ინდოელი ინვესტორები მანქანათმშენებელ ქარხანაში დაგეგმილ პროექტს აჩერებენ და ტყვიის გადამამუშავებელი საწარმოს გახსნას აღარ აპირებენ. ამის შესახებ "გურია ნიუსს" თავად კომპანიის წარმომადგენლებმა აცნობეს.
შპს "ჯეო გადამამუშავებელს" დაგეგმილი ჰქონდა ოზურგეთის ყოფილი მანქანათმშენებელი ქარხნის ტერიტორიაზე ფერადი მეტალის ჩამოსხმის საწარმოს მოწყობა, რომელზეც გათვალისწინებული იყო ინვესტიაცია 10 მლნ აშშ დოლარი, 150 სამუშაო ადგილის შექმნა და თანამედროვე, გარემოს დაცვის თვალსაზრისით უსაფრთხო ტექნოლოგიების გამოეყენება.
საქართველოს და საერთაშორისო კანონმდებლობისა და პრაქტიკის გათვალისწინებით "ჯეო გადამამუშავებელმა" ორგანიზება გაუკეთა პროექტის საჯარო განხილვას.
საჯარო განხილვის პროცესში გამოვლენილი სხვადასხვა დაინტერესებული მხარეების პოზიციების გათვალისწინებით მიიღო გადაწყვეტილება პროექტის განხორციელების შეჩერების შესახებ."– ნათქვამია ოფიციალურ წერილში, რომელიც გაზეთ "გურია ნიუსს" ამ დილით მიაწოდეს.
ინფორმაციისთვის, ექადიის, ბასრისა და კვაჭალათის უბანში მცხოვრებლები ქალაქ ოზურგეთში თაყაიშვილის ქუჩაზე მდებარე ყოფილ მანქანათმშენებელი ქარხნის ტერიტორიაზე ტყვიის გადამამუშავებელი საწარმოს ამუშავების წინააღმდეგნი არიან.
ოზურგეთის ექსპერიმენტული მანქანათმშენებელი ქარხანა, რომელიც ქალაქ ოზურგეთში, თაყაიშვილის ქუჩის #20-ში მდებარეობს, 30150 კვ/მ ფართის მიწის ნაკვეთით და მასზე არსებული შენობა-ნაგებობებით გაიყიდა.
როგორც მოსახლეობის ერთი ნაწილი "გურია ნიუსთან" საუბარში ამბობდა, ბოლო ორი წლის განმავლობაში ქარხნიდან მომდინარე გაურკვეველი სუნი აწუხებდათ, გახშირდა ბავშვებსა და მოხუცებში სხვადასხვა დაავადებები.
ვიდრე ამ გადაწყვეტილებას მიიღებდნენ, ინდოელი ინვესტორები გურიის გუბერნატორს გია სალუქვაძეს, არასამთავრობო ორგანიზაციის, მედიის და საზოგადოების წარმომადგენლებს შეხვდნენ.
შეხვედრაზე ტყვიის გადამამუშავებელი საწარმოს გახსნისა და იმ მნიშვნელოვანი საკითხების წამოწევის შესახებ იმსჯელეს, რომელიც საზოგადოებისთვის აქტუალურია. ასევე, შესაძლებლად მიიჩნიეს აღნიშნული საწარმოს ადგილმონაცვლეობა, რაც გულისხმობს საწარმოს დაუსახლებელ ტერიტორიაზე განთავსებას.
"მივესალმები რეგიონში ნებისმიერი ინვესტორის შემოსვლას. ვპირდები ყველას, რომ პირადად ვიქნები მათი ლობისტი და დაინტერესებულ პირს მაქსიმალურად გავუწევ დახმარებას. ამავდროულად, გათვალისწინებული უნდა იყოს მოსახლეობის ინტერესი – იცხოვრონ ჯანმრთელობისთვის უსაფრთხო გარემოში. კატეგორიული ვიქნები გარემოზე რაიმე სახის უარყოფითი ზეგავლენის მოხდენის შემთხვევაში. აქედან გამომდინარე, საკითხი დეტალურად უნდა იქნას შესწავლილი.
მინდა ხაზგასმით აღვნიშნო, რომ ჩვენ არ ვაპირებთ აღნიშნული კომპანიის წარმომადგენლების რაიმე სახით შეზღუდვას. პირიქით, ინვესტორის მიმართ გამოვხატავ პატივისცემას და კანონის ფარგლებში, ნებისმიერი სახის საქმიანობას მხარს დავუჭერ. ამ საკითხთან დაკავშირებით მოეწყობა საჯარო განხილვაც და ასეთი შეხვედრებით მივაღწევთ ორმხრივ შეთანხმებას,"- თქვა შეხვედრაზე გია სალუქვაძემ.
გურიის გუბერნატორთან შეხვედრის შემდეგ "ჯეო გადამამუშავებელის" წარმომადგენლები ახალგაზრდა იურისტთა ასოციაციის ოზურგეთის ოფისში მედიის, არასამთავრობოს და საზოგადოების წარმომადგენლებს შეხვდნენ. ამ შეხვედრაზე ითქვა, რომ უახლოეს ხანში მოხდება გარემოს ზემოქმედების შეფასების (გზშ) ანგარიშის განხილვა. ისიც აღსანიშნავია, რომ გზშ-ს პირველი განხილვა 2015 წელს მოხდა, რომელსაც დაახლოებით 5 ადამიანი ესწრებოდა.
