რომელიც მოსახლეობის დიდ ნაწილს 1000-ლარიანი ვაუჩერი ეგონა და რესპონდენტებიც „გურია ნიუსთან” საუბარში სწორედ ასე მოიხსენიებდნენ. ხელშეკრულებასაც და ლიფლეტსაც, ერთი და იგივე პარტიული დევიზი _ “მეტი სარგებელი ხალხს!” აწერია. ლიფლეტი, წარწერის მიხედვით, ერთიანი ნაციონალური მოძრაობის დაკვეთით დაიბეჭდა და იგი მეორე ნაბეჭდი პროდუქტის განუყოფელი ნაწილია, თუმცა ნაბეჭდი მასალების განუყოფლობა აკინძვას და შესაბამის დადასტურებას მოითხოვს.
ხელშეკრულებას ხელს სააკაშვილი, მერაბიშვილი აწერენ ბეჭდური ასოებით და ერთიანი ნაციონალური მოძრაობის ბეჭედი აქვს დასმული. ყველაზე მნიშვნელოვანი კი, რის გამოც მოსახლეობა ლიფლეტს ვაუჩერად მიიჩნევს, სამ სვეტად გაყოფილი ლიფლეტის ის ნაწილია, რომელსაც აწერია: “1000 ლარიანი ვაუჩერი. ოჯახი თავად წყვეტს რა ხარჯი დაფაროს”.
ვაუჩერის შესახებ ლიფლეტების, ასევე საქართველოსთან ხელშეკრულების დახარისხება და გადანაწილება “გურია ნიუსმა” გადაიღო. მისი განმანაწილებელი ამავე სოფლის რწმუნებული, ვაჟა მახარაძეა. მისი თქმით, მოსახლეობა ინფორმირებული უნდა იყოს ვაუჩერთან დაკავშირებით და წინასწარ ხდება ხალხისთვის ინფორმაციის მიწოდება. მან ჩვენთან სატელეფონო საუბრის დროს თქვა, რომ ჯერ არ იცის, როდის დარიგდება ვაუჩერი, მაგრამ, გუშინ, სამუშაო დროს ძალიან აქტიურად მუშაობდა მმართველი პარტიის მხარდასაჭერად.
_ ეს იყო, “პროსტო” საფუძველი, რომ ვაუჩერებზე წარმოდგენა ჰქონოდათ ხალხს, თორემ ვაუჩერები ვინ მიიღო საერთოდ!
_ ბატონო ვაჟა, ანუ ხალხს აცნობიერებთ, რა სარგებლობას მოუტანს ეს ვაუჩერი?
_ არა, სარგებლობას კი არ მოუტანს, ხალხს თუ აქვს წარმოდგენა ვაუჩერზე, როგორ მოიხმარს, რა ქვია.
_ რამდენი დარიგდა ეს ხელშეკრულება და ბიულეტენი?
_ გაცნობის სახით 100 ცალი ბიულეტენი იყო, მეტი არ ყოფილა.
_ როგორც დვაბზუში გვითხრეს, ვაუჩერის გაცნობის კუთხით, ხალხს ასევე პირადობის მოწმობის ნომერს აწერინებენ.
_ არა, კაცო, რა პირადობის მოწმობა, რა შუაშია ვაუჩერთან ეს პირადობის მოწმობები? არა, გეფიცებით კაცობას. რის პირადობა, რა პირადობა. რაში უნდა მოითხოვო, ვერ ვხვდები. მე, არ ვიცი, ვინ რას ამბობს, არანაირ პირადობის მოწმობას არ ითხოვენ. ხალხის ოცნებაა, ვაუჩერი კი არა ოცნებაა, გაზი გაკეთდეს ერთი სოფელში და ასფალტი დაიგოს.
_ ყუთები ვინ მოგაწოდათ, სადაც ეს დასარიგებელი ბიულეტენები იყო?
_ როგორ მომაწოდა. არ ვიცი, ნამდვილად.
_ ბატონო ვაჟა, ყუთიდან თქვენ ანაწილებდით 1000- ლარიანი ვაუჩერის გაცნობით ბიულეტენს და ეს არ იცით?
_ გამოაგზავნეს.
_ ვინ გამოაგზავნა?
_ არ ვიცი, _ გვითხრა სოფლის რწმუნებულმა.
“საერთაშორისო გამჭირვალობა _ საქართველოს” იურისტის ირინა ურუშაძის თქმით, “საარჩევნო კოდექსის თანახმად, საჯარო მოხელეს ეკრძალება აგიტაციაში ჩაბმა სამუშაო საათებში. აგიტაცია კი აქტივისტების მობილიზებას და სააგიტაციო მასალების დარიგებასაც მოიცავს. სოფლის რწმუნებულის ამ პროცესებში ჩართულობა ადმინისტრაციული რესურსის გამოყენების ერთ-ერთი მაგალითია, რასაც აუცილებლად უნდა მოჰყვეს რეაგირება საარჩევნო ადმინისტრაციიდან”: _ რაც შეეხება “ხელშეკრულებას საქართველოსთან”, ის პარტიის სააგიტაციო მასალაა, რისი დარიგების უფლებაც პარტიას აქვს. მთავარია, ეს პროცესი აღიქმებოდეს როგორც საარჩევნო აგიტაცია და მიმდინარეობდეს კანონის დაცვით, ადმინისტრაციული რესურსების გამოყენების გარეშე, _ გვითხრა ირინა ურუშაძემ.
“გურია ნიუსი” ამ საკითხთან დაკავშირებით, ვახტანგ ბალავაძეს დაუკავშირდა.
_ ბატონო ვახტანგ, მუნიციპალიტეტის რწმუნებულებს აქვთ თუ არა უფლება წინასაარჩევნო პერიოდში მონაწილეობა მიიღონ, რომელიმე პარტიის მხარდასაჭერ აგიტაცია-პროპაგანდაში? მაგალითად, ბუკლეტის გადაწილება-დარიგებაში…
_ კი, არასამუშაო პერიოდში ყველას შეუძლია.
_ და თუ ეს სამუშაო პერიოდში ხდებოდა?
_ ისინი არიან საჯარო მოხელეები ანუ არიან გამგეობის თანამშრომლები, როგორც ნებისმიერ სხვა გამგეობის თანამშრომელს, თავისთავად შეიძლება ჰქონდეს თავისი პოლიტიკური შეხედულება, მაგრამ მთავარი არის ერთი რამ: საჯარო მოხელის შესახებ კანონის, კოდექსის მიხედვით, რომელიც ვრცელდება მათზეც, სამსახურში პოლიტიკური აგიტაცია არ შეიძლება.
“გურია ნიუსი” ოზურგეთის მუნიციპალიტეტის გამგებლის მოვალეობის შემსრულებელს ილია ვაშაყმაძეს დაუკავშირდა, მაგრამ მისი მობილური “გასული იყო მომსახურეობის ზონიდან.”
“ერთიანი ნაციონალური მოძრაობის” ოზურგეთის რაიონული ორგანიზაციის პრესსპიკერის ლია კილაძის თქმით, “მმართველმა პარტიამ დაიწყო პროგრამა “კარდაკარი”, რომელიც განხორციელდება საქართველოს ყველა დიდ ქალაქში: თბილისში, რუსთავში, გორში, ქუთაისში, ფოთში, ბათუმში, ზუგდიდში და ეტაპობრივად, ქვეყნის ყველა მუნიციპალიტეტში”: “კარდაკარის” ჩატარებას უზრუნველყოფენ პარტიის რეგისტრირებული მხარდამჭერები, რომლებიც მოსახლეობას “ერთიანი ნაციონალური მოძრაობის” პროგრამას – “მეტი სარგებელი ხალხს!” გააცნობენ და ასევე, ჩვენი პარტიის მხარდამჭერებს აღრიცხავენ.
აღნიშნული პროექტი ხორციელდება საქართველოს კანონმდებლობის სრული დაცვით, _ გვითხრა ლია კილაძემ, თუმცა, რა შუაშია პროგრამა „კარდაკარი” საქართველოსთან ხელშეკრულებასთან ან სააგიტაციო ლიფლეტთან, რომლებიც პირდაპირ ბიუჯეტიდან დაფინანსებულ, 1000-ლარიან ვაუჩერს პირდება მოსახლეობას, გაუგებარია.
