_ მე ნამდვილად ვიცი, რომ ისინი პანკისიდან გადმოვიდნენ, ლოპოტას ხეობაში მოხვდნენ პანკისის ხეობიდან. ამას ადასტურებენ ადგილობრივი მაცხოვრებლები. ძალოვანი უწყებებიდანაც გამოვიდა ეს ხმა. მე მქონდა ვარაუდი, რომ ჩეჩნეთიდან გადმოვიდნენ და ლოპოტას ხეობით დაღესტანში აპირებდნენ გადასვლას.
სესიაშვილი ამბობს, რომ ხელისუფლება უპასუხისმგებლოდ მოიქცა და ეს უტიაშვილის სიტყვებიდანაც დასტურდება:
_ ოფიცერმა, რომელიც “ბოევიკებთან” იყო, მათ უთხრა, რომ გავიდოდა, დარეკავდა და ხელმძღვანელობას მათ პოზიციას გააცნობდა. მან კი ისინი გამოიყვანა იმ ადგილას, სადაც ჩასაფრებულები იყვნენ ჩვენები და სადაც აუტეხეს სროლა იმ ორ ადამიანს, რომელიც ამ ოფიცერს გამოჰყვა. მთავარი შეცდომა ის არის, რომ ხელისუფლებამ არ გააკეთა მაქსიმუმი იმისთვის, რომ სისხლი არ დაღვრილიყო, რასაც შეეწირა ჩვენი სამი ჯარისკაცი, ვაჟკაცი ბიჭები. ლიკვიდაციის ოპერაციის შედეგად გავიჩინეთ მტერი, რომელიც ჩვენი მტრის მტერია და ჩვენი მტრის მტერი რა არის ჩვენთვის, კარგად უნდა გვესმოდეს. ნუგზარ წიკლაური რომ გამოდის და რომ გვეფიცება, კავკასიის ცენტრი საქართველოა და ჩვენ უნდა მივხედოთ ჩვენ კავკასიელ ძმებსო, ასე თუ მივხედეთ, ძმებს კი არა მტრებს გავიჩენთ.
_ ბატონო ირაკლი, რამდენად შესაძლებელია ვაჰაბიტებმა დანაპირები შეასრულონ და დარტყმის სამიზნედ ვიქცეთ?
_ თუკი ამ კითხვებს პასუხი არ გაეცა, შეიძლება, პასუხისმგებლობა რაც აკისრია ხელისუფლებას ამ არაეფექტური ოპერაციის გამო, ხალხს დაეკისროს. ამის ძალიან მეშინია და მე, ამ შემთხვევაში როგორც “ქართული ოცნების” წარმომადგენელი, საზოგადოებას ვპირდები, რომ ამ საქმეს აუცილებლად გამოვიძიებთ და ობიექტურ ჭეშმარიტებას მივაწვდით. ეს ხელისუფლება სიცოცხლეს არ აფასებს. ეს არის ხელისუფლება, რომელიც ეკრანის წინ არის ვაჟკაცი და გვესაუბრება, რომ უსაფრთხო და ძლიერი ქვეყანა გვაქვს; ძლიერი, რომელიც კრიზისების დროს არის აბსოლუტურად უსუსური. 17 კაცს დასდევდა რამდენიმე ათასი ადამიანი და დღემდე არ დასრულებულა ოპერაცია. წარმოიდგინეთ 4-5 მიმართულებით რომ 17-17 კაცი შემოვიდეს რა მოხდება! მთელი ჯარი უნდა გადავისროლოთ და სამი-ოთხი დღე უნდა ვდიოთ? ეს არის ჩვენი უსაფრთხოების სისტემა და ესენი არიან ჩვენი უსაფრთხოების გარანტორები?! ბაქრაძეს ვურჩევ, რომ გამოვიდა და გვეუბნება, უსაფრთხო ქვეყანაში ვცხოვრობთ და საზღვრები დაცულიაო, აიღოს თოხი და ჩანგალი, წავიდეს და საზღვარზე დადგეს! თქვენ ხომ ჟურნალისტი ხართ და გესმით, რა არის პიარი; ამიხსენით _ ქვეყნის სიამაყე სამი ვაჟკაცი ჯარისკაცი დაგვეღუპა, ვენახის ფონზე გამოდის პრეზიდენტი ჯინსებში გამოწყობილი და ისე გვიხსნის რაღაცეებს…
_ პრეზიდენტი ამ წუთებში ოზურგეთში იმყოფება, მაჟორიტარი დეპუტატი უნდა წარადგინოს…
_ ეს ახლა ნორმალურია?! ამათ ჯარისკაცის სიცოცხლე, თუნდაც ბოევიკის თუ შეიარაღებული პირის, არ აინტერესებთ და იმას ვერ ხვდებიან, რომ შეიძლება ის ჩვენი მოქალაქე იყოს… შეიძლება ის შეცდომაშია შეყვანილი და სახელმწიფოს ვალდებულებაა, რომ ეს ყველაფერი გაარკვიოს და საკუთარი მოქალაქე დაიცვას. ყველა ნორმალურ ქვეყანაში, მკვლელის თუ ტერორისტის ლიკვიდაციას კი არ ცდილობენ, ყოველთვის ცდილობენ დაიჭირონ და სასამართლოს წარუდგინონ! ეს პრინციპი არ ესმის ამ ხელისუფლებას.
_ პანკისელების ინფორმაციით, დაღუპული ბიჭები ვაჰაბიტები იყვნენ და დაღესტნის გავლით, სირიაში მიდიოდნენ ამბოხებულების დასახმარებლად…
_ არ ვიცი, ვერსიები შეიძლება ბევრი არსებობს. ობიექტური ჭეშმარიტება შეიძლება დადგენილი იყოს იმ შემთხვევაში, თუ ამათი დაკავება მოხდებოდა. სახელმწიფო დაინტერესებული უნდა იყოს, რომ ფაქტში გაერკვიოს. ამისთვის ადამიანების ჩახოცვა არის ყველაზე უკიდურესი ფორმა. ჩვენ გვყავს ხელისუფლება, რომელიც ებრძვის შედეგებს და არა მიზეზებს. 26 მაისი გაიხსენეთ, ჩატარებული სპეცოპერაცია ხალხის განადგურების მიზნით. პირობითად ეს ფორმა იყო _ ალყა შემოარტყეს ხალხს და გასასვლელი არ დაუტოვეს. სად ჩანს აქ ხელისუფლება, რომელიც სიცოცხლეს პატივს სცემს, მიუხედავად იმისა, რომ კონსტიტუციაში გარკვევით წერია, რომ სიცოცხლის უფლება დაცულია. თუ კონსტიტუციას არ კითხულობენ, სახარება მაინც წაიკითხონ.
