ონლაინ სესხების გამცემი ორგანიზაციების ნაწილი მიკროსაფინანსოებად გადაკეთდნენ, ნაწილმა კი თანხის მიღების ახალ ხერხს მიაგნო და თანხის სწრაფ ჩარიცხვაზე 15-20%-იანი საკომისიო დააწესეს. ამის შესახებ „კომერსანტთან" საუბრისას საბანკო პროდუქტების ექსპერტი დავით კიკვიძე საუბრობს.
როგორც ცნობილია, ახალი სარეგულაციო პაკეტის ფარგლებში ონლაინ სესხების კომპანიებს ეკრძალებათ წლიური 100%-ზე მეტი სარგებლის დაწესება სესხზე, დარიცხული საურავებით და საკომისიოებით ეს 150%-ს არ უნდა აღემატებოდეს.
ახალი რეგულაციის შემდეგ, როგორც დავით კიკვიძე აცხადებს 10-მდე მსხვილი ონლაინ სესხების გამცემი ორგანიზაცია მიკროსაფინანსოებად დაგაკეთდნენ, ზოგიერთმა კომპანიამ კი უკვე მიაგნო ისეთ ხრიკებს, რომლის საფუძველზეც ახდენენ შემცირებული შემოსავლების კომპენსირებას.
„ონლაინ სესხების კომპანიები მომხმარებელს სესხის მომენტალურად გაცემის სანაცვლოდ სთავაზობენ „სწრაფი გადარიცხვის სერვისს", რაშიც მომხმარებელი იხდის გარკვეულ საფასურს, ანუ რეალურად ეს საფასური სესხის თანმდევი საკომისიო კი არ არის. სწრაფად ჩარიცხვის საკომისიო კი საშუალოდ 15-20%-ის ფარგლებში მერყეობს. ეს არის სესხის სწრაფად გაცემაში გაწეული მომსახურებაა, რომელიც როგორც მომსახურება, ისე აღიქმება და შესაბამისად, ახალ საკანონმდებლო პაკეტთან წინააღმდეგობაში არ მოდის, თუმცა რეალურად კლიენტი იხდის დამატებით ფულს იმისთვის, რომ სესხი მოკლე ვადაში დაუჯდეს ანგარიშზე.
ეს საფასური იურიდიულად არ ემატება სესხის თანხას, უბრალოდ აღირიცხება, როგორც გაწეული მომსახურება. თუ კლიენტი არ გადაიხდის ამ საფასურს სესხი დაუჯდება 7 სამუშაო დღის შემდეგ, რაც უკვე ე.წ სწრაფი სესხის პრინციპს აღარ ექვემდებარება", – განაცხადა კიკვიძემ.
რაც შეეხება იმას, თუ ონლაინ სესხის გამცემი რამდენი კომპანია გადაკეთდა მიკროსაფინანსოდ, ამაზე კიკვიძეს ზუსტი მონაცემი არ აქვს: „ზუსტი ციფრის თქმა შეუძლებელია, თუმცა სავარაუდოდ, მიკროსაფინანსოებად გადაკეთებულთა რაოდენობა იქნება 10-მდე.
საერთოდ, მსხვილ კომპანიებს ბაზარზე ოპერირება არ გაუჭირდებათ, რადგან მათ დიდი პორტფელი ჰქონდათ, რამდენიმე მილიონიანი. დაბალი საპროცენტო განაკვეთზე მუშაობა მათ შემოსავალს კი შეამცირებს, მაგრამ ჯამური პორტფელის ოდენობიდან გამომდინარე, ეს მაინცდამაინც ცუდ გავლენას არ მოახდენს. რაც შეეხება შედარებით მცირე ზომის კომპანიებს, მათ ალბათ, მუშაობა ძალიან გაუჭირდებათ, თუმცა როგორც უკვე აღვნიშნე, ნაწილმა თანხის მიღების ახალ ხერხს უკვე მიმართა. კარგი იქნება, თუ ეს საკითხიც დარეგულირდება. ზედმეტი პროცენტის დაწესება სწრაფ ჩარიცხვაზე დეტალური განხილვის საგანია და სასურველია, ამასაც მიექცეს ყურადღება", – განუცხადა „კომერსანტს" კიკვიძემ.
წყარო: კომერსანტი
