“ქომაგში” განცხადების დაწერის გამო, მძიმე ავადმყოფი მოდულში ორჯერ მიიყვანეს

_ გია წაიყვანეს საავადმყოფოდან, სადაც რამდენიმე დღის წინ, ჩაუტარდა უმძიმესი ოპერაცია. მოგეხსენებათ, მისი ჯანმრთელობის მდგომარეობა როგორია და ძალიან შეშფოთებული ვარ მომხდარის გამო. ნამდვილად ვერ ვპოულობ მიზეზს, რაც შეიძლება გიას დაკავების საფუძველი გამხდარიყო. ალბათ, ესეც პოლიტიკას უკავშირდება. არ არის გამორიცხული, მალე მეც მომადგნენ, _ გვითხრა “დაიცავი საქართველოს” ყოფილმა ხელმძღვანელმა ლანჩხუთში, ეკა ალექსაიამ.

როგორც გავარკვიეთ, დაკავებამდე ოთხი დღით ადრე, გია ქურიძემ მართლაც გაიკეთა საკმაოდ მძიმე ოპერაცია, ფილტვებიდან ამოუღეს წყალი. მას ჯანმრთელობის მხრივ სხვა პრობლემებიც ჰქონდა და ბოლო პერიოდში სისტემატურად გადიოდა მკურნალობის კურსს.

დაკავების დეტალები უშუალოდ ოჯახის წევრებისგან შევიტყვეთ: “დილით საავადმყოფოში მოვიდა 3 ახალგაზრდა, რომლებმაც წარმოადგინეს საბუთი, რომ ისინი იყვნენ სოდ-ის თანამშრომლები. რა თქმა უნდა, ჩვენ გაგვიკვირდა ყოველივე. მით უფრო, რომ გია შეუძლოდ იყო ახალნაოპერაციევი, მაგრამ არაფერმა გაჭრა _ საავადმყოფოდან პირდაპირ “მოდულის” შენობაში გადაიყვანეს,” _ გვითხრა ნანა შაინიძემ.

როგორც ცნობილია, გია ქურიძე გასულ წელს “ქართული პარტიის” რაიონულ ორგანიზაციაში გაწევრიანდა; ოპოზიციაში მის გადასვლას სკანდალი მოჰყვა. მაშინ ქურიძეს თეატრის რეჟისორის თანამდებობის დატოვება მოუხდა. მოგვიანებით, “ქართული პარტიის” ადგილობრივი ოფისის სხვა ლიდერებთან ერთად, თავმჯდომარეს მერაბ ქარჩავას (იგი მიმდინარე წლის მარტში დიდი ოდენობით ნარკოტიკული ნივთიერების შენახვა-რეალიზაციის ბრალდებით დააკავეს და დღემდე პატიმრობაშია. ოპოზიციაში მიაჩნიათ, რომ ქარჩავას დაკავება პოლიტიკური ნიშნით მოხდა. რედ.) ღიად დაუპირისპირდა, რის შემდეგაც უმრავლესობამ პარტია დატოვა. მათ შორის გია ქურიძეც გახლდათ. ამის შემდეგ იგი კარგა ხანს განიხილებოდა “ქართული ოცნების” ლანჩხუთის ორგანიზაციის შესაძლო თავკაცად. მეტიც, ამის შესახებ ინფორმაციაც გავრცელდა, თუმცა, მოგვიანებით სიტუაცია შეიცვალა _ “ქართულმა ოცნებამ” ლანჩხუთში აქცენტი სულ სხვა პერსონებზე გააკეთა. ამის მიუხედავად, იგი “ქართული ოცნების” აქტივისტად მოიაზრებოდა. გავრცელებული ინფორმაციით, ახალშექმნილი ორგანიზაცია “ქომაგი” მისთვის თეატრის რეჟისორის თანამდებობიდან პოლიტიკური ნიშნით გათავისუფლების გამო, კომპენსაციის გადახდას აპირებდა.

ჩვენ დაკავების დეტალებზე ნანა შაინიძეს ვესაუბრეთ:

_ რა ვითარებაში მოხდა გია ქურიძის დაკავება?

_ საავადმყოფოში მოვიდნენ სამართალდამცველები, რომლებმაც სოდ-ის დოკუმენტაცია წარმოადგინეს და მოითხოვეს გიას წაყვანა.

_ როგორც ვიცით, მან ამ დღეებში ოპერაცია გაიკეთა და შეიძლებოდა მისი ასე გადაადგილება?

_ რა თქმა უნდა, არა! ოპერაციამდეც მისი მდგომარეობა მძიმე იყო, ყველამ კარგად იცით, რომ ჯანმრთელობის სერიოზული პრობლემები აქვს. მისი განძრევაც არ შეიძლებოდა, არათუ გადაადგილება.

_ როგორ მოხდა მისი წაყვანა, საკაცით?

_ არა, ხელი მოკიდეს და ასე ჩაიყვანეს მანქანამდე.

_ კი, მაგრამ, საავადმყოფოს ექიმებმა ეს არ გააპროტესტეს? ან თქვენ არ უთხარით სამართალდამცველებს, რომ მისი ჯანმრთელობის მდგომარეობა მძიმე იყო?

_ კი, ვუთხარით, მაგრამ ჩვენ ვინ დაგვიჯერებდა? გია არ დაბნეულა და უთხრა _ ვიცი, რისთვისაც ხართ მოსული _ ეს ყოველივე ჩემი “ქართულ ოცნებასთან” ურთიერთობას უკავშირდებაო.

_ იმათ რა უპასუხეს?

_ წამოდით და იქ გაიგებთ, თუ რას უკავშირდებაო. რაც შეეხება ექიმებს, იმ დროისთვის საავადმყოფოში მკურნალი ექიმი არ იყო. სოდ-ის წარმომადგენლებმა გვითხრეს, რომ შეთანხმებული იყვნენ. ექიმებს დაემუქრნენ, წინააღმდეგობა რომ გაეწიათ, მათაც პრობლემას შეუქმნიდნენ. ისედაც მძიმე მდგომარეობაშია და კიდევ ფსიქოლოგიური ზეწოლა უნდა?

_ სამართალდამცველებს არ შესთავაზეთ, რომ დაკითხვა იქვე, საავადმყოფოში ჩაეტარებინათ?

_ როგორ არა! ვუთხარი, ექიმს ჰკითხეთ და აქ დაკითხეთ-მეთქი, მაგრამ არა, უნდა წავიყვანოთო. როგორც ველოდით, გია ძალიან ცუდად გახდა და ისევ საავადმყოფოში დააბრუნეს.

_ რომელ საავადმყოფოში?

_ სადაც იწვა, ინფექციურში.

_ ხომ არ შეეშალათ და სხვის ნაცვლად ხომ არ წაიყვანეს?

_ ორჯერ შეცდომით წაიყვანდნენ?

_ ვერ გავიგე, ორჯერ რატომ?

_ ჯერ დილით მოვიდნენ და წაიყვანეს. მალევე მოაბრუნეს. შემდეგ მეორედ წაიყვანეს, როცა ცუდად გახდა და ისევ მოაბრუნეს.

_ მას ადვოკატი აყვანილი ჰყავს?

_ კი.

_ ახლა როცა მოაბრუნეს საავადმყოფოში, გამოდის, რომ გაათავისუფლეს?

_ არა, გამომძიებელი მოვა და აქ დაკითხავს. თავიდან გვითხრეს, რომ სულ რაღაც 2 კითხვა ექნებოდა. შემდეგ გვითხრეს, რომ მოწმის სახით კითხავდნენ.

ჩვენი ინფორმაციით, გია ქურიძე საღამოს ინფექციურ საავადმყოფოში დაკითხეს. ჩვენ მას სწორედ ამის შემდეგ ვესაუბრეთ:

_ რა საკითხზე მოხდა თქვენი დაკითხვა?

_ “ქომაგში” განცხადების დაწერის გამო. მკითხეს _ მივიღე თუ არა თანხა, ან ვიღებდი თუ არა მონაწილეობას ამომრჩევლის მოსყიდვაში და ა. შ. სხვა რაიმე მნიშვნელოვანი კითხვა არ ყოფილა.

_ ამისთვის წაგიყვანეს ავადმყოფი კაცი “მოდულში”?

_ ჰო, ეს არის საწყენი, თორემ კითხვების დასმა პრობლემა არაა. კი, ბატონო, შევიტანე განცხადება “ქომაგში”, დავთანხმდი მის გასაჯაროებას. აქ ხომ დამისვეს ეს კითხვები, როცა ორჯერ კომაში ჩავვარდი და მოდულიდან უკან მომაბრუნეს? თავიდან არ შეეძლოთ ასე გაეკეთებინათ? თქვენ წარმოიდგინეთ, არც წაყვანა იყო პრობლემა, მიუხედავად იმისა, რომ ოპერაცია 4 დღის წინ გავიკეთე, მაგრამ მთელი დღე ის არ ვიცოდი, რატომ მივყავდი და ასეთ ფსიქოლოგიურ ზეწოლას ვეღარ გავუძელი, რადგან ჯანმრთელობის მდგომარეობა გართულებული მაქვს.

ჩვენ ასევე ვესაუბრეთ ერთ-ერთ ოპოზიციონერს, რომელმაც საკმაოდ საინტერესო ინფორმაცია მოგვაწოდა: “როცა გია დააკავეს, ჩვენ ეს “ქართულ ოცნებას” დავუკავშირეთ. ამ დროს კი რა ხდება? კოალიციის სათავო ოფისმა ლანჩხუთში გადარეკა, სადაც ადგილობრივ ოფისში უთხრეს, რომ გია ქურიძე მათი პარტიის წევრი არაა… რამ შეაშინათ? ან ახლა რომ ასე შეშინებული არიან და ავადმყოფი კაცი, ფაქტობრივად, გაწირეს, როცა უფრო რთული სიტუაცია იქნება, რას იზამენ? როცა ასეთ აქტივისტს არ დაიცავენ, რიგითი მოქალაქე რის იმედზე უნდა იყოს? ან ამათი იმედი აქვს “ქართულ ოცნების” სათავო ოფისში? კიდევ კარგი, რომ მხოლოდ მათ განცხადებას არ ენდნენ და კოალიცია აქტიურად ჩაერთო, რომ გია საავადმყოფოში დაებრუნებინათ.”

როგორც “ქართული ოცნების” ლანჩხუთის ოფისში აცხადებენ, გია ქურიძე მათი შტაბის წევრი არ ყოფილა, ხოლო ადამიანურად, ასეთ დაკავება-დაკითხვებს აპროტესტებენ.