ანუ ზუსტად იმდაგვარად, როგორადაც ჩვენ ვაპირებდით გამოყენებას. თუ აქამდე ცესკო-ს მსგავსი რამ არ გაუკეთებია, ახლა რატომ განმარტა კანონი არასწორად, ჩვენს საწინააღმდეგოდ?! ეს ნიშნავს იმას, რომ ამით პოლიტიკურად გადაწყვიტა ჩვენს მიმართ წინააღმდეგობებისა და ბარიერების შექმნა“, _ განაცხადა პარტია „ქართული ოცნება _ დემოკრატიული საქართველოს თავმჯდომარე მანანა კობახიძემ „გურია ნიუსთან“ საუბრისას.
ცოტა ხნის წინ, ცესკოში გამართულ წილისყრაზე, საარჩევნო ბლოკ „ბიძინა ივანიშვილი – ქართული ოცნება“-ს საარჩევნო ნომრად N41 განესაზღვრა, რასაც ცესკოს წინ “ქართული ოცნების” მხარდამჭერთა და ლიდერების აქცია მოჰყვა.
მანანა კობახიძე: „ცესკოს ამ გადაწყვეტილებას გავასაჩივრებთ 48 საათში. ვნახოთ, სასამართლო როგორ განმარტავს ამ კანონს, რადგან კანონის განმარტების უფლება აქვს სასამართლოს. რა თქმა უნდა, მე არ მაქვს იმის ილუზია, რომ საქართველოში მართლმსაჯულება და სასამართლო სამართლიანია, ამიტომ რამე განსაკუთრებულს არ ველოდები სასამართლოსგან. ჩვენ 7 ნომრის დაცვას განვახორციელებთ ბოლომდე. მაგრამ რა ნომრითაც არ უნდა გამოვიდეთ, საერთოდ უნომროდაც რომ გამოვიდეთ, „ბიძინა ივანიშვილი _ “ქართული ოცნება” მაინც გაიმარჯვებს ამ არჩევნებში. ჩვენ 1 ოქტომბერს “ნაციონალური მოძრაობის” #5 ვეტყვით არას და გავისტუმრებთ მათ ხელისუფლებიდან. ამიტომ, ნომრებით მანიპულირებას, ჯობია თავი დაანებონ და ნუ ეშინიათ ციფრების.
_ როგორ ფიქრობთ, რაში დაჭირდა ცესკო-ს ამ გადაწყვეტილების მიღება და რა შეიცვლება ნომრის შეცვლით?
_ ჩვენ გვეკუთვნოდა #7, რადგან ბლოკში შემავალი ერთ-ერთი კონსერვატიული პარტია სარგებლობდა ამ ნომრით წინა საპარლამენტო არჩევნებზე. საარჩევნო კოდექსის 119-ე მუხლი გვაძლევდა შესაძლებლობას, გვესარგებლა ბლოკში შემავალი ერთ-ერთი პარტიის ნომრით, ამიტომ, ჩვენ ეს გამოვიყენეთ, განცხადებით მივმართეთ ცესკოს და მოვითხოვეთ მოენიჭებინათ 7 ნომერი.
რამდენადაც კანონი ამის საფუძველს იძლეოდა, ჩვენ ვახმოვანებდით 7 ნომერს. საარჩევნო კამპანია 7 ნომრით გვქონდა დაწყებული. მაისურებზეც იყო წარწერები გაკეთებული, აქსესუარებზეც. როგორც ჩანს, ხელისუფლებას შეეშინდა 7 ნომრის. უფრო სწორად, მათ გადაწყვიტეს პოლიტიკური მანევრით ხელი შეეშალათ ჩვენი საარჩევნო კამპანიისთვის. აბსოლუტურად არასწორად გვითხრეს უარი, თითქოსდა კანონი უნდა იყოს ინტერპრეტირებული იმდაგვარად, რომ ბლოკში შემავალი ყველა პარტია უნდა იყოს წინა არჩევნების მონაწილე. მსგავსი რამ არ წერია კანონში, სიტყვა „ყველა“ მითითებული არ არის. კანონში წერია, რომ ბლოკში შემავალი პარტიის ნომერი, რომელიც მონაწილეობდა წინა არჩევნებში, შეიძლება იყოს გამოყენებული.
_ ქდმ-მ კენჭისყრაში მიიღო მონაწილეობა?
_ რამდენადაც ვიცი, „ქრისტიან დემოკრატებს“ არ მიუღიათ კენჭისყრაში მონაწილეობა, რომლითაც ჩვენ 41 ნომერი განგვესაზღვრა. სწორედ იმიტომ, რომ მათ მიმართ კანონი იყო იმდაგვარად გამოყენებული, როგორადაც ჩვენს მიმართ უნდა ყოფილიყო ეხლა. ჩემი აზრით, ესეც ლოგიკურია მონაწილეობა რომ არ მიიღეს. მაშინ გამოდის, რომ საკუთარი თავის წინააღმდეგ უნდა მიეცათ ხმა. ისინიც ანალოგიურ სიტუაციაში იყვნენ წინა არჩევნებში.
_ ადამიანებს N7 გარკვეულწილად, ქვეცნობიერში დარჩათ როგორც „ქართული ოცნების“ ნომერი. ეს ხომ არ შეგიქმნით გარკვეულ პრობლემებს? თუნდაც ფინანსური თვალსაზრისით ხომ არ დაგაზარალებთ?
_ რა თქმა უნდა, ეს ქმნის პრობლემას ტექნიკურადაც და ფინასურადაც. ბუნებრივია, ხელისუფლებას ეს გათვლა ჰქონდა, რომ ჩვენ აღარ ვისარგებლოთ ამ მაისურებით, ბანერებით, ამდენი სოფელი რომ მოვიარეთ და N7 ვახმოვანებდით, ხელახლა უნდა ჩამოვუაროთ იმ ხალხს და ხელახლა უნდა ვუთხრათ.
ჩვენ დავიცავთ N7 სამართლებრივად, ვიდრე შეიძლება რომ დავიცვათ. მაგრამ რა ნომერიც არ უნდა დაუფიქსირდეს “ქართულ ოცნებას”, ჩვენ აუცილებლად გავიმარჯვებთ. ნომრები არ წყვეტს საქმეს, საქმეს წყვეტს ხალხი.
