სამთავრობო ჯიპს ადგილობრივი გამგეობისა და საკრებულოს მაღალჩინოსნებიც მოჰყვნენ. ლანჩხუთის მუნიციპალიტეტის გამგებელმა გიორგი გოგუაძემ სტუმრის წარდგენის შემდეგ, “ინფო9”-ის ჟურნალისტებისთვისაც მოიცალა და მათი მისამართით აგრესიული რეპლიკები არ დაუშურებია. გოგუაძემ განაცხადა, რომ კვლავაც აგრძელებს მუშაობას, რომ ეს ერთ-ერთი სამუშაო შეხვედრაა და არაფერი აქვს საერთო მომავალ არჩევნებთან.
მან მალევე დატოვა შეხვედრა და გამოუცდელი ახალგაზრდა პოლიტიკოსი ხალხის პირისპირ მარტო დატოვა. თავიდან ყაველაშვილი სტანდარტული ჩინოვნიკური ფრაზებით შეეცადა მთავრობის წარმატებებზე და მომავალ გრანდიოზულ გეგმებზე ესაუბრა, მაგრამ სიტუაცია სხვანაირად განვითარდა _ გაჭირვებით, უმუშევრობით და ტყუილი დაპირებებით დაღლილი გვიმბალაურელები მინისტრის დამფრთხალი მოადგილისგან ცდილობდნენ პასუხების მიღებას.
გიორგი ყაველაშვილი კი ამტკიცებდა, საარჩევნოდ არ გამოუგზავნივარ ხელისუფლებას, თქვენი პრობლემების მოსაგვარებლად მოვედიო, მაგრამ გაღიზიანებული ხალხი მას თითქმის აღარ უსმენდა.
სოფელ გვიმბალაურის მოსახლეობის თითქმის 80 პროცენტი უკმაყოფილებას არ მალავდა დღევანდელი პოლიტიკისა და ქვეყანაში არსებული უამრავი მოუგვარებელი პრობლემის გამო. ხალხი პასუხს ითხოვდა ყველაფერზე, რაც ასე აწუხებს სოფლის მოსახლეობას: დაწყებული სასუქის ფასით, ამერიკული თეთრი პეპლის შემოსევით დამთავრებული.
რატომ მოავლინეს სრულიად გამოუცდელი, ხალხთან ლაპარაკს მიუჩვეველი კადრი მაღალი ეშელონებიდან, ცოტა გაურკვეველია. ეტყობა “ნაციონალურ მოძრაობას” გამოცდილი პოლიტიკოსები აღარ ყოფნის საქართველოს ყველა სოფელსა და დასახლებულ პუნქტში გასაგზავნად.
ენერგეტიკის მინისტრის მოადგილემ ისე დატოვა შეხვედრა, რომ ხალხის მიერ დასმულ ვერც ერთ კითხვაზე დამაკმაყოფილებელი პასუხი ვერ გასცა.
