვარ. შემოდით, გადაიღეთ სად ვცხოვრობ. ასეთი სახლის პატრონს სოციალური დახმარება მომიხსნეს. ავად ვარ, წამლების ფული არ მაქვს, თვალი მტკივა, დახმარებას ვთხოვ ხელისუფლებას".
ტატიანა შენდრკოვა: "უგზოობა, უშუქობა, ძალიან გვაწუხებს გარე განათების არქონა".
პოლინა გოგუა: "30 კაცი მივედით გამგეობაში დახმარების სათხოვნელად. დაგვპირდნენ, თუმცა, არანაირი რეაგირება არაა. მასწავლებელი ვიყავი სოფელ მერიაში და აკრძალულ ხერხებსაც მივმართავდი არჩევნებზე _ აგიტაციას ვეწეოდი მასწავლებლებში, მშობლებში _ ვთხოვდი, ხმა "ოცნებისთვის" მიეცათ. მთელმა სკოლამ და ჯორჯიაშვილის ქუჩამ "ოცნებას" მისცა ხმა. კი გამიცრუვდა იმედები, მაგრამ ხმის მიცემას მაინც "ოცნებისთვის" ვაპირებ _ მშობელივით მიმაჩნია, რატომღაც. ბევრი რამ კი გააკეთა. ჩვენ, ადამიანები, ისეთები ვართ, თუ ჯიბეში არ ჩაგვიდეს, ისე ვერ ვხედავთ გაკეთებულს, მაგრამ ხომ ფაქტია, რომ გზა არ გვაქვს?!"
ქალაქ ოზურგეთის მუნიციპალიტეტის მერიის პოზიცია აღნიშნულთან დაკავშირებით ასეთია: "აღნიშნულ მონაკვეთზე გზის დაგება მომავალი წლისთვის იქნება შესაძლებელი. გამზადებულია პროექტი და სამუშაოები დაიწყება შესაბამისი სამინისტროს მიერ თანხის გამოყოფისთანავე".
