"თელავის მუნიციპალიტეტის მერია გაცნობებთ, დასრულდა ბახტრიონის ქუჩის რეაბილიტაციის პროექტი", "იყალთოს ქუჩის მოასფალტების პროექტი", "იყალთოს სასმელი წყლის შიდა ქსელების რეაბილიტაციის პროექტი", "წინანდლის შიდა გზების მოასფალტების პროექტი", "სოფელ ფარცხანაყანევში საბავშვო ბაღის მშენებლობის პროექტი", _ დასრულებული ინფრასტრუქტურული პროექტების შესახებ მსგავსი ინფორმაცია უკვე ორი კვირაა დაახლოებით 20-მდე მუნიციპალიტეტიდან "მაგთიკომის" აბონენტებს მისდით.
ბათუმის, ქობულეთის, ქუთაისის, ხაშურის, წყალტუბოს, მარტვილის, ზუგდიდის, თელავის, ოზურგეთის, ზესტაფონის, ქედის, ფოთის, სენაკის და ახალციხის მუნიციპალიტეტებმა სმს შეტყობინებების გაგზავნა 15 სექტემბრიდან დაიწყეს და დღემდე გრძელდება.
არჩევნებამდე 3 კვირით ადრე შეტყობინებების გაგზავნაში არასამთავრობო ორგანიზაციების ნაწილი ადმინისტრაციული რესურსის ირიბად გამოყენების საკითხზე საუბრობს; თუმცა, მუნიციპალიტეტები ამას კატეგორიულად უარყოფენ და აცხადებენ, რომ SMS შეტყობინებების გაგზავნა წლის დასაწყისშიც მათი პრიორიტეტული მიმართულება იყო; ისინი უბრალოდ ინფრასტრუქტურული სამუშაოების დასრულებას ელოდებოდნენ.
რა მიზანს ემსახურება SMS შეტყობინებების გაგზავნა მოსახლეობისთვის, ვინ აფინანსებს ამ კამპანიას, რამდენი ლარია ბიუჯეტიდან გამოყოფილი მომსახურებისთვის და საიდან აქვს მუნიციპალიტეტებს წვდომა მოქალაქეთა პირად მონაცემებზე, _ ამ კითხვებით "გურია ნიუსმა" 22-24 სექტემბერს საჯარო ინფორმაციის მოთხოვნით, ყველა ზემოთხსენებულ მუნიციპალიტეტს მიმართა.
რამდენიმე დღის შემდეგ, გადავამოწმეთ, მიიღეს თუ არა მუნიციპალიტეტებმა ჩვენი განცხადებები. მუნიციპალიტეტების უმრავლესობაში გვიპასუხეს, რომ მათ განცხადებები მიღებული არ აქვთ. ნაწილმა ამის მიზეზად ოფიციალურ ვებ-გვერდებზე მითითებული არასწორი მეილები დაასახელა, ნაწილმა კი აღნიშნა, რომ არა მეილის საშუალებით, არამედ, წერილი ფოსტით უნდა გაგვეგზავნა.
ამიტომ მუნიციპალიტეტებისთვის განმეორებით წერილობით მიმართვა გახდა საჭირო.
აქვე უნდა აღინიშნოს, რომ მუნიციპალიტეტების ნაწილმა ჩვენს განცხადებას დაუყოვნებლივ უპასუხა, დანარჩენების პასუხს კი "გურია ნიუსი" მოწოდებისთანავე შემოგთავაზებთ.
"გურია ნიუსისთვის" გამოგზავნილი ინფორმაციიდან ირკვევა, რომ მუნიციპალიტეტებს SMS შეტყობინების სერვისით სარგებლობაზე კონტრაქტი კომპანია "მაგთიკომთან" აქვს გაფორმებული, თუმცა, ვერცერთი მუნიციპალიტეტი ვერ აკონკრეტებს რამდენ ადამიანს უნდა გაეგზავნოს შეტყობინება და კონტროლდება თუ არა, რომ მათ ტერიტორიაზე არმცხროვრებ მოქალაქეს შეტყობინება არ მიუვიდეს.
მარტვილი
როგორც მარტვილის მუნიციპალიტეტის გამგეობიდან "გურია ნიუსს აცნობეს", კამპანია მოსახლეობის ინფორმირებულობას ემსახურება და ის ადგილობრივი თვითმმართველობის ბიუჯეტიდან ფინანსდება. თუმცა, ჩვენთვის გამოგზავნილ წერილში აღნიშნული არ არის, რა რაოდენობის თანხის გადახდა მოუწევს მუნიციპალიტეტს.
"კონკრეტული დაზუსტებული თანხის ოდენობა გათვალისწინებულია დამტკიცებული ბიუჯეტის ფარგლებში. "კავშირგაბმულობისთვის" გამოყოფილი თანხებიდან ხდება გადახდა გაგზავნილი სმს–ების რაოდენობის მიხედვით. ამ საკითხის მარეგულირებელი სპეციალური ნორმატიული აქტი მარტვილის მუნიციპალიტეტის გამგეობაში არ არსებობს. მოქალაქეთა პირად მონაცემებზე – ტელეფონის ნომრებზე წვდომა არ გვაქვს. "მაგთიკომის" სისტემა უზრუნველყოფს სმს–ების ავტომატურ გაგზავნას. მსგავსი სერვისი სხვა დროს არ განუხორციელებია მუნიციპალიტეტის გამგეობას", _ აღნიშნულია გამგეობიდან გამოგზავნილ წერილში.
(შენიშვნა: შინაარსის სანახავად დააკლიკეთ ფოტოზე)
ზესტაფონი
დაახლოებით იგივე შინაარსის წერილი მივიღეთ ზესტაფონის მუნიციპალიტეტის გამგეობიდანაც, სადაც აღნიშნულია, რომ მომსახურების გაწევა "მაგთიკომს" 2016 წლის 27 მაისის კონსოლიდირებულ ტენდერში გამარჯვების შემდეგ დაეკისრა.
ზესტაფონის მუნიციპალიტეტიდან გამოგზავნილ წერილში აღნიშნულია, რომ "ანგარიშსწორება მოხდება ფაქტიურად გაწეული მომსახურების შესაბამისად, 1 სმს–ის ღირებულება კი 0.0025 ლარია".
აღნიშნული მომსახურება ზესტაფონის მუნიციპალიტეტში ხორციელდება პირველად, თუმცა გაგრძელდება მომავალშიც, როგორც მოსახლეობის ინფორმირებულობის ერთ–ერთი ფორმა", _ აღნიშნულია "გურია ნიუსისთვის" გამოგზავნილ წერილში.
ქობულეთი
ქობულეთის მუნიციპალიტეტის გამგებლის პირველი მოადგილე ირაკლი ცეცხლაძე "გურია ნიუსთან" საუბრისას მუნიციპალიტეტში დანერგილი ახალი სერვისის შესახებ ამბობს, რომ მოსახლეობის ინფორმირება, მუნიციპალიტეტის საქმიანობის ღიაობა, გამჭვირვალობა და საჯაროობა, მათი ერთ-ერთი უმთავრესი მოვალეობაა.
ცეცხლაძეს მიაჩნია, რომ ბიუჯეტიდან ამ მომსახურებისთვის გამოყოფილი თანხა მუნიციპალიტეტს არ აზარალებს.
"ჩვენი მუნიციპალიტეტიდან SMS შეტყობინებების დაგზავნა უახლოეს წარსულში დაიწყო, დაახლოებით 15-20 დღეა. ერთადერთი, რასაც ემსახურება, ეს მოსახლეობის ინფორმირებაა მუნიციპალიტეტში დასრულებულ ინფრასტრუქტურულ ღონისძიებებთან დაკავშირებით. მუნიციპალიტეტის საქმიანობის ღიაობა, გამჭვირვალობა და საჯაროობა, მოსახლეობისთვის ინფორმაციის მიწოდება ერთ–ერთი მთავარი ვალდებულებაა ჩვენი. 21-ე საუკუნეში ვცხოვრობთ, ტექნოლოგიები იძლევა ინფორმაციის სწრაფად გავრცელების საშუალებას და ეს გზა ავირჩიეთ, რისთვისაც ბიუჯეტში თანხები წლის დასაწყისიდან გამოყოფილი გვქონდა. კონსოლიდირებული ტენდერის პირობებში გამარჯვებული გამოვლინდა, რომელიც კორპორაციულ მომსახურებას გვიწევს და ამ მომსახურების პარალელურად მას აქვს ვალდებულება სმს მომსახურება გაგვიწიოს ჩვენი მოთხოვნის შემთხვევაში. "მაგთი" არის პოვაიდერი", _ აღნიშნავს ცეცხლაძე.
რაც შეეხება კონკრეტულ თანხას, რომელიც ამ მომსახურებისთვის მუნიციპალიტეტის ბიუჯეტმა უნდა გადაიხადოს, გამგებლის მოადგილე ვერ ასახელებს.
"საერთო ჯამში ზეპირად ნამდვილად არ მახსოვს რა თანხებზეა საუბარი კორპორაციულ მომსახურებებზე. ეს არის კორპორაციული მომსახურების ერთ–ერთი შემადგენელი ნაწილი და ზეპირად არ შემიძლია ამის დასახელება. როგორც ვიცი, დაახლოებით, 32 ლარი ჯდება ერთ ჯერზე SMS –ის გაგზავნა ყველა აბონენტისთვის. რა თანხა დაუჯდება ამ მომსახურების გაწევა ბიუჯეტს, ამის ახლა თქმა არ შემიძლია. უნდა ვიანგარიშოთ იმის მიხედვით, რამდენი ინფრასტრუქტურული პროექტი დასრულდება. ყველა ინფრასტრუქტურული ღონისძიების შესახებ, რა თქმა უნდა, ინფორმაციას არ ვაგზავნით. SMS შეტყობინებებს მხოლოდ მსხვილ პროექტებზე ვაგზავნით. ვფიქრობ, ასეთი მსხვილი პროექტი მუნიციპალიტეტში, რაზეც ინფორმაცია გაიგზავნება დაახლოებით 50 იქნება. შესაბამისად, ჯამში ბიუჯეტი ამ SMS შეტყობინებების გაგზავნისთვის 1500 ლარს დახარჯავს. ამ დროისთვის დაახლოებით 12 ინფრასტრუქტურული ღონისძიების დასრულების შესახებ გვაქვს გაგზავნილი ინფორმაცია, შესაბამისად, ბიუჯეტიდან 350 ლარამდეა დახარჯული", _ აღნიშავს ცეცხლაძე და დასძენს, რომ მსგავსი ღონისძიებები მომავალ წელსაც გაგრძელდება.
ცეცხლაძე გამორიცხავს, რომ SMS შეტყობინებები ქობულეთის მუნიციპალიტეტიდან მათი ინფრასტრუქტურული პროექტების დასრულების შესახებ, სხვა მუნიციპალიტეტების მაცხოვრებლებსაც მისდიოდეთ.
"აბონენტებს, ვისაც SMS –ები ეგზავნებათ, მათ მონაცემებზე, რა თქმა უნდა, მუნიციპალიტეტს ხელი არ მოუწვდება, ამას "მაგთი" იღებს თავის თავზე. არც ის ინფორმაცია მაქვს რამდენ აბონენტს ეგზავნება შეტყობინება და არის თუ არა ეს ყველა აბონენტი ქობულეთის მუნიციპალიტეტს მცხოვრები. ასეთ ინფორმაციას არ ვფლობ, ეს არავის უთქვამს", _ აღნიშნავს ცეცხლაძე.
ქობულეთის მუნიციპალიტეტის გამგებლის მოადგილე კატეგორიულად უარყოფს არასამთავრობო ორგანიზაციების მიერ გამოთქმული ვარაუდის სისწორეს, რომ სმს შეტყობინებების გაგზავნა წინასაარჩევნოდ ადმინისტრაციული რესურსის გამოყენების ნიშნებს შეიცავს.
"არასამთავრობო ორგანიზაციების წარმომადგენლებს საკუთარი სუბიექტური მოსაზრება აქვთ ისევე, როგორც ჩვენი მოსაზრება. მე, როგორც საჯარო მოხელე, გეტყვით, რომ ამ კუთხით არანაირ კანონდარღვევას არა აქვს ადგილი. ეს არ ემსახურება წინასაარჩევნო კამპანიას, ეს არის მოსახლეობისთვის მარტივი წესით ინფორმაციის მიწოდება მუნიციპალიტეტის საქმიანობაზე. თუ იმაზე აპელირებენ, რომ ბიუჯეტის დამტკიცებიდან დღემდე თითქმის 10 თვეა გასული და SMS შეტყობინებების გაგზავნა ახლა დავიწყეთ, გეტყვით, რომ ინფრასტრუქტურული სამუშაოს დასრულებას დრო სჭირდება. აპრილში ვერ გავაგზავნიდი SMS რომ ღონისძიება დასრულდა, ტენდერიც არ იყო გასული. მუნიციპალიტეტში ღონისძიებები სრულდება აგვისტოს ბოლოდან დეკემბრის ბოლომდე", _ აღნიშნა ცეცხლაძემ "გურია ნიუსთან" საუბრისას.
ოზურგეთი
ოზურგეთის მუნიციპალიტეტის გამგეობიდან "გურია ნიუსმა" მოთხოვნილ ინფორმაციასთან ერთად იმ ხელშეკრულების ქსეროასლიც მიიღო, რომელიც კომპანია "მაგთიკომთან" მუნიციპალიტეტმა დადო.
ხელშეკრულებაში ვკითხულობთ, რომ მომსახურების საორიენტაციო ღირებულება 24 000 ლარია. ხელშეკრულება ძალაში შედის მისი ხელმოწერის დღიდან და 2017 წლის 1 მარტამდე მოქმედებს.
"მომსახურების გაწევის ადგილია საქართველო, ხოლო როუმინგის შემთხვევაში შესაბამისი ქვეყანა. მომსახურების გაწევა ხორციელდება 2016 წლის 1 მარტიდან 2017 წლის 31 იანვრის ჩათვლით", _ აღნიშნულია ხელშეკრულებაში, რომელსაც ხელს ოზურგეთის მუნიციპალიტეტის გამგებლის მოვალეობის შემსრულებელი არჩილ ყაზაიშვილი აწერს.
"მაგთიკომის" პასუხი
მუნიციპალურ SMS -ებთან დაკავშირებით კითხვებით "გურია ნიუსმა" კომპანია "მაგთიკომსაც" მიმართა. კომპანიისგან ვითხოვდით:
რამდენ მუნიციპალიტეტთან აქვთ ხელშეკრულება გაფორმებული რომ გაუგზავნოთ მუნიციპალიტეტების მცხოვრებლებს SMS შეტყობინებები ინფრასტრუქტურული თუ სხვა სახის ღონისძიებების შესახებ; რა არის ერთი SMS -ის ღირებულება; აქვთ თუ არა კონკრეტული ბაზა, რომელ აბონენტებს უნდა გაეგზავნოთ ეს SMS და რის მიხედვით არჩევენ აბონენტს ვინ უნდა მიიღოს შეტყობინება? აქვთ თუ არა ინფორმაცია, რომ SMS შეტყობინებები სხვადასხვა მუნიციპალიტეტის მაცხოვრებლებს მისდით ისეთი მუნიციპალიტეტიდან, რომელთანაც შეხება არ აქვთ; რამდენ აბონენტს გაეგზავნა მსგავსი შეტყობინებები?_ თუმცა, "მაგთიდან" არცერთ ჩვენს კითხვაზე პასუხი არ მიგვიღია.
კომპანიიდან ზოგადი წერილი გამოგვიგზავნეს, სადაც აღნიშნულია:
"ინფორმაციის დაცულობა მაგთიკომისთვის პრიორიტეტია და ის უმკაცრეს კონტროლს ექვემდებარება. მაგთიკომი აბონენტთა პერსონალურ მონაცემებს არავის არ გადასცემს და არც არავის არ შეიძლება ჰქონდეს წვდომა მაგთიკომის აბონენტთა ბაზასთან. რიგი კომპანიები თავად აგზავნიან სარეკლამო შეტყობინებებს საკუთარი რესურსით შექმნილი ბაზების გამოყენებით;
რიგ შემთხვევაში კი რეკლამის დამკვეთი კომპანიები იყენებენ მაგთიკომის მომსახურებას შემდეგი სახით: კომპანია მაგთიკომთან აფორმებს ხელშეკრულებას, რომლის შემდეგ მას ენიჭება მომხმრებლის სახელი, პაროლი და ეძლევა წვდომა მაგთიკომის სმს პორტალზე, სადაც მას შეუძლია მხოლოდ აბონენტთა სასურველი სეგმენტის (რომელთაც მაგთიკომთან გაფორმებული ხელშეკრულების თანახმად, თანხმობა აქვთ გაცხადებული სარეკლამო/საინფორმაციო შეტყობინებების მიღებაზე) ამორჩევა: მაგ: რეგიონის, რაიონის, სქესის მიხედვით და მათთან შეტყობინების გაგზავნა. ხაზგასმით გვინდა ავღნიშნოთ, რომ ეს კომპანიები ვერ ხედავენ აბონენტების ნომრებს და სხვა ინფორმაციას ნომრების მფლობელების შესახებ", _ აცხადებენ "მაგთიკომში".
რაც შეეხება სარეკლამო-საინფორმაციო შეტყობინების გაგზავნისას, "მაგთიკომში" აღნიშნავენ, რომ გათვალისწინებულია მომხმარებლის უფლება და მათ არასასურველი სმს შეტყობინების გამორთვა შეუძლიათ.
"მაგთიკომსა და აბონენტს შორის გაფორმებულ ხელშეკრულებაში დაფიქსირებულია, რომ კომპანიას შეუძლია გაუგზვანოს სარეკლამო საინფორმაციო მოკლე ტექსტური შეტყობინება აბონენტს, თუმცა აბონენტს აქვს უფლება (შეუძლია), ნებისმიერ დროს გააუქმოს მაგთიკომის პორტალის საშუალებით სარეკლამო საინფორმაციო მოკლე ტექსტური შეტყობინების შემდგომი მიღება კომბინაციით *182# OK.
ამ კომბინაციით აბონენტს შეუძლია სრულად გააუქმოს ან გააუქმოს მხოლოდ გარკვეული კატეგორიის შეტყობინებები, მაგ: გააუქმოს ინდივიდუალური შეთავაზებები და დატოვოს შეტყობინებების სიახლეებისა და აქცია/ტარიფების შესახებ.
ამის გარდა, ყველა სარეკლამო შეტყობინებას მოჰყვება გაუქმების კონკრეტული კოდი SMS Off, რომელიც ზღუდავს რეკლამის გამგზავნი კონკრეტული კომპანიისგან შემდგომში სარეკლამო/საინფორმაციო შეტყობინებების მიღებას", _ აღნიშნავენ "მაგთიკომში" და დასძენენ, რომ "კონკრეტული შეტყობინების შინაარსზე პასუხისმგებელია თავად სარეკლამო გზავნილის გამგზავნი კომპანია. "მაგთიკომი" ტექნიკურად ასრულებს აღნიშნულ სამუშაოს",
ცნობისთვის, რამდენიმე დღის წინ "საერთაშორისო გამჭვირვალობს -საქართველომ" გამოქვეყნებულ განცხადებაში აღნიშნა, რომ მუნიციპალური SMS-ები მმართველი პარტიის სასარგებლოდ ირიბად მაინც ადმინისტრაციული რესურსის გამოყენების ნიშნებს შეიცავს".
"მიუხედავად იმისა, რომ აღნიშნულ მოკლე ტექსტურ შეტყობინებებში არ არის მოწოდება მმართველი პარტიის სასარგებლოდ, ცხადია, რომ მოქმედი ხელისუფლების მიერ განხორციელებულ პროექტებზე საუბარი ირიბად მაინც ადმინისტრაციული რესურსის გამოყენების ნიშნებს შეიცავს, მითუმეტეს, რომ მუნიციპალიტეტების უმრავლესობაში მსგავსი სერვისის გამოყენება მხოლოდ ახლა, წინასაარჩევნო პერიოდის დასასრულს დაიწყეს", _ აღნიშნავენ ორგანიზაციაში.
"გურია ნიუსი" აგრძელებს საკითზე მუშაობას და სხვა მუნიციპალიტეტებიდან მიღებულ ინფორმაციას მოგვიანებით შემოგთავაზებთ.
.jpg_21732.jpg)
