ისევ უმუშევარია მისი მეუღლე, გინეკოლოგი მაია პაიჭაძე და ისევ “რაღაცის” მოლოდინში არის ყველანაირი შემოსავლის გარეშე სრულიად უკანონოდ დატოვებული სირაძის სამი შვილი. ეს “რაღაცა” სანდო წყაროებს თუ დავუჯერებთ, ბომბია, რომელიც გურიის დღევანდელი ხელისუფლების სიახლოვეს დევს და რომელიც სირაძის გამოჩენისთანავე აფეთქდება. ჩვენი წყარო ამბობს, რომ სწორედ ამიტომ არ ჩანს სირაძე, რომელსაც, სავარაუდოდ, საქართველო არ დაუტოვებია და მას ის ადამიანები მფარველობენ, რომლებიც მის უკან იდგნენ. ამ ეტაპზე ცნობილი მხოლოდ ის არის, რომ ბახმაროს სკანდალს შეწირული, ჩოხატაურის ყოფილი გამგებელი მამუკა დოლიძე ისევ უსამსახუროდაა და ჩიტიშვილი რაღაც ძალებით ისევ ინარჩუნებს თანამდებობას. მართალია სკანდალის პირველ ფაზაში ჩიტაიშვილის გადაწყვეტილებით (ვითომ მართლა მისი იყო?!) თანამდებობები ბევრ ადამიანს დაატოვებინეს, მაგრამ ჩოხატაურელების გარდა ყველა თანამდებობაზე დაბრუნდა _ ზვიადი უნგიაძე, გია ჩაგანავა, გია გაგუა, ზაზა გოგუაძე.
_ ჩიტაიშვილმა ეს ადამიანები საზოგადოების თვალის ასახვევად გაუშვა. ოზურგეთში ყველა დააბრუნა, ჩოხატაური კი, ამ სიტყვის სრული მნიშვნელობით, ფეხებზე დაიკიდა. სამთავრობო კულუარებში აქტიურად საუბრობდნენ მამუკა დოლიძის საგანგებო სიტუაციების სამსახურის ხელმძღვანელის უფროსად დანიშვნაზე, თუმცა, როგორც ამბობენ, ნიკოლაიშვილია წინააღმდეგი, რაც კიდევ ერთხელ მოწმობს რომ გურიას ისევ ნიკოლაიშვილი მართავს და ჩიტაიშვილი ვერაფერს წყვეტს. გუბერნატორს ერთი ჩვევა აქვს _ არავის ეუბნება თხოვნაზე უარს, თუმცა ყველას ატყუებს. სავარაუდოდ ასე მოექცა დოლიძესაც, რომელმაც არჩევნების დროს ნაციონალებისთვის თავი არ დაზოგა. ამბობენ, დოლიძის დანიშვნა კი უნდა, მაგრამ არ ანებებენო. სწორედ ეს არის სამარცხვინო. მით უმეტეს, რომ 4 თვეა, რაც ამ საკითხზე ჩიტაიშვილი კომენტარსაც კი არ აკეთებს. ალბათ დოლიძესავით მოექცევა სხვა ჩოხატაურელ ჩინოვნიკებსაც, რომელთაც როცა უშვებდა პატრონობას დაპირდა, მაგრამ ამ დაპირებამ სხვა მრავლის მსგავსად, ჩაილურის წყალი დალია, _ აღნიშნა ჩვენთან საუბრისას ხელისუფლებასთან დაახლოებულმა წყარომ.
_ როცა განცხადებები დაგვაწერინა, გუბერნატორი ყველას დაგვპირდა დასაქმებას, მაგრამ ჯერ არაფერი ჩანს. მერეც შევხვდით და დასაქმების პირობაც ხელახლა მივიღეთ, მაგრამ უშედეგოდ. ოზურგეთელები თუ დააბრუნეს, ჩოხატაურელებმა რა დავაშავეთ? თუ დასასჯელები ვიყავით, ყველა ერთნაირად დავსჯილიყავით და თუ ვინმე დააბრუნეს, აეხსნათ მაინც, მაინცდამაინც ისინი რატომ დააბრუნეს, _ გვითხრა ერთ-ერთმა გათავისუფლებულმა.
უნდა ითქვას ისიც, რომ ჩოხატაურის გამგეობის კანცელარიის ყოფილი უფროსი ვარდო სიხარულიძე ისე გაათავისუფლეს, რომ მიზეზები არავის აუხსნია. არადა, სიხარულიძე ის ჩინოვნიკი იყო, რომლის გვარიც ბახმაროს მიწებთან არ დაკავშირებულა. როგორც წყარო ამბობს, მისი მოცილება (სიხარულიძე სვიმონიშვილის კადრი იყო) გაცილებით ადრე იყო დაგეგმილი და ამ სიტუაციაში შემთხვევით მოყვა.
ერთი სიტყვით, მამუკა დოლიძე, გელა ლომინეიშვილი, ვარდო სიხარულიძე, რომან მამალაძე და ვლადიმერ სიხარულიძე ის ადამიანები არიან, რომელთა გათავისუფლება ბახმაროს სკანდალს დაუკავშირეს და რომლებსაც ჩიტაიშვილი სამსახურებში მოგვიანებით დაბრუნებას, წყაროს თქმით, “სიტყვის მასალად” დაპირდა:
_ ეს ყველაფერი იმის დასტურია, თუ როგორ ექცევა ხელისუფლება იმ ადამიანებს, რომლებმაც მათი სკამებისთვის თავი არ დაზოგეს. მამუკა დოლიძის და კიდევ ბევრი გათავისუფლებულის დამსახურებაა, რომ ჩიტაიშვილი თანამდებობაზეა, თორემ არჩევნები რომ წაეგო, მასაც სვიმონიშვილის გზას გაუყენებდნენ. იმ განსხვავებით, რომ სვიმონიშვილს საკუთარი მომავალი საქმიანობა აწყობილი ჰქონდა და პოლიტიკაში შემთხვევით იყო მოხვედრილი, ჩიტაიშვილი კი არჩევნების წაგებით პოლიტიკურ მომავალს საერთოდ დაისამარებდა, _ თქვა ჩვენთან საუბრისას წყარომ.
