ზაზა ხატიაშვილი კოლეჯის დირექტორს დავით მჭედლიშვილს ღია წერილით მიმართავს და ფაქტზე რეაგირებას საერთაშორისო ორგანიზაციებისგანაც მოითხოვს. ამის შესახებ ინფორმაციას „ახალგაზრდა ადვოკატები“ ავრცელებენ.
„ცალსახად იკვეთება, რომ საზოგადოებრივი კოლეჯის დირექტორის მოადგილის მიმართ ადგილი ჰქონდა ადამიანის პატივის, ღირსებისა და საქმიანი რეპუტაციის შელახვას, პირის დისკრიმინაციულ მდგომარეობაში ჩაყენებას, მისი პროფესიონალიზმის, ცოდნისა და გამოცდილების დისკრედიტაციას, საჯაროდ შეურაცხყოფას და დამამცირებელ მოპყრობას. თქვენი უკანონო და დაუსაბუთებელი მოქმედებები და მიღებული ბრძანებები, რითაც სამსახურიდან დაითხოვეთ თამარ კაიკაციშვილი, ცდება შრომით ურთიერთობაში წარმოშობილ დავას და წარმოადგენს პოლიტიკური დავალების შესრულებას, პოლიტიკურ გადაწყვეტილებას.“ – ნათქვამია ზაზა ხატიაშვილის ღია წერილში.
ზაზა ხატიაშვილის საზოგადოებრივი კოლეჯის დირექტორ დავით მჭედლიშვილს მიმართავს და აცხადებს, რომ სამწუხაროდ, თამარ კაიკაციშვილის გათავისუფლება არც უკანასკნელი იქნება. „სამწუხაროდ, თამარ კაიკაციშვილის გათავისუფლება არც უკანასკნელი იქნება, რომელსაც თქვენს მიერ მხარდაჭერილი პოლიტიკური რეჟიმი განახორციელებს, რადგანაც ქვეყანაში დაკარგულია კანონიერების, სამართლიანობისა და პასუხისმგებლობის სამართლებრივი ჩარჩო. მიხეილ სააკაშვილის რეჟიმს ეწირება ყველა, ვინც არ არის ლოიალური და ნომენკლატურული, გამოირჩევა თავისუფლებითა და არ დაუკარგავს მთავარი – ღირსება.“ – დასძნს ზაზა ხატიაშვილი.
ზაზა ხატიაშვილის თქმით, საქართველოს ადვოკატთა ასოციაცია თამარ კაიკაციშვილის პოლიტიკურ გათავისუფლებასთან და მის დარღვეულ უფლებებთან დაკავშირებით, გააკეთებს ყველაფერს, რათა ფაქტი საჯარო გახდეს საერთაშორისო უფლებადაცვითი ორგანიზაციებისთვის. „ჩემი მხრიდან ეს საკითხი განხილულ იქნება მაღალი რანგის ევროპელ უფლებადამცველებთან. საქართველოს ადვოკატთა ასოციაცია საქმესთან დაკავშირებით შინაგანი რწმენის ჩამოყალიბებისთვის დამატებით ინფორმაციას მიაწვდის საქართველოში საერთაშორისო ორგანიზაციებსა და დიპლომატიურ კორპუსს. მინდა იცოდეთ, რომ პრეცედენტულია გაერო-ს თბილისის ოფისის ის გადაწყვეტილებაც, რომლითაც ეს საქმე, შესაძლებელია ორგანიზაციის ჟენევის ოფისში გაიგზავნოს.“ – აცხადებს ხატიაშვილი.
შეგახსენებთ, რომ თამარ კაიკაციშვილი 2012 წლის 19 ივნისს, კოლეჯის დირექტორმა, ოფიციალური ვერსიით, სასწავლო პროცესში დაშვებული ხარვეზების გამო გაათავისუფლა, მოსარჩელე მხარემ კი ბათუმის საქალაქო სასამართლოს 17 ივლისს მიმართა. დავის საგანს დირექტორის მიერ მიღებული ინდივიდუალურ–ადმინისტრაციული აქტების ბათილად ცნობა და პირის პატივის, ღირსებისა და საქმიანი რეპუტაციის დაცვა წარმოადგენს. ბათუმის საქალაქო სასამართლოში პირველი მოსამზადებელი სხდომა 6 სექტემბრის გაიმართა. სასამართლომ მხარეებს მორიგება შესთავაზა და მთავარ სხდომამდე მორიგების პირობებზე შეთანხმება დაავალა. მოსარჩელე მხარემ 2012 წლის 7 სექტემბერს კოლეჯს მორიგების პირობების შესახებ ოფიციალური წერილით აცნობა, თუმცა უცნობია, რა გადაწყვეტილებას მიიღებს ქობულეთის საზოგადოებრივი კოლეჯის დირექტორი და წარმომადგენლობა. საქმეზე უკვე მოსამაართლე მესამედ შეიცვალა და მთავარ სხდომას უკვე მოსამართლე ხათუნა ბოლქვაძე გაუძღვება.
