ჩოხატაურის მუნიციპალიტეტის ბიუჯეტიდან შემოქმედის ეპარქია დაფინანსებას ვეღარ მიიღებს. შესაბამისი წინადადებით გამგეობა საკრებულოში უკვე შევიდა:
_ საკრებულოში ცვლილებების პროექტი უკვე შევიტანეთ. ეპარქიისთვის გამოყოფილი 20 000 ლარი მიიმართება სოციალურ პროგრამებზე. უფრო კონკრეტულად კი, უპოვართათვის პურის შესაძენი თანხა, წინა წლების მსგავსად არ მიეცემა ეპარქიას. გამგეობა გამოაცხადებს ტენდერს და შესაბამისად, ჩვენგან მოხდება ანგარიშსწორება. ასევე, ამ მუხლში გათვალისწინებული თანხიდან დაფინანსდება ააიპი განათლების ცენტრი, _ გვითხრეს ჩოხატაურის მუნიციპალიტეტის გამგეობის საფინანსო სამსახურში.
მათივე ინფორმაციით, გასულ წელს ეპარქიამ ჩოხატაურის ბიუჯეტიდან მხოლოდ 5000 ლარი მიიღო და მას შემდეგ, რაც "გურია ნიუსის" მოთხოვნის საფუძველზე, ამ თანხის მიზნობრივად ხარჯვის დოკუმენტაცია არ იქნა წარმოდგენილი, თანხა არ გადარიცხულა.
ბიუჯეტში შესატანი ცვლილებები ჩოხატაურის მუნიციპალიტეტის საკრებულომ 31 იანვარს უნდა განიხილოს.
საკრებულოს თავმჯდომარის ზაალ მამალაძის თქმით, ეპარქია ამ დრომდე შუალედური რგოლის ფუნქციას ითავსებდა:
_ ჩვენ ეპარქიას არ ვაფინანსებდით. მათ ამ თანხას კონკრეტული მიზნობრიობით ვაძლევდით. მაგალითად 80 უპოვარისთვის პურის შეძენას ჩვენს მიერ გადახდილი თანხებით ახდენდა შემოქმედის ეპარქია. შუალედური რგოლის ფუნქციას ასრულებდა და ეს აღარ იქნება. ასევე, ჩვენგან მოხდება ყველა იმ პროგრამის დაფინანსება, რომელსაც ეპარქია ბიუჯეტის სახსრებით ახორციელდება, _ აღნიშნა ჩვენთან საუბრისას ზაალ მამალაძე.
_ ბატონო ზაალ, მიუხედავად მრავალგზის მოთხოვნისა, შემოქმედის ეპარქიამ ბიუჯეტიდან გამოყოფილი თახნის მიზნობრივად ხარჯვის დამადასტურებელი დოკუმენტაციის წარმოდგენა ვერ შეძლო, რამაც საზოგადოებაში ეჭვები გააჩინა…
_ ნამდვილად აკეთებდნენ და თანხასაც მიზნობრივად ხარჯავდნენ, თუმცა დოკუმენტების წარმოდგენასთან დაკავშირებით იყო პრობლემა. შესაბამისად, ამის გათვალისწინებით შედის ცვლიელბა ბიუჯეტში, _ გვითხრა მამალაძე.
ჩვენ შევეცადეთ ამ საკითხზე შემოქმედის ეპარქიის წინამძღვრის მეუფე იოსების კომენტარიც მოგვეპოვებინა, თუმცა, მან ჩვენს სატელეფონო ზარებს არ უპასუხა.
აღსანიშნავია, რომ ჩოხატაური უკვე მეორე მუნიციპალიტეტია, რომელმაც შემოქმედის ეპარქიას დაფინანსება შეუწყვიტა.
პირველად ეს ნაბიჯი, გურია ნიუსის ჟურნალისტური გამოძიების შემდეგ ქალაქ ოზურგეთის მუნიციპალიტეტის მერიამ გადადგა.
ამავე თემაზე იხილეთ: "მე ეკლესია ვარ და არ ვარ ვალდებული ინფორმაცია მოგაწოდოთ" _ ბიუჯეტის თანხები ეპარქიის ანგარიშზე, რომელსაც არავინ აკონტროლებს
ადგილობრივი ბიუჯეტის თანხები ეპარქიისა და სასულიერო პირების პირად ანგარიშებზე
"არამიზნობრივ ხარჯვასთან გვქონდა საქმე" _ ოზურგეთის მერმა ეპარქიას დაფინანსება შეუწყვიტა
