“ინფო 9”-ის ოპერატორი, შოთა ფერაძე “გურია ნიუსთან” საუბრისას ამბობს, რომ დევნა 10 დღეზე მეტია, რაც გრძელდება:
_ 10 დღეზე მეტია, სისტემატიურად დაგვდევენ და თავს არ გვანებებენ მე და ჟურნალისტს _ ეკატერინე დუგლაძეს. თავიდან 8 ადამიანი იყო, 4 ვიდეოკამერით. 3 მათგანი გამუდმებით უსვამდა შეკითხვებს ეკატერინეს. მათ შორის მინდა გამოვყო შეკითხვა, რომელიც ეკატერინეს პირად ცხოვრებას ეხება _ ჰყავდა თუ არა მას შვილი ბავშვთა სახლში ჩაბარებული. ასევე, ეკითხებოდნენ, რა კავშირი იყო “ინფო 9”-სა და “ქართულ ოცნებას” შორის; იყო თუ არა ეკატერინე ბიძინა ივანიშვილის პრესსამსახური და იღებდა თუ არა პირადად მისგან მითითებებს, _ ამბობს ფერაძე.
ოპერატორი ყვება, რომ ე.წ. მედია ჯგუფმა, რომელთა ხელმძღვანელის და დამფინანსებლის წყარო ამ დრომდე უცნობია, შესვენება მხოლოდ 2 დღით აიღეს.
_ პირველი გამოჩენის შემდეგ, 2 დღე დაისვენეს. შემდეგ, გამგეობის შენობის წინ მოვიდნენ იგივე რაოდენობით და იგივე სახეებით. ცხრაწყაროში, ბაღის შენობა უნდა გადაგვეღო. ადგილზე მისულებს დაგვხდნენ და კუდში დაგვყვებოდნენ. ყველაზე მეტი აქტიურობით ბიჭიკო გვენეტაძე და ნინო მხეცაძე გამოირჩევიან. თავს “მედია ჯგუფის” თანამშრომლებს უწოდებენ, თუმცა, დანარჩენი დეტალები უცნობია. შემდეგ მათ ჯგუფს ალისტრახო როხვაძე დაემატა, რომელიც “ნაციონალური მოძრაობის” ქუთაისის ახალგაზრდული ორგანიზაციის წარმომადგენელია, _ ამბობს ჩვენთან საუბრისას შოთა ფერაძე.
მიუხედავად იმისა, რომ ეკატერინე დუგლაძემ დასახმარებლად პოლიციას მიმართა, რეაგირება დღემდე არ მომხდარა. უფრო მეტიც, პოლიციაში მისულ ჟურნალისტს, “მედია ჯგუფის” წარმომადგენლები ფეხდაფეხ მიჰყვნენ და პროვოკაციული შეკითხვების დასმა პოლიციის კარებთანაც გააგრძელეს, რაშიც სამართალდამცველებს ხელი არ შეუშლიათ.
შოთა ფერაძემ და ეკატერინე დუგლაძემ სახალხო დამცველს 12 ივლისს განცხადებით მიმართეს. შოთა ფერაძე ამბობს, რომ საქმე ჯერ წინ არ წასულა. აღნიშნავს იმასაც, რომ ამ პირობებში მუშაობა საკმაოდ რთულია, თუმცა, დასძენს, რომ ჟურნალისტურ საქმიანობას, მიუხედავად ამ წინააღმდეგობებისა და ფსიქოლოგიური ზეწოლისა, მაინც გააგრძელებენ.
აღსანიშნავია, რომ ეს და სხვა მსგავსი ფაქტები დიპლომატიური კორპუსისთვის ამ დრომდე არ გამხდარა შეშფოთების მიზეზი; დუმს შინაგან საქმეთა სამინისტროც. არსებობს რამდენიმე არასამთავრობო ორგანიზაციის, სამოქალაქო მოძრაობა “ეს შენ გეხება”-ს და ჟურნალისტური ეთიკის ქარტიის სპეციალური განცხადებები რეაგირების მოთხოვნითა და კადრები, რომ ამ უცნობი “მედია ჯგუფის” წარმომადგენლები, საქართველოს სხვადასხვა ქალაქში ჟურნალისტებს მუშაობის საშუალებას არ აძლევენ.
