“გაიარა კაცმა (მიხეილ სააკაშვილმა) და თვალად არ დაგვენახა!”

ოზურგეთში 20 წუთით ჩამოსულ ქვეყნის პირველ პირს მოსახლეობა ვერ შეხვდა. დაუგეგმავი და გასაიდუმლოებული ვიზიტის შესახებ ოზურგეთის მუნიციპალიტეტის მოსახლეობის ძალიან მცირე ნაწილმა შეიტყო. იუსტიციის სახლის მიმდებარე პოლიციის მიერ დაკავებულ ტერიტორიაზე, მოქალაქეებს სამართალდამცავები სიახლოვეს არ აკარებდნენ.

პრეზიდენტის წასვლის შემდეგ განაწყენებულმა მოქალაქეებმა “გურია ნიუსს” თავისი გაჭირვების შესახებ უამბეს:

_ არ შეგვიშვეს, ახლოს არ გაგვაკარეს, რად გვინდა ასეთი გამკაცრებული დაცვა, პრეზიდენტს არ შეიძლება ვუთხრათ ჩვენი გაჭირვების შესახებ? რა იცი, იქნებ მოესმინა ჩვენთვის, რომ გაიგებდა ჩვენი მდგომარეობის შესახებ. იქნებ, დაგვხმარებოდა, რა გავაკეთოთ, ადგილობრივები რომ არ გვეხმარებიან, როგორ მოვიქცეთ? _ ამბობდა დაბა ლაითურში მცხოვრები ფრიალა ხარჩილავა.

_ ვცხოვრობთ ანასეულში, აჭარის დასახლებაში. არავინ ყურადღებას არ გვაქცევს, დაიწყეს ვითომ გაზიფიკაცია, გადათხარეს ყველაფერი, არც გზა გვაქვს და არც წყალი. შეშისთვის ხე რომ მოჭრა, დაგიჭერენ, საჭმლის გასაკეთებელი საშუალებაც კი არ გვაქვს. იქ, ადგილზე არავინ მოდის, ამბავს არ კითხულობს და აქ მაინც გვენახა ბატონი პრეზიდენტი, რომლის ჩამოსვლაც შემთხვევით გავიგეთ, _ ამბობს ანასეულში მცხოვრები შაქრო ბეჟანიძე.

საქართველოს პრეზიდენტმა 5 წუთით შეირბინა ოზურგეთის მუნიციპალიტეტის სოფელ მერიაში ახლად გახსნილ ფერმერთა მომსახურების ცენტრში. მისი ვიზიტი გასაიდუმლოებული იყო იქ მცხოვრებლებისთვის, მაგრამ რამდენიმე ადამიანმა, რომლებიც შემთხვევით შეესწრნენ ამ ამბავს, მაინც მოახერხა მასთან დალაპარაკება.

_ შემთხვევით შევხვდით. ძალიან გაგვიხარდა, კარგად მოგვისმინა და ასე გვითხრა, თქვენ გულისტკივილს აუცილებლად გულთან მივიტან და ყველაფერს მივხედავო. თუმცა, ისიც ვუთხარით, ასე ჩუმად არ უნდა მოსულიყავით, რატომ არ იცოდა თქვენი ჩამოსვლის შესახებ მოსახლეობამ,-მეთქი.

_ რა გიპასუხათ?

_ უცებ მოხდაო…

_ ძალიან გვიჭირს, უამრავი პრობლემა გვაქვს, გზა, წყალი, გაზი, ბინები ავარიულ მდგომარეობაში, გვაწვიმს, ქარი რომ ამოვარდება გვეშინია ღამის გათევა, შეიძლება წაიქცეს სახლი. რას უშვრებიან სოფლის მხარდამჭერი პროგრამების თანხებს? გვატყუებენ, წელს გადაგიხურავთ ბინასო და სამი წელია ამ დაპირებებში ვართ, არავინ გვაქცევს ყურადღებას. რატომ არ მოახმარეს ეს გადმორიცხული თანხა ამ გაჭირვებულ ხალხს? სად წაიღეს? გთხოვთ, მოგვაქციოს ვინმემ ყურადღება! იქნებ, ახლა მაინც გაიგოს სააკაშვილმა ჩვენი გაჭირვების შესახებ. გაიარა კაცმა, თვალად არ დაგვენახა! აგია საქმე? _ ამბობდნენ “გურია ნიუსთან” სოფელ მერიაში ახლად გახსნილი ფერმერთა მომსახურების ცენტრის წინ მდებარე ორსართულიანი საერთო ბინების მცხოვრებლები.

_ გვიჭირს ძალიან და იმიტომ ვყვირივართ, თორემ ხმას არ ამოვიღებდით, შვილო! საარჩევნოდ კი მოგვადგებიან _ არც ერთს არ მივცემთ ხმას, რამდენჯერ იყვნენ მოსულები ხმები შესაგროვებლად, ვინ იცის. კი მივცემდით ხმას, მაგრამ ასე უსინდისოდ რომ მოგექცევიან, არიან რაიმეს ღირსი? კატეგორიულად ვითხოვთ, გადაგვიხურონ ბინები! _ ამბობს ციური ხურციძე.