იუსტიციის მინისტრის, თეა წულუკიანის ქონებრივ დეკლარაციაში ცვლილებებია.
დეკლარაცია, რომელიც მინისტრმა 2017 წლის 11 იანვარს შეავსო აღნიშნულია, რომ მის საკუთრებაში, სტრასბურგში არსებული საცხოვრებელი ბინა აღარ არის.
წულუკიანს სტრასბურგის ბინა, 2016 წელს 222 519 ევროდ გაუყიდია, რითაც ბანკ კრედი ლიონესგან აღებული, ბინის ყიდვასთან დაკავშირებული სესხის ნაწილი, 83 600 ევრო დაუფარავს.
ქონებრივი დეკლარაციის მიხედვით, თეა წულუკიანის საკუთრებაშია 2013 წელს, 39 840 დოლარად ნაყიდი 1900,00 კვ.მ-ის ფართობის მიწის ნაკვეთი თბილისში, სოფელ დიღომში.
2006 წელს, 25000-დოლარად ნაყიდი, 400,00 კვ.მ-ის ფართობის საცხოვრებელი სახლი სოფელი დიღომში და ამავე მისამართზე არსებული ავტოფარეხი. ასევე, 2010 წელს, 8000-დოლარად შეძენილი მსუბუქი ავტომანქანა mini Cooper (გამოშვების თარიღი 2003 წ).
გარდა ამისა, დეკლარაციაში აღნიშნულია, რომ თეა წულუკიანის მეუღლე, ნუგზარ კაკულია ფლობს 2015 წელს, 7000-ლარად შეძენილი, 50009 კვ.მ. -ი ფართობის მიწის ნაკვეთს ახალქალაქში, სოფელი დილისკაში. ასევე, ნუგზარ კაკულიას საკუთრებაშია 2010 წელს გამოშვებული მსუბუქი ავტომანქანა Toyota Prius, რომელიც მან 2016 წელს 6500-დოლარად შეიძინა.
რაც შეეხება მინისტრის ოჯახის ფინანსურ მდგომარეობას, დეკლარაციის შევსების მომენტში, თეა წულუკიანის სახელფასო ანგარიშზე ,,საქართველოს ბანკში“ 1428,00 ლარი იყო; ბანკ კრედი ლიონეს მიმდინარე ანგარიშზე – 0,67 ევრო; “საქართველოს ბანკის” ანაბარზე – 101 502 ევროა.
რაც შეეხება მის შემოსავლებს, თეა წულუკიანს საქართველოს იუსტიციის მინისტრის თანამდებობისთვის 75 000 ლარი (წლიური დაუბეგრავი ხელფასი) აუღია.
მის მეუღლეს, ნუგზარ კაკულიას კი, საქართველოს იუსტიციის სასწავლო ცენტრიდან, სადაც მას დირექტორის თანამდებობა ეჭირა, 9 თვის განმავლობაში (01.01.2016 11.09.2016) 35 247 ლარი აქვს მიღებული (დაუბეგრავი ხელფასი).
დელარაციაში ასევე აღნიშნულია, რომ თეა წულუკიანს საქართველოს ბანკიდან, 2015 წელს აღებული 13686 ლარის სამომხმარებლო სესხის დასაფარად გასულ წელს 745 ლარი გადაუხდია. სესხის ვადა კი, 2018 წლის 1 ოქტომბერს იწურება.
გარდა ამისა, თეა წულუკიანს 2013 წელს აღებული მეორე იპოთეკური სესხის დასაფარად, გასულ წელს, საქართველოს ბანკისთვის 15 577 დოლარი აქვს გადახდილი.
სამშენებლო-სარემონტო სამუშაოებისთვის კი, გასულ წელს 20 000 ლარის გასავალი ჰქონია.
ამავე თემაზე:
თანამდებობის პირების ქონებრივ დეკლარაციებში უზუსტობებია – “საერთაშორისო გამჭვირვალობა – საქართველო”
თეა წულუკიანმა პრემიებთან დაკავშირებით პირველი კომენტარი “გურია ნიუსს” მისცა (ვიდეო)
მინისტრებისა და მათი მოადგილეების 2014 წლის შემოსავლები
თეა წულუკიანი: თუ საჯარო მოხელეები არ მიიღებენ პრემიებს საჯარო სამსახური უინტერესო გახდება
