ყოფილი პრემიერ-მინისტრი ბიძინა ივანიშვილი რეგიონული მედიის წარმომადგენლებს ამჯერად გურიაში ხვდება.
ყოფილი პრემიერის შეხვედრისას პირველი კითხვა "გურია ნიუსმა" დასვა. ჟურნალისტის შეკითხვაზე – მაშინ როდესაც აფინანსებდით "ნაციონალურ მოძრაობას" თქვენ კარგად იცნობდით მიხეილ სააკაშვილს, "ნაციონალური მოძრაობის" ლიდერებს, იცოდით თუ არამ, რომ მათ ჰქონდათ ძალადობისკენ მიდრეკილება, ამ გადასახედიდან როგორ ფიქრობთ, იდეოლოგია იყო ძალადობრივი წინა ხელისუფლების თუ ეს იყო ერთგვარი შეცდომა?
აღნიშნულზე ბიძინა ივანიშვილმა უპასუხა:
"მე პოლიტიკურად არ მქონდა კარგი გამოცდილება. ემოციურად ვიყავი რევოლუციის დროს. ვიმყოფებოდი საფრანგეთში, სამი ტელევიზორი მქონდა დადგმული და ვუყურებდი როგორ შევიდნენ პარლამენტში.
ვფიქრობ, არაადეკვატური რეაქცია გავაკეთე მაშინ, ზედმეტად ემოციური ვიყავი; ზედმეტად გამეხარდა, ამ გზით მოსვლაც მივიღე, ისევე, როგორც მიიღო საზოგადოებამ. ორწელიწადნახევრის განმავლობაში მთელ ხელისუფლებას ვაფინანსებდი რეალურად, რასაც ვმალავდით და კარგად ვფუთავდით. პირდაპირი მნიშვნელობით სააკაშვილს არ დავხმარებივარ არაფერში და მაგას ვერც გაბედავდა პირადი რამ ეთხოვა.
ჩემი აზრით, ჩემმა პოზიციამ მაგის გამოაშკარავების პროცესი გაახანგრძლივა. ამაში პლიუსია თუ მინუსი თვითონ გააკეთეთ ანალიზი. ძალიან მკაცრი პოზიცია მქონდა, მახსოვს როგორ შეფასებებს ვაკეთებდი შეცდომებზე, იგივე 7 ნოემბერზე, ამაზე მისაუბრია ტელევიზიით. სააკაშვილს მეტ კონსულტაციებს ვაძლევდი და მეტსაც ვეხმარებოდი, მაშინ ამის მსგავსი ილუზია მათ არ ჰქონიათ. საერთოდ, ქვების სროლით მოვიდნენ თუ გახსოვთ. ჩემი მოუმზადებლობის და არგაცნობიერების ბრალიც იყო ის, რომ ვცდილობდი, ისეთები ყოფილიყვნენ როგორებიც გვინდოდა. მათი სახის გვიან გამოჩენაში დიდი როლი მიმიძღვის, რამეთუ დიდ ანგარიშს მიწევდნენ და კარგად ხედავდნენ რა მინდოდა და რას ვითხოვდი მათგან.
ერთხელ მახსოვს, როდესაც ვსაუბროდით მერაბიშვილს სამჯერ გავუმეორე, მე იმ სააკაშვილს ვესაუბრები 15 წლის მერე რომ იგივე პროცენტით მოვა ხელისუფლებაში-თქო და მკითხა, რა გაქვთ მხედველობაშიო. ის, რომ ორი დაამთავროთ (ხელისუფლებაში ყოფნის პერიოდი), მერე გამოტოვოთ რაც კონსტიტუციით გეკუთვნით და ისეთი პოპულარობით წავიდეს, რომ უკან ასეთივე რეიტინგით მოვიდეს. მერაბიშვილმა მითხრა: ეგ ჩვენთან აღარ თქვა, მაგას ჩვენ ვერ ვგეგმავთო. ერთ და ორ კვირაზე ვგეგმავთ როგორ გადავაგოროთო", _ აღნიშნა ბიძინა ივანიშვილმა.
გარდა ამისა, ივანიშვილმა აღნიშნა, რომ მასთან სააკაშვილს "მოწიწებითი" დამოკიდებულება ჰქონდა.
"მეც არ მქონია ცუდი დამოკიდებულება. მივიდოდი, მხვდებოდა. აუცილებლად მაცილებდა, თვალებში მიყურებდა არაფერი მწყენოდა. მას ჰქონდა მოწიწებითი და კულტურული დამოკიდებულება. ერთი უღირსი სიტყვა არ უკადრებია არასდროს", _ აღნიშნა ივანიშვილმა.
თუმცა, იქვე დასძინა, რომ "ნაციონალური მოძრაობის" ძირითადი პრობლემა ის იყო, რომ ქვეყანას ძალადობით მართავდნენ.
"დღესაც თუ ნახავთ მათ ხელწერას, მხოლოდ ძალადობას ვერ ანებებენ თავს. ეს არის მთელი პრობლემა დღევანდელი „ნაციონალური მოძრაობისაც“. მათ უარი უნდა თქვან ძალადობაზე. ძალადობით მართავდნენ. აბა, ნახეთ და გაიხსენეთ, ერთ-ერთი მათი ლიდერის ჭიაბერაშვილის ნაწერები. ამბობს ჭიაბერაშვილი, რომ ქაოსურ დემოკრატიას სტაბილური ავტოკრატია სჯობსო. ეს უნდოდა დასავლეთსაც და მათაც.
ხალხს აშინებდნნენ, თუ ისე არ მოიქცევით, როგორც ჩვენ გვინდა, შეხვალთ ციხეში და ნახავთ რაც მოგივათო. ხშირად, აბსოლუტურად უდანაშაულო ადამიანს იჭერდნენ, რომ მეზობელს დაენახა, შენც თუ არ გაჩერდები იგივე მოგელისო. ციხეებშიც რაც ხდებოდა, ამას თვითონვე ავრცელებდნენ. ციხეში თუ მოხვდებოდი, ახლოს იყავი სიკვდილთან", _ განაცხადა ივანიშვილმა.
ივანიშვილის ჟურნალისტებთან შეხედრა ამ წუთებშიც მიმდინარეობს.
