ლანჩხუთის მუნიციპალიტეტის გამგებელი ზაზა ურუშაძე გურიის მუნიციპალიტეტის გამგებლებს შორის ყველაზე მეტად ხდება ოპონენტების კრიტიკის ობიექტი. რა არის ამის მიზეზი, იღებს თუ არა გადაწყვეტილებებს ერთპიროვნულად, რომელი დაპირებები ვერ შეასრულა, აპირებს თუ არა მეორე ვადით კენჭისყრას _ ამ და სხვა მნიშვნელოვან თემებზე ზაზა ურუშაძე "გურია ნიუსთან" გასული წლის შემაჯამებელ ინტერვიუში საუბრობს.
_ ბატონო ზაზა, 2016 წლის შეჯამებით დავიწყოთ _ რით იყო გამორჩეული გასული წელი ლანჩხუთისთვის?
_ 2016 წელი საკმაოდ მნიშვნელოვანი და წარმატებული წელი იყო ჩვენი მუნიციპალიტეტისთვის. ძალიან ბევრი საინტერესო პროექტი დაიწყო. მათ შორის, არის გარდამავალი პროექტებიც, რომლებიც მიმდინარე წელს დასრულდება. ბევრჯერ მითქვამს და მინდა კიდევ ერთხელ აღვნიშნო _ ჩემთვის პრიორიტეტი საბავშვო ბაღებია და მომავალი თაობის კეთილდღეობისთვის ყველაფერს გავაკეთებ. ამ მიმართულებით 21 პროექტი გახორციელდა. აშენდა 5 ახალი ბაღი: ჯურუყვეთში, ღრმაღელეში, ქვიანში, გაგურში, მაჩხვარეთში. სრულად რეაბილიტირდა 10 საბავშვო ბაღი, 9-ს კი რეაბილიტაცია ჩაუტარდა. პროექტების ჯამურმა ღირებულებამ 1 481 218 ლარი შედგინა. წელს შენდება ორი ახალი ბაღი ნიგოითსა და ლესაში, ასევე, რეაბილიტაცია უტარდება შუხუთის საბავშვო ბაღს და ამისთვის 1 მლნ. 354 717 ლარი დაიხარჯება.
მნიშვნელოვანი სამუშაოები წარიმართა გაზიფიცირების კუთხით _ ამ ეტაპისთვის სრულად დასრულებულია ქალაქ ლანჩხუთის და გვიმბალაურის ადმინისტრაციული ერთეულის გაზიფიცირება. გაზიფიცირებულია მაჩხვარეთის ადმინისტრაციული ერთეულიც _ დარჩენილია მხოლოდ ერთი უბანი (60 ოჯახი). გაზიფიცირების სამუშაოები დასრულდა შუხუთში და საპროექტო სამუშაოები იწყება ნიგოითის ადმინისტრაციულ ერთეულში, 2017 წლისთვის დაგეგმილია გაზსადენის დაპროექტება აცანასა და აკეთში.
2016 წელს დაიწყო და მომავალშიც გაგრძელდება გზების, ქუჩებისა და სკვერების აღდგენა. ლანჩხუთის მუნიციპალიტეტის ტერიტორიაზე, ჯაპანიდან გრიგოლეთამდე მიმდინარეობს ავტობანის მშენებლობა, რაც 40 კმ.-ს მოიცავს. გზების მშენებლობა–რეაბილიტაციის სამუშაოებზე დაიხარჯა 6 655 749 ლარი. დაიგო და რეაბილიტაცია ჩაუტარდა 19 კმ. სიგრძის ქუჩებს. აღსანიშნავია, რომ ბევრ მთიან სოფელში, მაგალითად, აცანა-აკეთი-მამათში შიდა გზების უქონლობის გამო ბევრი პრობლემა გვქონდა, ამ ეტაპისთვის ეს პრობლემა აღარ არსებობს, რადგან სამივე სოფელში გაკეთდა რკინა-ბეტონის გზა. მოასფალტდა ქალაქ ლანჩხუთის თითქმის ყველა ქუჩა. როგორც ქალაქში, ასევე სოფლებში მოეწყო ბეტონის სანიაღვრე არხები, დამონტაჟდა გარე განათებები; აშენდა და რეაბილიტირდა 32-მდე დიდი და მცირე ხიდი, რისთვისაც დაიხარჯა 1 178 269 ლარი. სუფსაში აშენდა ახალი სკვერი, ღირებულებით 212 777 ლარი. მიმდინარეობს ქალაქ ლანჩხუთის ცენტრის კეთილმოწყობა და რეაბილიტაცია, რისთვისაც გამოყოფილია 708 888 ლარი. პროექტი გარდამავალია და მის ფარგლებში მიმდინარეობს ადმინისტრაციული შენობის წინ მდებარე სკვერის რეაბილიტაცია, სადაც აშენდა ახალი ფერადი შადრევანი. ასევე, პროექტი ითვალისწინებს ცენტრალური სკვერისა და ქალაქის ტერიტორიაზე არსებული ყველა პატარა სკვერის რეაბილიტაციას _ დაიგება ტროტუარები, ბორდიურები, რამდენიმე ადგილას უკვე გაკეთდა და დამატებით კიდევ მოეწყობა პანდუსები, გაკეთდა ავტოსადგომი, კეთილმოეწყობა გაზონები. გარდა ამისა, ბოლო წლებში
სტიქიის სალიკვიდაციო ღონისძიებების ჩასატარებლად მთავრობის სხვადასხვა განკარგულებით, ლანჩხუთის მუნიციპალიტეტში გახორციელდა 12 მლნ. 555 232. აღნიშნული თანხით ჩატარდა ნაპირსამაგრი სამუშაოები, მოეწყო გაბიონები და ა. შ.
ვფიქრობ, სასიცოცხლოდ მნიშვნელოვანია ის პროექტები, რომლებიც ჯანდაცვისა და სოციალური უზრუნველყოფის კუთხით არსებობს.
ლანჩხუთის მუნიციპალიტეტში სოციალურად დაუცველი სულ 2 021 ადამიანია; აქედან საარსებო შემწეობის მიმღებია 1 881 ადამიანი, ხოლო 140 – სამ და მეტშვილიანი ოჯახი, რომელიც ყოველთვიურად 150 ლარს იღებს. ადგილობრივი ბიუჯეტიდან 800-მდე ბენეფიციარზე ამ დროისთვის გაცემულია 201 000 ლარი. 2013-2016 წლის ჯანდაცვისა და სოციალური პროგრამებზე გაცემულია 1 820 964 ლარი.
ქირით უზრუნველყოფილია 34 უსახლკარო ოჯახი, ანუ ამ ეტაპისთვის მუნიციპალიტეტში უსახლკარო ოჯახები არ არიან.
ასევე, მნიშვნელოვანია ის სამუშაოები, რომლებიც მუნიციპალიტეტის ტერიტორიაზე მელიორაციის კუთხით ტარდება. 2016 წლებში სოფლის მეურნეობის სამინისტროს შპს "საქართველოს მელიორაციის" მიერ ლანჩხუთის მუნიციპალიტეტში გახორციელდა სამელიორაციო სისტემების 3 სარეაბილიტაციო პროექტი ჯამური ღირებულებით 1 326 851 ლარი. აღნიშნული პროექტების ფარგლებში სარეაბილიტაციო სამუშაოები ჩაუტარდა დედაბერა-ნიგვზიანის მაგისტრალურ დამშრობ არხს, დედაბერა-ნიგვზიანის და მთისძირა არხზე ჰიდროტექნიკური ნაგებობებს და მდინარე ფიჩორას გასწორხაზოვნებული მონაკვეთების რეაბილიტაციის პირველი ეტაპის ფარგლებში საპროექტო პროფილის და მასზე მოწყობილი ჰიდროტექნიკურ ნაგებობებს. შედეგი: 770 ჰექტარი მიწის ფართობის დაშრობა.
აღნიშნული სამუშაოების ფარგლებში ლანჩხუთის მუნიციპალიტეტში რეაბილიტაცია ჩაუტარდა 48,5 კმ. სადრენაჟე არხს. ტექნიკური ექსპლოატაციის ფარგლებში გაიწმინდა/მოწესრიგდა 121 კმ. სამელიორაციო არხი. სულ შეკეთდა 52 ერთეული სხვადასხვა ჰიდროტექნიკური ნაგებობა.
მიმდინარეობს მდინარე ფიჩორას გასწორხაზოვნებული მონაკვეთების საპროექტო პროფილის და მასზე მოწყობილი ჰიდროტექნიკური ნაგებობების რეაბილიტაციის მეორე ეტაპი. პროექტი, რომლის ღირებულებაა1 272 464 ლარი, 2017 წელს დასრულდება.
გასულ წელს ინვესტიციის კუთხით მნიშვნელოვანი სიახლე გვქონდა. კომპანია "sustaine energy a/s"-ის დირექტორმა ჯესპერ იორგანსონმა ლანჩხუთის მუნიციპალიტეტში, სანერგე მეურნეობა მოაწყო _ 40 ჰა მიწის ნაკვეთზე ალვის ხის ნერგები დაირგო. ინვესტორი ლანჩხუთში 321 ჰა-ზე ალვის ხის გაშენებას გეგმავს. დასაქმებულია 35 ადგილობრივი მცხოვრები..
_ ბატონო ზაზა, საკმაოდ დიდი ჩამონათვალია. თუმცა, მთელი წლის განმავლობაში იყავით ოპენენტების კრიტიკის საგანი _ ყველაზე ხშირად გადაწყვეტილებების ერთპიროვნულად მიღებაში გადანაშაულებდნენ. გუნდურად არ მუშაობთ?
_ არ ვიცი, ვინ მადანაშაულებს და რატომ, მაგრამ მინდა გითხრათ, რომ ჩემს გვერდით არიან ადამიანები, რომლებთან ერთადაც ვიღებ გადაწყვეტილებებს. ასე იყო დღემდე და მომავალშიც ასე გაგრძელდება.
_ საკადრო გადაწყვეტილებაზე როცა ვსაუბრობთ, არ შეიძლება თქვენი ყოფილი მოადგილის ვახტანგ ზენაიშვილის გათავისუფლება არ გავიხსენოთ, რომელიც სასამართლომ გაამართლა და მისი თანამდებობაზე აღდგენაც დაგავალათ. თუმცა, თქვენ სასამართლოს გადაწყვეტილებას ამ დრომდე არ ასრულებთ…
_ სასამართლო გადაწყვეტილებით არ დაკმაყოფილდა ვახტანგ ზენაიშვილის მოთხოვნა თანამდებობაზე აღდგენასთან დაკავშირებით. აქედან გამომდინარე, მისი აღდგენის ვალდებულება მუნიციპალიტეტს არ ჰქონია. ჩვენ დაგვევალა გადაწყვეტილების მიღება საქმის გარემოებათა დამატებით მოკვლევის საფუძველზე. თანამდებობაზე ყოფნის პერიოდში ბატონმა ვახტანგმა თანამდებობისთვის შეუფერებელი პროფესიული უნარ-ჩვევები გამოავლინა. რაც გახდა მისი გათავისუფლების საფუძველი. სასამართლო გადაწყვეტილება ჩვენს მიერ შესრულებულია.
_ ეს "შეუფერებელი" საქციელი სასამართლოსთვის არ იყო არგუმენტი. რას უწოდებთ "შეუფერებლს"?
_ მოსახლეობასთან ჰქონდა კონფლიქტი და ამის მტკიცებულებაც გვაქვს.
_ თუ მტკიცებულება გქონდათ, სასამართლოზე რატომ არ წარადგინეთ?
_ ახლა წარვადგენთ. კანონი არ გვავალდებულებდა, რადგან იქ გარკვევით წერია, რომ გამგებელს უფლება აქვს, გაათავისუფლოს სამსახურის უფროსები და მოადგილეები. სასამართლომ ეს არ მიიღო და მოგვთხოვა საფუძველი, რომელიც ახლა დავწერეთ.
_ ახლა დაწერეთ?
_ ჰო, ეს ფაქტები გვქონდა, მაგრამ სასამართლოში არ წარგვიდგენია.
_ თქვენი ოპონენტები იმასაც ამბობენ, რომ პარტიულ აქტივისტებს აქტიურად ასაქმებთ საჯარო სექტორში. მათი მატება განსაკუთრებით ააიპ-ებში იგრძნობდა. ჩვენს გვაქვს სტატისტიკა, საიდანაც მტკიცდება, რომ წინასაარჩევნო პერიოდში შტატები განსაკუთრებულად მატულობს. არადა, "ნაციონალურ მოძრაობას" "ქართული ოცნება" სწორედ ამაში ადანაშაულებდა, ამის გამო იჯდა ციხეში გიგი უგულავა…
_ მუნიციპალიტეტის ყველა თანამდებობაზე მუშაობენ კონკურსის წესით შერჩეული ადამიანები. გადახედეთ კომისიის შემადგენლობას და დარწმუნდებით, რომ პარტიული ნიშნით კონკურსანტების შერჩევა შეუძლებელია.
_ არასამეწარმეო არაკომერციული იურიდიული პირებში კონკურსი როდის ჩაატარეთ?
_ კონკურსი მხოლოდ საჯარო სამსახურში ჩატარდა.
_ ეს ჩვენც ვიცით და ამიტომ გკითხეთ, თუ რატომ ზრდით შტატებს ააიპ-ებში?
_ შტატები არ გაგვიზრდია. ორი ახალი აიპ-ი შეიქმნა და იმან გამოიწვია შტატების მატება.
_ სტატისტიკა სხვა რამეს ამტკიცებს _ ბოლო 2 წელიწადში შტატების მატება ყველა აიპ-ში ფიქსირდება. ეს თვალშისაცემი განსაკუთრებით არჩევნების წინ ხდება…
_ ახლა შემცირებებს ვიწყებთ..
_ ლანჩხუთში საკმაოდ ყბადაღებული თემაა უხარისხოდ გაკეთებულ ობიექტები. ამას მხოლოდ თქვენი ოპონენტები არ ამბობენ. წლის მიწურულს საკრებულოში მოქმედმა სივრცით-ტერიტორიული დაგეგმარებისა და ინფრასტრუქტურის კომისიის წევრებმა ლანჩხუთის რამდენიმე ქუჩაზე მონიტორინგი განახორციელეს და იქ შესრულებული ინფრასტრუქტურული სამუშაოების ხარისხი დაგიწუნეს…
_ ინფრასტრუქტურული პროექტების დასრულების შემდეგ, ობიექტებს გამგეობაში შექმნილი ინსპექტირების ჯგუფი ამოწმებს. ამის შემდეგ იგზავნება ექსპერტიზაზე. თუ სამხარაულის ექსპერტიზის ბიუროს დასკვნაში ფიქსირდება ხარვეზი, ამ ხარვეზის აღმოფხვრამდე ობიექტის ჩაბარება არ ხდება. შესაბამისად, უხარისხო ობიექტს არავინ ჩაიბარებს. გარდა ამისა, ყველა ობიექტს აქვს საგარანტიო ვადა და მიმწოდებელი ვალდებულია, ამ ვადაში გამოასწოროს აღმოჩენილი ხარვეზი.
_ ლანჩხუთის "გურია" თქვენი ერთ-ერთი "ტვირთია". მიუხედავად იმისა, რომ მილიონები დაახარჯეთ, გუნდი უმაღლესი ლიგიდან გავარდა. არც თქვენ მიერ ბევრჯერ დაანონსებული უცხოელი ინვესტორი გამოჩენილა.
_ ის, რაც მოხდა "გურიასთან" დაკავშირებით, ჩემთვისაც სამწუხაროა. მაქსიმალურად ყველაფერი გავაკეთეთ, რის გაკეთებაც შეიძლებოდა. რაც შეეხება ინვესტორს, ველოდებით და ეს საკითხი უახლოეს დღეებში გადაწყდება.
_ ამ მოლოდინის რეჟიმში ლანჩხუთელებს დიდი ხანია ამყოფებთ. ეს "უახლოესი დღეები" როდის დასრულდება?
_ დღეს (საუბარი ჩაწერილია 12 იანვარს) მერაბ ჟორდანიასგან მივიღე წერილი, რომელშიც საუბარია, რომ იგი 19 იანვარს ჩამოვა საქართველოში და ლანჩხუთის "გურიასთან" დაკავშირებით დაწყებული მოლაპარაკებები, გუნდის მართვის უფლებით გადაცემის თაობაზე, დასრულდება.
_ გუნდს მერაბ ჟორდანიას აძლევთ?
_ გუნდი აუქციონზე გადის მართვის უფლებით და ვინც იყიდის, მისი იქნება.
_ რამდენიმე წუთის წინ თქვით, რომ მერაბ ჟორდანიასთან აწარმოებთ მოლაპარაკებებს …
_ მერაბ ჟორდანიამ დიდი ხნის წინ გამოთქვა გუნდის შეძენის სურვილი, თუმცა, გადაცემის ფორმა ვერ მოვნახეთ. ამიტომ გაგვაქვს აუქციონზე, სადაც არავინ არ იცის, რა მოხდება. შეიძლება სხვამ იყიდოს _ ვნახოთ, ვინ რა პირობებს შემოგვთავაზებს.
_ ბატონო ზაზა, მართალია, წინა წლის ბიუჯეტი სეკვესტრს გადაარჩინეთ, თუმცა, ეს იმის მანიშნებელი იყო, რომ გაგიჭირდათ ბიუჯეტის შესრულება?
_ სულ ბიუჯეტი შემოსულობების ნაწილში შესრულებულია 98,6%-ით. მათ შორის, შემოსავლის ნაწილში (კაპიტალურის ჩათვლით) 98,8%-ით. მინდა გითხრათ, რომ ბიუჯეტის ყველა ძირითადი ვალდებულება შესრულებულია.
_ მაგრამ ფაქტია, რომ პრობლემა გქონდათ…
_ 70 000 ლარი მიგვაკლდა მხოლოდ. გაჭირვებით კი მართლაც გაჭირდა _ ძალიან იყო "გაჭედილი".
_ 2017 წლის ბიუჯეტის პრიორიტეტები როგორია?
_ 2017 წლის ბიუჯეტის პრიორიტეტებია: ინფრასტრუქტურის მშენებლობა, რეაბილიტაცია და ექსპორტი, სკოლამდელი აღზრდა, კულტურა, რელიგია, ახალგაზრდობის ხელშეწყობა და სპორტი, მოსახლეობის ჯანმრთელობის დაცვა და სოციალური უზრუნველყოფა.
_ წელს ამომრჩევლის გულის მოგებას ისევ ეცდებით? მეორე ვადით კენჭისყრას აპირებთ?
_ გასულ წელს მოსახლეობამ სერიოზული მხარდაჭერა გამოგვიცხადა. ეს ძალიან მნიშვნელოვანია, ყველამ ერთად ყველაფერი უნდა გავაკეთოთ, რომ ამომრჩევლის ნდობა გავამართლოთ. რაც შეეხება კენჭისყრას, ამასთან დაკავშირებით ოქტომბერში ვისაუბროთ.
