“წელგამართულებს მოგეღუნოთ საუკუნე!”

ოჯახის წევრების, ძმების, ბიძაშვილების და სოფლის მკვიდრთა გადმოცემით, ფეოდორა სალუქვაძეს 104 წელი 15 აპრილს შეუსრულდება. ოფიციალური მონაცემებითა და დაბადების მოწმობით კი იგი 10 ივნისს 101 წლის გახდება.
ფეოდორა სამი წლის ასაკში მონათლულა, მაშინ, თურმე, ეკლესია ნათლობის დღიდან წერდა ასაკს. ასე, რომ ჩვენი რესპონდენტი ნამდვილად 103 წლისაა და დამდეგ ახალ წელს “გურია ნიუსის” ფეხბედნიერი მეკვლის იმიჯიც მოირგო.
უხუცეს ქალბატონს შინ, მშობლიურ ლიხაურში ვეწვიეთ. ეზოში რძალი შემოგვეგება და ბოდიშის მოხდით შეგვიძღვა მოხუცის ოთახში: _ ჯერ არ ამდგარა, მაგრამ ახლავე “მოვახაზირებო”.  ამასობაში, საუკუნეს გადაბიჯებული ქალბატონის საკმაოდ ხავერდოვანი ხმაც მომესმა:
_ ვინ ხარ, ბებო, ვის გავახსენდი? მე მეძებთ, მგონია…
ჩვენც არ დავაყოვნეთ და ვახარეთ, მთელ დუნიას უნდა გავაგებინოთ, რომ  ამ სახლში თქვენ, უხუცესი ქალბატონი ცხოვრობთ და მოვუყვეთ, რამდენ ჭირვარამგამოვლილი ბრძანდებით, იმედია, არ გაგვაწბილებთ,-თქო.
_ ცოტა მაცალეთ, ავდგები, ხელ-პირს დავიბან და გეახლებითო, _ დაფაცურდა მოხუცი.
დიდი დროც არ დასჭირვებია,  ჩვენს პირისპირ დაჯდა მაგიდასთან და ვიდრე კითხვებს დავუსვამდით, სხარტად, თანმიმდევრულად მოგვითხრო თავისი წარსულის შესახებ.
ქალბატონ ფეოდორას ოთხი შვილი ჰყავს, უფროსი 80 წლისაა, მომდევნო 79-ის, მესამე ჴ 75-ის, მეოთხე კი _ 71-ის. უმცროსი შვილი ბადრი სალუქვაძე ონკოლოგიური ავადმყოფია. ის ჩაწოლილი დაგვხვდა, ყოველდღიურად ესაჭიროება წამლები და ქიმიოთარაპია, თუმცა, საკუთარ გასაჭირზე ამჯერად არაფერი უთქვამს, მთელს ქვეყანას მიულოცა დამდეგი ახალი წელი და თქვენ გაიხარეთ და გამრავლდით ახალგაზრდებო, წელგამართულებს მოგეღუნოთ საუკუნეო, გვითხრა.
ქალბატონმა ფეოდორამ გვიამბო ომის პერიოდში გადატანილ უმძიმესი დღეების შესახებ, როცა, თითქმის, არ ეძინა, ჭირსა და ლხინს არსად დაჰკლებია, შვილები არ მოუშიებია, მიუხედავად იმისა, რომ ქმარი ომში დაეღუპა და მარტოხელა დედობის ტვირთი, ისედაც უმძიმეს ტვირთაკიდებულმა საუკუნემდე ზიდა. მერე კი, როცა საუკუნის ზღურბლს გადააბიჯა, სიმხნევე მაინც შეინარჩუნა და წელგამართული შეგვხვდა, ლოცვა-კურთხევა არ მოგვაკლო და როცა ვკითხეთ, განსაკუთრებით რას უსურვებდა “გურია ნიუსსა” და მის მკითხველს, გვითხრა, მე და ჩემნაირი რომ გაგახსენდებით, ღმერთი გაგიძღვებათ ბედნიერებისკენ, ჩემზე უკეთ ის გადაგიხდით, სიმართლის გზით გევლოთ და, რაც უნდა სიძნელე შეგხვდეთ, მაინც გადალახავთ, ვერავინ და ვერაფერი მოგერევათო.
წამოსვლისას  ქალბატონ ფეოდორას რძალს ვკითხეთ:
_ როგორი განცდა გეუფლებათ, როცა ოჯახში საუკუნის ადამიანი გყავთ?
_ თავისთავად დიდი განცდაა, როცა ოჯახში საუკუნეგადაცილებული  ადამიანი გყავს _ ასეთი ოჯახები ხომ ერთეულებია?! ახალი წელი მოდის და მინდა, გისურვოთ, ყველაფერ ახალზე, სასიხარულოსა და კეთილ საქმეებზე მოგემართოთ ხელი. მთავარია, იყოს მშვიდობა და საშველი. ფეხზე მდგარი, ჯანმრთელნი და გონებანათელნი შეხვედროდეთ, როგორც ამ ახალ წელს, ისე ფეოდორა ბებოს ასაკს, გაიხარეთ! _ დაგვლოცა საახალწლოდ ოჯახის დიასახლისმა.