ქალაქ ოზურგეთის მუნიციპალიტეტის საკრებულოს წევრმა თამარ ნადრიძემ და ადვოკატმა კახა ჩავლეშვილმა ერთობლივი სარჩელით ოზურგეთის რაიონულ სასამართლოს რამდენიმე დღის წინ მიმართეს. სასამართლო პროცესი ჯერ არ გამართულა.
მოსარჩელეები ქალაქ ოზურგეთის მუნიციპალიტეტის მერს, ასევე, ქალაქ ოზურგეთის მუნიციპალიტეტის საკრებულოსა და საკრებულოს ბიუროს ედავებიან. მოსარჩელეების მოთხოვნაა ბათილად იქნეს ცნობილი შემდეგი აქტები:
“ ქალაქ ოზურგეთის მუნიციპალიტეტის მერის გადაწყვეტილება ქ. ოზურგეთის მუნიციპალიტეტის საკრებულოსათვის მიმართვის თაობაზე; ქალაქ ოზურგეთის მუნიციპალიტეტის საკრებულოს ბიუროს რიგგარეშე სხდომის 19.12.2016 წლის გადაწყვეტილება; ქალაქ ოზურგეთის მუნიციპალიტეტის საკრებულოს 20.12.2016 წლის განკარგულება #64 “.
სამივე აქტი შეეხება ქალაქ ოზურგეთში 9 აპრილის პარკის ნაწილის, პირდაპირი განკარგვის წესით (აღნაგობის უფლებით), 45 წლის ვადით გაცემას. მოსარჩეელეების განმარტებით, გარდა იმისა, რომ გადაცემული ტერიტორია წარმოადგენს საჯარო სივრცეს, რომლის არსებობას განსაკუთრებული მნიშვნელობა აქვს ქალაქ ოზურგეთისთვის, ამასთანავე მუნიციპალიტეტმა ასეთი მოქმედებებით შელახა მათი უფლებები,კონკრეტულად, ის, რომ არ იყვნენ ინფორმირებული მუნიციპალიტეტის საკუთრებაში არსებული ოქმების განკარგვის შესახებ და არ მიეცათ საშუალება, მიემართათ საკრებულოსათვის მათი მოსაზრებებით და არ ჰქონდათ შესაძლებლობა, ჩართულიყვნენ გადაწყვეტილების მიღებაში.
რაც შეეხება საკრებულოს წევრს თამარ ნადირიძეს, როგორც ის სარჩელში აღნიშნავს, არ ჰქონდა საშუალება, კანონით დადგენილი წესით მოეხდინა თავისი უფლებამოსილების გახორციელება ან/და მოეხდინა ამომრჩევლის ინფორმირება.
ადვოკატი კახა ჩავლეშვილი “გურია ნიუსთან“ თავის მოსაზრებას აფიქსირებს:
“მიმაჩნია, რომ მუნიციპალიტეტის მხრიდან დარღვეული იქნა მოქმედი კანონმდებლობა უძრავი ქონების განკარგვისას, რაც, ჩემი აზრით, საკმარისზე მეტად მაქვს დასაბუთებული სარჩელში და სახეზე გვაქვს თვითმმართველობის გახორციელების ძირითადი პრინციპების უგულებელყოფა, კერძოდ, დარღვეულია მოსახლეობის წინაშე ანგარიშვალდებულების, კანონიერების და საჯაროობის პრინციპები, ასევე არ მომხდარა მუნიციპალიტეტის მოსახლეობის აზრის გათვალისწინება გადაწყვეტილების მიღებისას და არ ყოფილა ადგილობრივი თვითმმართველობის გახორციელებაში მოქალაქეთა ჩართვის მცდელობაც კი. რაც მთავარია, დარღვეულია თვითმმარველი ერთეულის ქონების განკარგვის ძირითადი პრინციპები.
სარჩელი შეეხება დღევანდელ თვითმმართველობაში არსებულ პრობლემებს, რომელთა მიმართებაში ჩვენ და ოზურგეთის მუნიციპალიტეტის თანამდებობის პირებს განსხვავებული ხედვა გვაქვს. შესაბამისად, ჩვენი უთანხმოების გადაჭრის მიზნით, მივმართეთ სასამართლოს. ვფიქრობ, რომ სარჩელი დასაბუთებულია და არ არსებობს მისი დაკმაყოფილების დამაბრკოლებელი გარემოებები. ერთია, როცა საზოგადოების ნაწილს გააჩნია პროტესტის გრძნობა მუნიციპალური პარკის ნაწილის გასხვისებასთან დაკავშირებით და მეორეა, ეს პროტესტი მიმართული უნდა იქნეს ოზურგეთის მერიის მიმართ თუ საკანონმდებლო ხელისუფლების მიერ, რომელიც ვერ ახერხებს ნორმალური კანონმდებლობის შემოღებას.
ფაქტია, რომ ოზურგეთში არსებობს საზოგადოებრივად აქტიური ადამიანები, რომელსაც მერიისაგან განსხვავებული ხედვები გააჩნიათ, მიუხედავად ამისა, არ არსებობს არანაირი კონტაქტი ამ ადამიანებთან გადაწყვეტილებების მიღებამდე, რაც ძალიან ცუდია, რადგანაც თვითმმართველობამ მოქალაქეების ნებისმიერი აქტივობა უნდა წაახალისოს“, _ ამბობს ჩავლეშვილი.
ქალაქ ოზურგეთის მერი ბეგლარ სიორიძე “გურია ნიუსთან“ ამბობს, რომ ოზურგეთის მერია აუცილებლად გააგრძელებს მსგვასი პროექტების გახორციელებას:
,,დღეს სასამართლო პრეცესზე მიღებულმა გადაწყვეტილებამ ცხადყო და ჩვენს ოპონენტებს კიდევ ერთხელ დაანახა, რომ ქალაქ ოზურეგთის მუნიციპალიტეტის მერიამ ე.წ. 9 აპრილის სკვერის ხარჯზე აპოლონ წულაძის ქუჩის რეაბილიტაციის საკითხი, მსგავსად სხვა საკითხებისა, კანონმდებლობის სრული დაცვით წარმართა. მთელი ეს პროცესი თავიდან ბოლომდე კანონის ჩარჩოებში იყო მოქცეული და პროექტის საბოლოო გახორციელებამდე, საკითხმა ყველა საჭირო ინსტანცია გაიარა. მოხარული ვარ, რადგან სკვერის რეაბილიტაციით ჩვენმა თანამოქალაქელეებმა მყისიერად იგრძნეს პროექტის სასარგებლო შედეგი. აპოლონ წულაძის ქუჩაზე გადატვირთული ავტოსატრანსპორტო მოძრაობა უკვე განმუხტულია. ჩვენ აუცილებლად გავაგრძელებთ ისეთი პროექტების გახორციელებას, რომელიც, უპირველესად, მიმართული იქნება ჩვენი ქალაქის კეთილდღეობისა და მისი განვითარებისათვის. ამ მთავარი მიზნის გახორციელებაში არანაირი ბარიერი არ შეგვექმნება“.
