ქალაქ ოზურგეთის მკვიდრი, მეგრელაძის ქუჩაზე მცხოვრები, 73 წლის თამარ ვაშალომიძე "გურია ნიუსის" რედაქციას დაუკავშირდა და გვთხოვა, მისი, როგორც დაზარალებული პაციენტის, მდგომარეობის შესახებ მოგვესმინა.
ქალბატონ თამარს შინ ვეწვიეთ და მის მდგომარეობას უფრო ახლოს გავეცანით. როგორც გვითხრა, 36 წლის ასაკიდან უამრავი ოპერაცია აქვს გაკეთებული, ძირითადად, ქალური ავადმყოფობების გამო. მკურნალობაც არ დაუკლია, ოჯახი გვერდით ედგა და დღემდე ასე მოვიდა. მისივე თქმით, იმდენად შეჩვეულია სიკვდილზე ფიქრს, შიშიც გამქრალი აქვს.
_ მოვკვდები და კი ვიქნები მკვდარი, თუმცა, მინდა სერგეენკომ იცოდეს, რა გადამხდა ბათუმის საერთაშორისო ჰოსპიტალში, რომელსაც თურქული ჰქვია და სწორედ უცხოელი ექიმების პროფესიონალიზმის იმედად მივედი იქ, _ გვითხრა თამარ ვაშალომიძემ.
მას, როგორც თავად გვიამბო, ბოლო წლების განმავლობაში ძალიან აწუხებს გული და არაერთხელ გადაიტანა ინფარქტი. განსაკუთრებით მძიმე მდგომარეობა შეექნა 2011 წელს, როცა მწვავე ინფარქტით ქუთაისში, შემდეგ კი თბილისში გადაიყვანეს.
_ 2015 წლამდე გულსისხლძარღვთა დაავადების ცენტრში ვიმკურნალე. არ ვიცი, რანაირად გამოვთქვა კმაყოფილება ექიმების გამო. შემდეგ ჩაფიძის კლინიკაშიც ვიმკურნალე. ექიმებს თავი არ დაუზოგავთ. რა ავადმყოფობა არ მაქვს: მოციმციმე არითმია, იშემიური დაავადება, უკმარისობა…. ერთი თეთრი არ გადამიხდია. ჯანდაცვის პროგრამა მართლა სასწაულია და ჩემნაირი ხალხისთვის შექმნილი… თუმცა, თავიდანაც ხომ ვერ დაიბადები?! რაც შეიძლებოდა, ვიმკურნალე და დავბრუნდი ოჯახში, კვლავ წამლების იმედად და ექიმის მეთვალყურეობის ქვეშ, _ ამბობს ვაშალომიძე და უდიდეს მცდარ ნაბიჯად მიიჩნევს, ახლობლის რჩევით, ბათუმის საერთაშორისო ჰოსპიტალში წასვლას.
_ მითხრეს, რომ ეს კლინიკა მაღალპროფესიონალი თურქი ექიმებითაა დაკომპლექტებული და შესაძლოა, მდგომარეობა გაგიუმჯობესონო. წავიღე ყველა ჩემი სამედიცინო საბუთი _ "ფორმა 100"-თ დაწყებული. მივედი და ჩემი გასაჭირის შესახებ ვუამბე. გადავეცი საბუთები, რომელთა გაცნობის შემდეგ მითხრეს, რომ ერთი კვირის განმავლობაში გამოკვლევას ჩამიტარებდნენ და მერე გამიკეთებდნენ ოპერაციას. დამაწვინეს ერთი კვირით, გამოგიკვლიეთო, მითხრეს და ერთი კვირის შემდეგ ისევ დამიბარეს. გადამახდევინეს 900 ლარი, რომელიც პენსიის წინასწარ გამოტანით, სესხად ავიღე, _ გვიამბობს თამარ ვაშალომიძე და დასძენს, რომ "ეს 900 ლარი რომ წაეგლიჯათ, ამიტომ ჩამიტარეს გამოკვლევა, რაც ისედაც ჩატარებული მქონდა და სისხლძარღვები რომ სუფთა მქონდა, მინიშნებული იყო":
_ დამიკონკრეტეს, ოპერაციას სანამ გაგიკეთებთ, ეს კვლევა გჭირდებაო. მეც დავიჯერე… უბრალოდ, თურქი სპეციალისტების გამორჩეულ პროფესიონალიზმს მივენდე და ვფიქრობდი, იქნებ, გულზე მეტი შვება ვიგრძნო,-მეთქი. საოპერაციო მაგიდაზე ასულს ვენა დამიზიანეს, ისე უხეშად გამიკეთეს ინექცია და მერე მითხრეს, საოპერაციო არ ხარო. ერთ-ერთმა ექიმმა პანიკიორიც კი მიწოდა _ იქნებ, ხერხემალი გაწუხებსო. ისევ კითხვით მივმართე, გამოკვლევა ხომ ჩამიტარეთ და რა მაწუხებს, კიდევ სავარაუდოა,-მეთქი?
ყველაზე დიდი შეცდომა ამ სიბერეში დავუშვი. 900 ლარი კი არა, იქნებ, მეტი დაკარგოს კაცმა, მაგრამ ამ თანხის გამოსატყუებლად რომ მაქინაცია ჩამიტარეს, ესაა უბედურება. მე თქვენი იმედი მაქვს და თხოვნაც მექნება, ეს ამბავი ჯანდაცვის მინისტრის ყურამდე მივიდეს. მინდა, იცოდეს, არაა ის კლინიკა იმის მესამედიც, რასაც ცრუ რეკლამით პოპულისტობენ, _ ამბობს ქალბატონი თამარ ვაშალომიძე.
"გურია ნიუსი" ბათუმში, ბაგრატიონის ქუჩაზე მდებარე საერთაშორისო ჰოსპიტალის ექიმს, განყოფილების გამგეს მარიკა მიშველიძეს დაუკავშირდა.
_ მე გახლავართ მარიკა მიშველიძე, ბათუმის საერთაშორისო ჰოსპიტალის ექიმი, განყოფილების გამგე. გადავხედე პაციენტ თამარ ვაშალომიძის ანკეტას. ვიცი ეს ქალბატონი. შემოსვლისთანავე ითხოვდა, გინდათ თუ არა, გულის ოპერაცია გამიკეთეთო. ჩაუტარდა გამოკვლევა და როცა დადგინდა, რომ სისხლძარღვები სუფთა იყო და არ ესაჭიროებოდა ოპერაცია, როგორ გაგვეკეთებინა? ინფარქტი ჰქონდა გადატანილი. დავუნიშნეთ გეგმიური კორონაროგრაფია. ვიმეორებ, სისხლძარღვები იყო სუფთა და ოპერაციას არ საჭიროებდა.
_ ქალბატონო მარიკა, თამარ ვაშალომიძე ამბობს, რომ თუ ოპერაცია არ მჭირდებოდა, რა გამოიკვლიეს, მსგავსი კვლევა ჩატარებული მქონდა, ოპერაციაზე უარი თბილისშივე მითხრეს, დოკუმენტაციაც სახეზე მქონდა და მხოლოდ თურქი ექიმების კვალიფიკაციას ვენდე, ექიმებმა კი 900 ლარი გამომტყუესო…
_ ეს კლინიკა ნამდვილად არის თურქების დაფუძნებული, თუმცა, აქ ქართველი ექიმები მუშაობენ და ამაში რა არის გასაკვირი? ქალბატონ თამარ ვაშალომიძეს მაღალ დონეზე ჩაუტარდა კვლევა, წაღებული აქვს ყოველივე ამის დამადასტურებელი დისკი და შეუძლია, აჩვენოს მაღალი კლასის პროფესიონალ ექიმებს.
თუ ვინმე იტყვის, რომ ჩვენ მას არასწორი კვლევა ჩავუტარეთ ან მისი ჯანმრთელობა საფრთხის ქვეშ დავაყენეთ, შეუძლია პრეტენზიები გაარკვიოს სხვაგან და მიმართოს, სადაც საჭიროა.
პაციენტებს, თანხის გადახდაზე რომ მიდგება საქმე, მერე უჩნდებათ პრეტენზიები. მე მეტს ვერაფერს გეტყვით, გარდა იმისა, რომ, საბედნიეროდ, ეს ქალბატონი არ არის საოპერაციო !_ გვითხრა მარიკა მიშველიძემ.
