ოზურგეთისა მუნიციპალიტეტის საკრებულოს გადაწყვეტილებით, 2011 წლის ადგილობრივ ბიუჯეტში სოციალურ დახმარებებზე 575 100 ლარია გათვალისწინებული, ხოლო ჩოხატაურის მუნიციპალიტეტის საკრებულომ კი “სოციალური დაცვის” მუხლში 2011 წლის ადგილობრივი ბიუჯეტიდან 144 600 ლარი გამოჰყო. ამასთან, სოციალური დახმარებების პაკეტში მნიშვნელოვანი ცვლილებები და სიახლეებია ორივე მუნიციპალიტეტში.
შეიცვალა ადგილობრივი ხელისუფლების მიდგომა სოციალურად დაუცველი მოსახლეობის დახმარებასთან მიმართებაში, დაწესდა გარკვეული კრიტერიუმები. ასე, მაგალითად, ორივე მუნიციპალიტეტში იმისათვის, რომ მრავალშვილიანმა (იგულისხმება ოთხი და მეტი შვილი) ოჯახმა, ან ოჯახმა, რომელსაც ახალშობილი შეეძინა, მიიღოს ადგილობრივი ბიუჯეტით გათვალისწინებული სოციალური დახმარება, ორ კრიტერიუმს უნდა აკმაყოფილებდეს: 1) რეგისტრირებული უნდა იყოს სოციალურად დაუცველი ოჯახების მონაცემთა ერთიან ბაზაში და 2) ოჯახის სარეიტინგო ქულა უნდა იყოს: ა) 57.000-ზე მეტი და არ აღემატებოდეს 100.000-ს (მრავალშვილიანი ოჯახების დახმარების შემთხვევაში); ბ) 70.000-ზე მეტი და არ აღემატებოდეს 100.000-ს (ახალშობილის ოჯახების დახმარების შემთხვევაში). ანუ პირველ (ე.ი. მრავალშვილიანი ოჯახების ყოველთვიური დახმარების) შემთხვევაში ბენეფიციარი შეიძლება იყოს მხოლოდ მონაცემთა ერთიან ბაზაში რეგისტრირებული ის ოჯახი, რომელიც სახელმწიფოსაგან სარგებლობს სამედიცინო პოლისით, მაგრამ არ ღებულობს ფულად შემწეობას, ხოლო მეორე შემთხვევაში კი ახალშობილის ოჯახების ერთჯერადი დახმარების ბენეფიციარი შესაძლებელია იყოს, ასევე მხოლოდ მონაცემთა ერთიან ბაზაში რეგისტრირებული ის ოჯახი, რომელიც სახელმწიფოსგან არ სარგებლობს არც სამედიცინო პოლისით და არც ფულადი შემწეობით.
შესაძლოა, ზემოაღნიშნული ორი სახის სოციალური დახმარების მიმღები ოჯახების კატეგორიათა მსგავსი ტიპის კრიტერიუმებით შეზღუდვა ორივე მუნიციპალიტეტის პასუხისმგებელი თანამდებობის პირების არაადეკვატურად მაღალი და საკმაოდ ხშირი პრემიების ფონზე, ერთგვარად, “უხერხულობის” (და არა მარტო უხერხულობის) მომენტსა და განცდას ქმნიდეს, მაგრამ ამგვარი კრიტერიუმების დაწესებაში უკანონო არაფერია; უბრალოდ, ამ ეტაპისთვის, ადგილობრივი ხელისუფლებ თვლის, რომ ასე უმჯობესია _ ასეთია მისი პოლიტიკა სოციალურ დახმარებებთან მიმართებაში.
გარდა უკვე ნახსენები სოციალური დახმარებებისა, ორივე მუნიციპალიტეტის 2011 წლის ადგილობრივი ბიუჯეტი ითვალისწინებს სხვა ტიპის (ძირითადად ერთჯერადი სახის) დახმარებებსაც, კერძოდ: ლტოლვილთა დახმარების პროგრამას, ვეტერანთა დახმარების პროგრამას, შეჭირვებულ მოქალაქეთა სამედიცინო მომსახურების თანადაფინანსებას, სტიქიური მოვლენების (მიწისძვრა, ხანძარი, მეწყერი, წყალდიდობა) შედეგად უსახლკაროდ დარჩენილი ოჯახებისადმი დახმარების პროგრამას და სხვა. ორივე მუნიციპალიტეტის მიერ 2011-2014 წლებისთვის გამოცხადებულ სოციალური დაცვის პრიორიტეტებში ტრადიციულად წამყვანი ადგილი უჭირავს მუნიციპალიტეტის უფასო სასადილოს დაფინანსებასა და უკიდურესად შეჭირვებულ, ოჯახის მზრუნველობამოკლებულ პირთა უზრუნველყოფას ყოველდღიური ერთჯერადი კვებით. ორივე მუნიციპალიტეტის ბიუჯეტი ითვალისწინებს, ასევე ხანდაზმულ (100 და მეტი წლის) პირთა ერთჯერად დახმარებას; ადგილობრივი ბიუჯეტიდან დაიფარება აგრეთვე უპატრონო მიცვალებულთა დაკრძალვის ხარჯები.
ახლა კი რაც შეეხება უშუალოდ ოზურგეთისა და ჩოხატაურის მუნიციპალიტეტის საკრებულოთა მიერ წარმოდგენილ სოციალური დახმარებების გაცემის წესს. არცერთ მათგანში ნათლად არ არის გაწერილი სოციალური დახმარებების დანიშვნა-გაცემის ორგანიზებისა და ადმინისტრირების საკითხები, დასახვეწია ბენეფიციარის მიერ სოციალური დახმარების დასანიშნად ან მისაღებად საჭირო დოკუმენტაციის წარდგენის წესი და პირობები, საჭიროა გადაწყვეტილების მიღების წესის დეტალური რეგლამენტაცია, გამოკვეთილად უნდა იქნას ასახული სოციალური დახმარების გაცემის საკითხთან დაკავშირებით ადმინისტრაციული წარმოების პროცედურები, გამჭვირვალობისა და საჯაროობის მომენტები აღნიშნული საკითხების განხილვისას.
სწორედ ამ ხარვეზების შევსების მიზნით, “საქართველოს დემოკრატიული განვითარების კავშირმა” გადაამუშავა ოზურგეთისა და ჩოხატაურის მუნიციპალიტეტის საკრებულოთა მიერ წარმოდგენილი სოციალური დახმარებების გაცემის წესი და შეავსო იგი ზემოაღნიშნული საკითხების დეტალურად მარეგულირებელი ნორმებით. სოციალური დახმარებების გაცემის წესის ამგვარად გადამუშავებული ტექსტი, რეკომენდაციის სახით, სამუშაო ვარიანტად შეთავაზებული იქნა ორივე მუნიციპალიტეტის საკრებულოსთვის, მათი შემდგომი განხილვის მიზნით. ახლა ჯერი საკრებულოებზეა. ვნახოთ, რამდენად მნიშვნელოვანია მათთვის სოციალური დახმარებების გაცემის გამართული წესის ქონა, რომელშიც ამ სფეროსთან დაკავშირებული ყველა მნიშვნელოვანი საკითხი დეტალურად იქნება გაწერილი.
ირაკლი პაპავა, “საქართველოს დემოკრატიული განვითარების კავშირი”
სტატია მომზადებულია ევრაზიის თანამშრომლობის ფონდის მიერ დაფინანსებული პროექტის “სახალხო ინიციატივები
დემოკრატიისთვის” ფარგლებში
