მათ შორის დასახელდა ჩიბათის ჩაის გადამამუშავებელი მცირე საწარმო. გამგებელმა დეტალურად ისაუბრა ამ საწარმოს შექმნისა და ამუშავების ისტორიაზე. მისი ვერსიით, ნორვეგიულმა არასამთავრობო ორგანიზაციამ ლანჩხუთში დაფუძნებულ ა(ა)იპ “აგრობიზნესცენტრს” გადასცა გრანტი, რომლის საშუალებით შეიძინეს მცირე საწარმოო ხაზი და ჩიბათის კულტურის სახლის შენობაში უახლოეს მომავალში მცირე საწარმოს ამუშავება იგეგმებოდა. ჩიბათშივე, ადგილობრივი მთავრობის დახმარებით, სოფლის რამდენიმე მცხოვრებლით დაკომპლექტებულმა კოოპერატივმა გადაჭრა რამდენიმე ჰექტარზე გაშენებული ჩაის ნარგავები და შემოღობა ტერიტორია.
ამ ინტერვიუს გამოქვეყნებიდან 6 თვის შემდეგ, დაგვიკავშირდა “ქართული ოცნების” ლანჩხუთის შტაბის ერთ-ერთი ხელმძღვანელი, ჩიბათელი ელგუჯა ჩხაიძე, “გურია ნიუსთან” საუბრისას ჩხაიძე ამტკიცებდა, რომ ჩიბათის ჩაის საწარმოს მუშაობა მორიგი სამთავრობო ბლეფია და რომ როლერი, რომელიც მხოლოდ ერთხელ, საჩვენებლად აამუშავეს, ერთ-ერთი ადგილობრივი ოჯახის ეზოში უმოქმედობისგან იჟანგება: _ შარშან, “ბიზნეს-კურიერში” გავიდა სიუჟეტი, რომლის მიხედვითაც, ჩიბათში გაიხსნა ჩაის გადამამუშავებელი საწარმო. გახსნას, საგანგებოდ ამ საქმისთვის ჩამოსული გუბერნატორიც ესწრებოდა. მაშინ იყიდეს ჩაი მამათში, მოიტანეს და ერთჯერადად გადაამუშავეს. ამით დამთავრდა ყველაფერი. ამ საწარმომ მთელი საქართველოს საჩვენებლად მხოლოდ ერთ დღეს იმუშავა. დღეს ბრეზენტგადაფარებული უმოქმედოდ დევს, _ თქვა ოპოზიციონერმა.
ჩვენ, ჩიბათში მისულებმა როლერი მოვიკითხეთ, მაგრამ აღმოჩნდა, რომ ადგილობრივ ხელისუფლებას დანადგარი სოფლიდან წაუღია. ჩიბათის კულტურის სახლიც მოვინახულეთ და იქ ვერც სარემონტო სამუშაოების კვალს, მითუმეტეს, მოქმედ საწარმოს ვერ მივაგენით. საწარმო, რომლის შესახებაც თებერვლის დასაწყისში გვესაუბრებოდა გამგებელი, მთელი ჩიბათის ტერიტორიაზე ვერ აღმოვაჩინეთ. ამ თემასთან დაკავშირებით გამგებლის კომენტარის მოპოვებასაც შევეცადეთ, მაგრამ გამგეობის პრეს-ცენტრის ხელმძღვანელმა, ეთერ ჭყონიამ “აგრობიზნესცენტრის” დირექტორთან, გელა ზოიძესთან გადაგვამისამართა; მან გვითხრა, რომ ამ თემასთან დაკავშირებულ ყველა დეტალში, ყველაზე უკეთ ზოიძე გაგვარკვევდა.
ჩვენც გელა ზოიძეს ვესაუბრეთ:
_ ბატონო გელა! რამდენიმე თვის წინ ჩიბათში ჩაის გადამამუშავებელი მცირე საწარმო უნდა ამოქმედებულიყო, მაგრამ მის კვალს ვერსად მივაგენით…
_ მე ა(ა)იპ “აგრობიზნესცენტრის” ხელმძღვანელი ვარ. ჩიბათის კულტურის სახლი, რომელიც ამჟამად მიტოვებულია და უფუნქციოდაა დარჩენილი, ჩვენს ფირმას დროებით სარგებლობაში გადმოეცა 20-წლიანი უზურფრუქტით. მთელი ეს დრო დასჭირდა ხელშეკრულებების მომზადებას. ამჟამად შენობაში შეტანილია სარემონტო მასალები და სამუშაოებიც მიმდინარეობს. რამდენიმე კერძო პირის გაერთიანებით შეიქმნა კოოპერატივი “ჩიბათი”, რომელმაც ჩაის პლანტაციის შეღობვისა და განახლების სამუშაოები ჩაატარა. შეიღობა 4 ჰექტარი კერძო პლანტაცია, გადაიჭრა გაველურებული ჩაის ნარგავები და აგვისტოში პირველი მოსავალი უნდა მივიღოთ. აგვისტოს ბოლოს ამოქმედდება მცირე საწარმო, რომელმაც პირველი პროდუქცია უნდა გამოუშვას.
_ ჩვენთან ტრადიციად იქცა, რომ ყველაფრის აშენებას და ექსპლუატაციაში გაშვებას არჩევნების მოახლოვებას უკავშირებენ. ამ შემთხვევაშიც ასეა?
_ რატომაა ასე? არჩევნებამდე ჯერ კიდევაა დარჩენილი რამდენიმე თვე. ჩვენ კი ამ საკითხზე 3 წელია, ვმუშაობთ. მეორე მინისაწარმო ჯურუყვეთში უნდა გაკეთდეს. ის როლერი, რომელიც ჩიბათში ერთ-ერთი სახლის ეზოში იდგა, ჯურუყვეთში გადავიტანეთ.
_ თქვენი ოპონენტი ჩვენთან საუბრისას აღნიშნავდა, რომ შარშან საჩვენებელი ნომერი მოაწყვეთ _ მამათიდან ჩამოიტანეთ 30 კილოგრამი ჩაი, გადაამუშავეთ და ამით დამთავრდა ყველაფერი.
_ ჩაი მამათიდანაც ჩამოვიტანეთ და მცირე რაოდენობით ჩიბათშიც მოიკრიფა. იმ ოჯახს, რომლის ეზოშიც დანადგარი იდგა, აქვს კარგად მოვლილი მცირე პლანტაცია და მათთანაც მოიკრიფა ჩაი. მართალია, ეს საჩვენებელი, საცდელი სამუშაო იყო _ გვაინტერესებდა, როგორ იმუშავებდა დანადგარი. ეს დანადგარები ჩვენ უკრაინაში შევუკვეთეთ და დავამზადებინეთ. ყველაფერმა კარგად ჩაიარა და ახლა ვაპირებთ მის ამუშავებას. ჯურუყვეთში 50 ჰექტარი კერძო ჩაის პლანტაციაა. ამ სოფელში დღემდე არ შეუწყვეტია მოსახლეობას ჩაის კრეფა.
_ ჩვენი ხელისუფლებისთვის ჩაის წარმოება დიდი ხანია, აღარ ითვლება პრიორიტეტულ მიმართულებად. თქვენ რას აპირებთ? რა უნდა უქნათ გამომუშავებულ პროდუქციას? როგორ უნდა იმუშაოთ, როცა სახელმწიფოს ამ მიმართულებით არანაირი სტრატეგია არ გააჩნია?
_ მართალია, რომ სახელმწიფოს მხრიდან კარგა ხანია, აღარ ხდება ამ სფეროს სუბსიდირება. სწორედ იმის დამტკიცებას ვცდილობთ, რომ ქართული ჩაის მრეწველობის განვითარება შესაძლებელია და სწორად დაგეგმვის შემთხვევაში, მომგებიანიც იქნება. მცირე სიმძლავრის გლეხური მეურნეობების შექმნით და ხელშეწყობით, შესაძლებელი გახდება ამის მიღწევა. პროდუქციის გატანას უკრაინაში, ხერსონის ოლქში ვგეგმავთ. ამ თემაზე დიდი ხანია, მოლაპარაკებებს ვაწარმოებთ. ყველასთვის ცნობილია, რომ ლანჩხუთსა და ხერსონის ოლქის ქალაქ ნოვაია კახოვკას მეგობრული და პარტნიორული ურთიერთობები აქვთ.
_ ელგუჯა ჩხაიძე აღნიშნავდა, რომ ნოვაია კახოვკა პატარა, არც თუ ისე განვითარებული დაბაა და ლანჩხუთსა და ამ ქალაქს შორის არსებული ეკონომიკური ურთიერთობები უფრო მითია, ვიდრე სინამდვილე…
_ ეს არის 90 000-იანი ქალაქი, სადაც კარგადაა განვითარებული მანქანათმშენებლობა. ქალაქში მუშაობს გიგანტური ქარხანა, რომელიც სამრეწველო ჯგუფ “იუჟნი”-ის წევრია. ახლა იგი სამოქალაქო პროდუქციასაც ამზადებს. სწორედ აქ შევუკვეთეთ და დავამზადებინეთ მცირე საწარმოსთვის როლერი და საშრობი კამერა. ეს დანადგარები უმაღლეს ტექნოლოგიურ დონეზეა შესრულებული და მხოლოდ მაღალი ხარისხის პროდუქციას გადაამუშავებს. მნიშვნელოვანია კიდევ ერთი მომენტი _ საშრობში შეიძლება არა მხოლოდ ჩაის ფოთლის, არამედ ხილისა და ბოსტნეულის გამოშრობაც.
_ ეს იმას ნიშნავს, რომ საკონსერვო საწარმოს გაკეთებასაც გეგმავთ? თუ ესეც მორიგი პიარგეგმაა მოსახლეობის გულის მოსაგებად?
_ აგვისტოდან ამუშავდება მინისაწარმო. როცა ჩაის მიღება და გადამუშავება დამთავრდება, გამორიცხული არაა ხილის მიღებაც დავიწყოთ, ეს დამატებითი შემოსავლის წყარო გახდება მოსახლეობისთვის.
_ გამგებელი ამბობდა, რომ ამ პროექტზე, დაახლოებით, 200 ადამიანის დასაქმება იგეგმებოდა.
_ ის, ალბათ, გულისხმობდა მოსახლეობის იმ რაოდენობას, რომლებიც მოკრეფენ და გადასამუშავებლად ჩააბარებენ ჩაის. თვითონ საწარმოში, დანადგარებთან, 10 კაცი იმუშავებს.
“აგრობიზნესცენტრის” დირექტორი დაგვპირდა, რომ ჩაის გადამამუშავებელი მცირე საწარმოების გახსნამდე, აუცილებლად მოაწყობს საინფორმაციო ხასიათის შეხვედრას და მედიას ყველა დეტალს შეატყობინებს. იგი იმის გამოც წუხდა, რომ ჩვენ მიერ გამოქვეყნებულმა მასალამ შეიძლება, უარყოფითი როლი შეასრულოს საწარმოს გახსნის საქმეში(?!).
ამ დროისთვის რეალობა ასეთია: ჩიბათში არანაირი ჩაის გადამამუშავებელი მცირე საწარმო, რომლის გახსნასაც 6 თვის წინ გვპირდებოდნენ, არ არსებობს. თუ ადგილობრივი მთავრობა მოინდომებს და ამ საკითხს დადებითად გადაჭრის, “ხელის შემშლელებად” ნამდვილად ვერ გამოვდგებით.
