გუბერნატორმა კი თავდაპირველად ისე გაიოცა ეს ფაქტი, თითქოს არაამქვეყნიურ მოვლენაზე ვესაუბრებოდით: _ ვინაობა მითხარით მაგ ქალბატონის და მერე ვილაპარაკოთ, _ გაგვიცხადა ამ ინფორმაციით “გაოცებულმა” ვალერი ჩიტაიშვილმა.
თუმცა, მოგვიანებით, ყველაფერი “გაახსენდა”…
დავით ჭეფხოძე, განყოფილების ინსპექტორი, ზედამხედველობას უწევს დაცვის თანამშრომლებს: _კი ბატონო, მსგავსი ფაქტი იყო ნამდვილად, ანერვიულდა ქალბატონი, მაგრამ დაცვას ნამდვილად არ უცემია, ეგ გამორიცხულია. იმ დღეს მოხდა სულ სხვა ფაქტი, ქალბატონი იყო ძალიან ანერვიულებული, ვინ და რაზე მოუშალა ნერვები, ნამდვილად არ ვიცი, ჩვენ გავაჩერეთ ადგილზე, დავაწყნარეთ.
_ როგორც ვიცით, ქალბატონი სასოწარკვეთილი ცდილობდა შენობაში შესვლას, მაგრამ არ შეუშვით ადმინისტრაციულ შენობაში, სადაც გუბერნატორთან და გამგებელთან შეხვედრას ითხოვდა.
_ კი, კი… იყო ასეთი რამ. მაგრამ როცა ავუხსენით ყველაფერი, დამშვიდდა. საშვიც გაუკეთდა.
_ ვისთან ითხოვდა შესვლას?
_ გუბერნატორთან. მიიღეს მერე გუბერნატორმაც და გამგებელმაც და დააკმაყოფილეს. ვიღაცამ მოუშალა ნერვები, _ რის სახლს ითხოვ, ვინ მოგცემს სახლის ფულს ახლა შენო, არ მიგიღებენ, ტყუილად ყვირიხარო და ამაზე გადაირია ქალი.
_ ხომ არ იცით, ვინ იყო ის პიროვნება, ვინც ამ სიტყვებს ეუბნებოდა?
_ არ ვიცი. საბოლოოდ დავაწყნარეთ ქალბატონი. საიდან მოვიდა ეს ინფორმაცია თქვენთან? ეს ალბათ მაშინ, როცა ქალბატონი აფექტურ მდგომარეობაში იყო. ისე, იცოდეთ რომ ჩვენ არავის ხელს არ დავარტყამთ, ეს გამორიცხულია.
ოზურგეთის მუნიციპალიტეტის სოფელ ნატანების მკვიდრი გულნარა სიორიძე “გურია ნიუსთან” თავის გაჭირვებაზე ჰყვება: _ ლაპარაკისაც მეშინია, ქუჩაში ვარ, უსახლკარო, სახლი დამეწვა. ამათ ბაქრაძემ გამოუგზავნა წერილები, _ დაეხმარეთო, დაცვამ კი ხელი მკრა, არ შემოხვიდეთო, მიყვირეს. მინდოდა მენახეთ შვილო, ბევრი რამ მაქვს მოსაყოლი _ რამდენი წერილი მაქვს გაგზავნილი ხელისუფლებაში… დამწვარი მაქვს სახლი; შვილის ოჯახში ვცხოვრობდი, მაგრამ ის ოჯახი ვალში წაიღეს… ავადმყოფი შვილი მყავს. კი გამაჩერეს ერთხანს ამ სახლში და ახლა გამომიშვეს. გადააგდეს ჩემი ავადმყოფი შვილი ქუჩაში და ეს ყველამ იცის უკვე. გუბერნატორი და გამგებელი დახმარებას დამპირდნენ, მაგრამ არაფერი ჩანს, მატყუებენ. ძალიან მიჭირს, მოვალ და მოგიყვებით ყველაფერს. იმ დღეს, გავუძალიანდი დაცვას, დავიწყვე ყვირილი, მიშველეთ-მეთქი, ასვლა მინდოდა გუბერნატორთან, არ გამიშვეს… რაა ეს საშვი და უბედურება?!
დავჯექი გუბერნიის წინ და დავიწყე ტირილი, რომ ახლა იმ ჭკუაზე ვარ, თავს არ ვიცოცხლებ, შევალ გუბერნიაში და გადმოვხტები მეორე ან მესამე სართულიდან,-მეთქი. ეს იმ დღესაც მინდოდა გამეკეთებინა… დამემალა ყველა… არც საშვი არ მომცეს… მოკლედ, არ უნდოდათ რომ შევსულიყავი. დამალევინა წამლები გუბერნიის თანამშრომელმა ცუდად რომ გავხდი, მერე დამაწყნარეს _ გამოვუშვებთ გამგებელს, გაჩერდიო, მაგრამ არ გამოჩნდა. არც დღეს შემომხმიანებია ვინმე. სანამდე და როგორ ვირბინო, შვილო, ნატანებიდან ოზურგეთამდე ყოველდღე? დიაბეტიანი, გულით ავადმყოფი ვარ, 76 წლის ქალი, სად შემიძლია? ავადმყოფი შვილი მყავს, 54 წლის, დამეხმაროს იქნება ვინმე.
პრეზიდენტი რომ იყო ჩამოსული და გახსნა იუსტიციის სახლი, არ მიმიშვეს. პრეზიდენტის ნახვა მინდოდა, ვეტყოდი ჩემს გაჭირვებას-მეთქი, მაგრამ ჩიტაიშვილმა მომატყუა, _ ოღონდ ახლა გაჩერდი და მე დაგეხმარები პირადადო. მერე რომ ვნახე, მითხრა, რასაც შენ ითხოვ, იმის საშუალება არ მაქვსო. ასე ამომხდება სადღაც სული ან თავს მოვიკლავ, _ ამბობს გულნარა სიორიძე.
გურიის გუბერნატორი ვალერი ჩიტაიშვილი “გურია ნიუსთან” საუბარში აცხადებს, რომ დახმარება ამ ქალბატონს რამდენიმეჯერ გაუწია და მისი თქმით, კვლავ დაეხმარება: _ იცით თუ არა, რომ მაგ ქალბატონს ჩვენგან დახმარება აქვს მიღებული? მაგ ქალბატონს ჩვენ შევთავაზეთ სახლის დაქირავება. ეგ არის სოციალური პაკეტის პროგრამიდან შესაძლებელი და იმის მიხედვით კეთდება დახმარება, რაც კანონმდებლობით არის გათვალისწინებული. ამ ქალბატონს ჯერ კვლავ შესაძლებელია, რომ ვუქირავოთ სახლი, რადგან მუნიციპალიტეტის მთავარი პრიორიტეტი თავისთავად არის ის, რომ ადამიანი არ იყოს გარეთ… თუმცა მაგ ადამიანს აქვს სხვა პრობლემაც, ავად ჰყავს შვილი და მასთან დაკავშირებით.
_ ბატონო ვალერი, როგორც ამ ქალბატონმა მითხრა, დღეს ქუჩაშია და თავშესაფარი არ აქვს.
_ არა, ქუჩაში ნამდვილად არ არის, ცხოვრობს ყოფილ სახლში. ჩვენ შეგვიძლია ამ ქალს ქირავნობასთან დაკავშირებით დავეხმაროთ და დავეხმარებით აუცილებლად.
_ ის ქალბატონი თქვენთან შეხვედრას ითხოვდა ორი დღის წინ, შეხვდით? როგორც ვიცით, არ ამოუშვეს ადმინისტრაციული შენობის მეორე და მესამე სართულზე.
_ მე პირადად, მასთან სახლში ვარ ნამყოფი, რამდენიმე კვირის წინ გამგებელთან ერთად. შეგიძლიათ ეს ინფორმაციაც გადაამოწმოთ.
_ ამ ქალბატონს შეხვდით თუ არა ორი დღის წინ?
_ მიღებაზეც შენახვედრი ვარ და პირადად სახლში მივაკითხე, _ ამბობს ჩიტაიშვილი.
