მიუხედავად იმისა, რომ კვირის მნიშნელოვან მოვლენად საქართველოსთვის ვიზალიბერალიზაციის მინიჭების საკითხი გახლდათ, საინფორმაციო ველს თუ გადავხედავთ, საქართველოს მოსახლეობისთვის ძირითად პრობლემად და მთავარ ნიუსად ლარის კურსის ცვლილება, ფასების ზრდა და ეკონომიკური პრობლემები რჩება, თან იმის გათვალისწინებით, რომ ორ კვირაში ახალი წელი დგება, საახალწლო სამზადისი დასაწყებია, ფასები კი ყველა პროდუქტზე დღითიდღე მატულობს _
სავალუტო კურსის მიხედვით, დღეს დოლართან მიმართებაში ლარის კურსმა 2,71 შეადგინა.
ქვეყანაში ეკონომიკური მდგომარეობის გაუმჯობესების მიზნით, მთავრობამ ახალი 4-პუნქტიანი გეგმა მიიღო _ აქციზური გადასახადი გაეზრდება თამბაქოს, სასმელის, ნავთობროდუქტების, ავტომობილების იმპორტს და სათამაშო ბიზნესს.
მთავრობის ამ გადაწყვეტილებას მკაცრად აკრიტიკებს საზოგადოება, ექსპერტები და ოპოზიცია. ერთადერთი, ვინც დღეს არსებულ მდგომარეობას დადებითად აფასებს, ხელისუფლებაა _ იგი ლარის გაუფასურებას "ემოციურ-სპონტანური ეფექტებით" და "შოკური მიწოდებით" ხსნის.
ეროვნული ბანკის ახალი პრეზიდენტი კობა გვენეტაძე აღნიშნავს, რომ სამომხმარებლო ფასების ინდექსი არ იზრდება:
"აბსოლუტურად მართალი ხართ იმაში, რომ ეს პროცესი მიდის და იმის გამო, რომ ზოგზე ხდება ზრდა და ზოგზე _ შემცირება, აქედან გამომდინარე გვაქვს ის შედეგი, რომელიც უკვე საბოლოოდ ქვეყნდება. ასე რომ, ერთ ან ორ პროდუქტზე ფასის ზრდა არ ნიშნავს აუცილებლად იმას, რომ ზოგადად სამომხმარებლო ფასების ინდექსი გაიზრდება; ასევე, სხვა რომელიმე პროდუქტზე ფსის შემცირება არ ნიშნავს, რომ მთლიანად სამომხმარებლო ფასების ინდექსი შემცირდება", _ განუცხადა ჟურნალისტებს პარლამენტის სხდომიდან გამოსულმა გვენეტაძემ.
"ნაციონალური მოძრაობის" წევრმა რომან გოცირიძემ გვენეტაძის გეგმას სამარცხვინო უწოდა, ფინანსთა მინისტრის მოადგილე გიორგი კაკაურიძეს კი "ცხვირის გაზრდა" უწინასწარმეტყველა:
"ზურიკელა ამბობდა, რა კარგია, დღე იყო ქარიანი და წვიმიანიო და ჰკითხეს, რა გიხარია, შენ აბდალოო. თქვენ რა გიხარიათ?! მთავრობა ამბობს, რომ ყველაფერი იდეალურად არისო. ეროვნული ბანკის პრეზიდენტმა კი სამარცხვინო გეგმა წარმოადგინა. ზურიკელას ის უხაროდა, შეყვარებული ჰყავდა და თქვენ რა გიხარიათ _ სკამებზე დანიშვნა?!
…ბატონო გიორგი, თქვენ იტყუებით და რამდენჯერაც მოიტყუებთ, იმდენჯერ გამხელთ. ახალგაზრდობაში მეც თქვენსავით ვიტყუებოდი და ნახეთ, რამხელა ცხვირი მაქვს?!" _ მიმართა გოცირიძემ ფინანსთა მინისტრის მოადგილე გიორგი კაკაურიძეს.
"პატრიოტთა ალიანსის" ლიდერს ირმა ინაშვილს მიაჩნია, რომ დღევანდელი ეკონომიკური მდგომარეობის გათვალისწინებით, "არა მარტო ქუმსიშვილს, არამედ მთელ მთავრობას "აჟრიალებს":
"აქციზის გადასახადის ზრდა არ არის გამოსავალი, ეს პირიქით დაარტყამს იმ ადამიანებს, რომლებიც საწვავს ასხამენ, რომლებიც თამბაქოს მოიხმარენ, რომლებიც, ელემენტარულად, პურს ყიდულობენ. აქციზის ზრდა საწვავზე ყველა პროდუქტს აძვირებს. მე არ ვიცი, არაადეკვატურობა რაშია. მაშინ ადეკვატური მთავრობა გვყავს და არაადეკვატური ყოფილა ხალხი", _ განაცხადა ინაშვილმა ტელეკომპანია "პირველთან" საუბრისას
ექსპერტი გია ხუხაშვილი bpn-სთან საუბრისას აცხადებს, რომ მთავრობის წინ და უკან სირბილს ეკონომიკური პოლიტიკა არ ჰქვია:
"ეს მეტყველებს ერთ რამეზე, რომ მათ, უბრალოდ, არ ჰქონდათ გეგმა და "წყალწაღებული ხავსს ეჭიდებოდაო" პრინციპიდან ამოვიდნენ. შეიძლება, პირიქით იყო (ეკონომიკის ექსპერტმა გააჟღერა მთავრობის გეგმა), მაგრამ წაღმა იყო თუ უკუღმა, ფაქტია, რომ სპონტანურობა არის წამყვანი. ერთი მხრივ, ეკონომიკაში ფული ჩატოვო და ამაზე ილაპარაკო ამაყი სახით, მოგების გადასახადის შეღავათიან რეჟიმში გადაყვანით და მეორე ხელით იგივე თანხა, თუ მეტი არა, ჯიბიდან ამოუღო ეკონომიკას, ამას ჰქვია ეკონომიკური პოლიტიკა?!"_ ამბობს გია ხუხაშვილი.
ეკონომისტი ვაჟა ბერიძე მთავრობის ეკონომიკურ გეგმას ირონიულს უწოდებს და აცხადებს, რომ მოსახლეობა მას მხარს არ დაუჭერს:
"თუ მას უძვირდება ბენზინი, დიზელი, საბოლოო ჯამში, პური და პირველადი მოხმარების საქონელი, მგზავრობა და ასე შემდეგ, არ მგონია სათანადო მხარდაჭერა ექნას მომავალ ცვლილებებს. აღარაფერს ვიტყვი სიგარეტის და საწვავის გაძვირებით, აგრეთვე იმპორტირებულ ავტომობილებზე დაბეგვრის ახალი რეჟიმის შემოღებით, მოსახლეობის ჯანმრთელობაზე და ეკოლოგიაზე რომ ზრუნავს ჩვენი მთავრობა. ეს მეტი რომ არ ვთქვათ, ირონიული დამოკიდებულებაა საკითხისადმი", _ აღნიშნავს ექსპერტი.
რაც შეეხება ვიზალიბერალიზაციას, 15 დეკემბერს, სტრასბურგში, ევროპარლამენტმა პლენარულ სხდომაზე განახლებული შეჩერების მექანიზმს მხარი დაუჭირა 485 ხმით 132-ის წინააღმდეგ, 21 დეპუტატმა კი თავი შეიკავა. დროებითი შეჩერების მექანიზმის დამტკიცების შემდეგ უფრო მარტივი გახდება წევრი სახელმწიფოებისა და აგრეთვე ევროკომისიისთვის მონიტორინგისა და ყოველწლიური ანგარიშის საფუძველზე, თუ საჭირო გახდა, რომელიმე ქვეყნისთვის უვიზო რეჟიმის შეჩერება.
"ეს იყო პირველი და მნიშვნელოვანი ნაბიჯი საქართველოსთვის. ეს არის ევროპარლამენტის გადაწყვეტილება. რაც შეეხება ვიზალიბერალიზაციაზე კენჭისყრას, ზუსტი თარიღი ჯერ არავინ იცის, მაგრამ შესაძლოა გაიმართოს იანვარში, ან თებერვლის დასაწყისში, ვიზალიბერალიზაციის გადაწყვეტილება ევროკავშირის ოფიციალურ გამოცემაში, ჩემი აზრით, 15 აპრილს გამოქვეყნდება, საბოლოო ხელმოწერა კი 17 აპრილს შედგება", _ განაცხადა ანდრეის მამიკინსკიმ.
ეკონომიკური პრობლემებით გადაღლილი ქართული მოსახლეობისთვის ევროკავშირში გასაწევრიანებლად წინ გადადგმული ეს ნაბიჯი ნამდვილად სასიხარულო აღმოჩნდა, თუმცა, ევროპაში გასამგზავრებლად მომზადებული მრავალათასიანი არმიის მოლოდინს ცივი წყალი გადაასხეს დიპლომატებმა:
"ვიზალიბერალიზაცია არ გულისხმობს ევროკავშირის ტერიტორიაზე ხანგრძლივი ცხოვრების უფლების მიღებას _ ის გვანიჭებს საშუალებას, ყოველ 6 თვეში 3 თვე ვიმოგზაუროთ ევროკავშირის წევრ სახელმწიფოებში. ამ პირობის დამრღვევებს საქართველოში დააბრუნებენ და მომავალში ევროკავშირის ტერიტორიაზე შეღწევაზე სანქციებიც დაეკისრება. უვიზო რეჟიმით სარგებლობისთვის საკმარისი არ არის მხოლოდ პასპორტისა და სამგზავრო ბილეთის აღება. ევროკავშირის საზღვარზე ჩვენი მოქალაქეები ვალდებულები იქნებიან, მოთხოვნის შემთხვევაში, წარადგინონ ყველა ის საბუთი და დააკმაყოფილონ ყველა ის პირობა, რასაც ევროკავშირის წევრი სახელმწიფოების საკონსულოები ითხოვენ ვიზის გასაცემად. ევროკავშირის მესაზღვრეს ყოველთვის აქვს უფლება, უარი გვითხრას ტერიტორიაზე შეღწევაზე", _ განაცხადა ევროსაბჭოში საქართველოს ყოფილი ელჩმა მამუკა ჟღენტმა.
და განვლილი კვირის კიდევ ერთი სიახლე _ პაატა ბურჭულაძემ პოლიტიკა დატოვა და დიდ სცენას დაუბრუნდა _
როგორც ჭადრაკის სასახლეში გამართულ პარტიის "სახელმწიფო ხალხისთვის" ყრილობაზე გახდა ცნობილი, პაატა ბურჭულაძემ პოლიტიკური პლატფორმა ახალგაზრდა თაობას გადაულოცა, თვითონ კი კარიერის გასაგრძელებლად უცხოეთში გაემგზავრა.
პარტიას "სახელმწიფო ხალხისთვის" ახალგაზრდა მკვლევარი და კონსტიტუციონალისტი ნიკა მაჭუტაძე უხელმძღვანელებს.
