დაბა ნასაკირალში ხვალ ვიცე-პრემიერს კახი კალაძეს ელოდებიან. 22 მაისს დაბაში შუალედური არჩევნები უნდა გაიმართოს.
"გურია ნიუსი" დაინტერესდა თუ რა განწყობა იყო მოსახლეობაში ვიცე-პრემიერის სტუმრობამდე დაბაში ერთი დღით ადრე. იქ მისულებს ასეთი სურათი დაგვხდა. ხელისუფლება დაბა ნასაკირალის ცენტრალულ გზას აგრეიდერებდა. ცენტრში შეკრებილი მოსახლეობის ნაწილმა "გურია ნიუსთან" დადებითი პოზიცია გამოხატა ხელისუფლების მიმართ, ნაწილი კი უკმაყოფილებას აშკარად გამოხატავდა. იქვე იყო ოზურგეთის მუნიციპალიტეტის გამგებლის წარმომადგენლის დაბა ნასაკირალში დათო ტუნაძის თანაშემწე ოთარ ირემაძე, რომელიც ჟურნალისტებისა და ცენტრში შეკრებილების მიმართ აგრესიულობით გამოირჩეოდა:
"თქვით რაც კეთდება, ყველაფერი კეთდება, ან დაწყებულია გაკეთება,"- ამბობდა ირემაძე. მან ისიც დაამატა, რომ ყველაფერი, რასაც მოსახლეობა ამბობდა, სიმართლე არ იყო და არ უნდა დაგვეჯერებინა. მისივე თქმით, გზის დაგება დიდი ხანია პროექტში დევს და დღევანდელი სამუშაოები მოახლოებულ არჩევნებთან არანაირ კავშირში არაა.
სოსო გორგაძე: "ჩვენ რატომღაც დაბა ნასაკირალის, ლაითურისა და ნარუჯის მოსახლეობას სხვანაირად გვიყურებენ, არ გვთვლიან ისე, როგორც სხვა სოფლის მაცხოვრებელებს, გული გვტკივა ძალიან."
ნიკოლოზ ძირკვაძე: "ყველა არჩევნების წინ მოვლენ, გააფენენ ენას, ამას ვიზამთ, იმას ვიზამთ, გაისწორებენ მისას და დაიხურავენ ქუდს და წავლენ."
"მე სოციალური მომიხსნეს, გაჭირვებაში ვცხოვრობ, რა განწყობა უნდა მქონდეს?" – ამბობს შოთა ძირკვაძე
დაბა ნასაკირალში მცხოვრები ნოდარ გიორგაძე კი "გურია ნიუსს" ერთ-ერთი ოჯახით დაინტერესებას სთხოვდა: " წადით გთხოვთ, რა მდგომარეობაში ცხოვრობს მამუკა კიკვაძის ოჯახი, ასეთი გაჭირვებული ოჯახებისთვის უნდა გამოყოს სახელმწიფომ დახმარება, წყალი აქ არაა, არც გზა, არც შუქი, მოვითხოვთ და წყინთ მერე."
“კარგია, რომ ამოხვედით ჟურნალისტები და დაინტერესდით ჩვენი პრობლემებით. თვქენც ხომ ხედავთ, გზის დაგება დღეს დაიწყეს. აქამდე არ უნდა მოეხრეშათ? თუ ფორმალობა არაა ეს ყველაფერი, 21-ე საუკუნეში როგორი გზა გვაქვს, არც წყალის პრობლემაა მოგვარებული, არც ქუჩის განათება გვაქვს, ჩაბნელებულია ყველაფერი. ამხელა დაბაში ამბულატორია არ გვაქვს, დანგრეულია ყველაფერი, წინასაარჩევნოდ დაიწყეს გზის დაგება, გადაატარეს ერთი ორჯერ, ადრე სულ არ ვახსოვდით, ამ ბოლოს კვირაში ორჯერ მოდიან ხელისუფლებიდან, აღარ გვჯერა მათი დაპირებების"_ამბობდნენ დაბა ნასაკირალის ადმინისტრაციულ შენობასთან შეკრებილი გურამ აბულაძე, თემურ ანთაძე და კახა თავდიშვილი.
"ჩვეულებრივი განწყობა მაქვს, ვითომც არაფერი, პრობლემები ძალიან ბევრია, რომელიც არ სრულდება. რა აზრი აქვს თქმას, მიჩვეულები ვართ დაპირებებსაც და ტყუილებსაც, მივალ, ვნახავ და უბრალოდ მოვისმენ." _ ამბობს ხათუნა ზოიძე.
მურმან ბერიძე: "ამათი მინუსი იცით რა არის? რასაც დაგვპირდებიან ის უნდა შეგვისრულონ, ან სხვა კანდიდატი ვინ ჰყავთ უკეთესი?"
ამირან ბერიძე: "გლეხკაცს შუქი, წყალი და გზა უნდა, ეს არცერთი არ გვაქვს! ამიტომაც არ გვაქვს ხელისუფლების იმედი, არჩევნებზე გამოჩნდებიან, მერე დაიკარგებიან, აბა ყანაში მუშაობას არ ვთხოვთ ჩვენ არავის."
"მე პირადად ხელისუფლებას ვუჭერ ხმას, კი კეთდება ყველაფერი" – ამბობს ქსენია ქამადაძე.
დაბა ნასაკირალში მცხოვრები მარინა ცეცხლაძე არჩევნებს აპროტესტებს და ამბობს, რომ ხმის მიცემა რომ შეიძლებოდეს თურქეთის პრეზიდენტს დაუჭერდა მხარს:
"თურქეთის პრეზიდენტს მივცემდი ხმას რომ შეიძლებოდეს. ახლა ვერცერთ ახალგაზრდას ვერ ნახავთ სოფელში, ყველა თურქეთშია გადახვეწილი, ის გვაძლევს ლუკმა-პურს, ჩვენთვის არავინ არაა,"
დანა ნასაკირალის ტერიტორიული ერთეულის ადმინისტრაციის სპეციალისტი თამაზ ირემაძე "გურია ნისუთან" ამბობს, რომ გზის სარეაბილიტაციო სამუშაოებთან გამოცხადებული ტენდერი ამ დღეებში დასრულდა, სამუშაობი კი აქამდე უამინდობის გამო ვერ შესრულდა.
მისივე თქმით დაბა ნასაკირალში არანაირი პრობლემა არ არსებობს.
