ოზურგეთის მუნიციპალიტეტის სოფელი მერიის მაცხოვრებლების ნაწილი ამტკიცებს, რომ სოფლის საძოვრებიდან მინდვრის ზედაპირის, ე. წ.. ჰუმუსის აღება ხდება, რომელიც შეკვეთილში, ბიძინა ივანიშვილის მიერ აშენებული საკონცერტო დარბაზის და მშენებარე სასტუმროს შემოგარენში მიაქვთ.
სოფელში შიშობენ მალე საძოვრები აღარ დარჩებათ და დახმარებას ითხოვენ.
_ამბობენ, შეკვეთილში მიაქვთ, ბიძინა ივანიშვილის მშენებარე ობიექტების ირგვლივ ტერიტორიის გასალამაზებლად სჭირდებათო. გარდა ამისა, კარიერიდან ტვრთმზიდი მანქანების ამოსვლას რომ უყუროთ, გაგიჟდებით. კარგ ამინდში თვალში ვერ გაიხედავ, ისეთი ბუღი დგას.
მტვერია მთელი დღის განმავლობაში. აპრილის თვეში გამოვიდა ხალხი. მთელი ამბავი ატეხეს. შეგვპირდნენ, წყალს დავასხამთო და მართლაც, ერთი კვირა რწყავდნენ შარაგზას, მერე დაანებეს თავი და კი დგას ისევ ბუღი მზიან ამინდში. წვიმა უნდა ვინატროთ სულ, რომ მტვერში არ ვიხრჩობოდეთ? _ აღნიშნა „გურია ნიუსთან“ საუბრისას ეთერ გოგატაძემ.
ეკა ვასაძე, სოფლის მკვიდრი: _ ახლა ყველა იმას იძახის, მალე საძოვრები არ გვექნებაო. მგლებიც ხშირად გამოჩნდებიან-ხოლმე. ერთადერთი მეწველი ძროხა შემიჭამა ამ გაზაფხულზე, მარტში.
ლალი მარგალიტაძე, მერიის მცხოვრები: ძროხის საძოვარი აღარაა მდინარის პირას. იღებენ მიწის ზედაპირს და მიაქვთ. ივანიშვილის რეზიდენციაში უნდათო, ასე ამბობენ.
ჩვენ მდინარე ნატანების სანაპიროზე ჩავედით, სადაც ვრცელი საძოვრებია _ სატვირთო მანქანა უკვე გამზადებული ტვირთით იდგა. იქვე იყვნენ მუშებიც. როცა მივესალმეთ, ერთი მათგანი გამოეყო:
_მეკითხებიან, რას შვებითო და არ ვეუბნები, ვინ ვარ! _ ანგარიში ჩააბარა ჩვენთვის უცნობ პიროვნებას.
ამ საუბრის შემდეგ კი გვთხოვა გადაღება შეგვეწყვიტა: _ ახლა რომ ახვალთ „ხიდის თავში“, იქ დაგხვდება უფროსობა და გეტყვიან, ვინც ვართ, _ დაგვაიმედა მუშამ.
ერთადერთი ვინც საკუთარი ვინაობა გაგვიმხილა მირზა ბროლაძე იყო: ნატანებელები ვართ და ვმუშაობთ, ჩვენ მხოლოდ მუშაობა ვიცით, _ გვითხრა ახალგაზრდამ.
ცენტრალურ გზაზე ამოსვლისას, „ხიდის თავში“, მართლაც დაგვხვდა ორი მსუბუქი ავტომობილი, საიდანაც ერთდროულად გადმოვიდა ორი ახალგაზრდა მამაკაცი.
ერთ-ერთმა თავი დავით მუჯირად გაგვაცნო:
_ იქ 40 ჰა ფართობი იჯარით აქვს აღებული კოტე ვაშაყმაძეს. სასტუმროს ვაშენებთ და გვჭირდება, ოღონდ ბევრი არ აგვიღია, ეს ბოლო მანქანა გავიდა, მეტი შემოსვლა იქ აღარ იქნება, _ აღნიშნა მუჯირმა.
_მოსახლეობაში ამბობენ, რომ ბიძინა ივანიშვილის დავალებით მოქმედებთ. მართალია?
_არაა ეს მართალი და გარდა ამისა, სად ნახეთ იქ განადგურებული საძოვრები? ასე ლაპარაკი შეიძლება? 50 კვადრატულ მეტრზე აღებული მინდორი საძოვრებია?
_ისინი ფიქრობენ, რომ მთელ საძოვრებს ამ დღეში ჩააგდებენ. აქ ეწერი ნიადაგებია, ჰუმუსი ნაკლებად არის და თვითაღდგენას ათეული წლები დასჭირდებაო, – ასე ამბობენ.
_არაა მართალი. ხომ ნახეთ თქვენი თვალით? აი, ეს ბოლო მანქანაა, მეტად აქ არ შემოვალთ, _ გვითხრა დავით მუჯირმა.
„გურია ნიუსი“ ოზურგეთის მუნიციპალიტეტის გამგებლის წარმომადგენელს სოფელ მერიაში, გრიგოლ კოსტავას დაუკავშირდა.
_მე ვერაფერს გეტყვით. ოზურგეთის მუნიციპალიტეტის პრესსამსახურს დაუკავშირდით და ის გაგცემთ პასუხს, _ აღნიშნა კოსტავამ.
პრესსამსახურმა კომენტარი არ გააკეთა. როგორც განგვიმარტეს, მუნიციპალიტეტის გამგებელი დედაქალაქში იმყოფება, ხოლო მოადგილე ამ თემაზე არ ისაუბრებს.
„გურია ნიუსი“ გარემოს დაცვითი ზედამხედველობის დეპარტამენტსაც დაუკავშირდა:
_ჰუმუსოვანი ფენის მოხსნა არ შეიძლება და ნებისმიერი ასეთი ქმედება ისჯება კანონით, თუნდაც ის ფართობი კერძო პირის იყოს. ჩვენ ასეთი ფაქტი გვქონდა ლანჩხუთში. იქ უკან მივატანინეთ აღებული ფენა, ჩავასმევინეთ ისევ და დავაჯარიმეთ. ამ ფაქტის შესახებ არ ვიცი, ახლა იქ ეკიპაჟს გავუშვებთ და შემდეგ გეტყვით დაზუსტებით, _ გვითხრა გარემოს დაცვითი ზედამხედველობის დეპარტამენტის გურიის სწრაფი რეაგირების სამმართველოს უფროსმა ემზარ ვაშალომიძემ.
როგორც გურია ნიუსმა გაარკვია შეკვეთილში მშენებარე სასტუმროსთან, რომელიც ივანიშვილის კომპანიის საკუთრებაა ჰუმუსი ნამდვილად იგება. სასტუმროს კომპანია „ბურჯი“ აშენებს.
_ ჩვენ უკვე დავასრულეთ ჰუმუსის დაგება. დაზუსტებით შემიძლია გითხრათ, რომ ისინი სოფელ მერიის ტერიტორიიდან არ მოგვიტანია და ჩვენი კომპანია არაფერ შუაშია, _ აღნიშნა კომპანია „ბურჯის“ გამწვანების უფროსმა შოთა წულაძემ.
