თბილისში და ქვეყნის სხვა დიდ ქალაქებში აღშფოთებული და შეურაცხყოფილი მოქალაქეები იმ საღამოსვე გამოვიდნენ ქუჩაში, რეგიონებში კი მეორე დღიდანვე დაიწყო საპროტესტო აქციების ორგანიზება.
ლანჩხუთში, უკვე მესამე დღეა გრძელდება სხვადასხვა პოლიტიკური პარტიებისა და უბრალო მოქალაქეების მიერ წამოწყებული ქუჩის გამოსვლები.
19 სექტემბერს, დღის 12 საათზე კოალიცია “ქართული ოცნების” ორგანიზებით მოეწყო საპროტესტო მსვლელობა, რომელშიც ხალხის შედარებით მცირე რაოდენობა იღებდა მონაწილეობას. დემონსტრანტები, ხმამაღალი შეძახილებითა და გამაყრუებელი ხმაურით ცდილობდნენ უკმაყოფილების გამოხატვას. მათ ფეხით გაიარეს ქალაქის ცენტრალური ქუჩა, რომელიც, ამავდროულად ქვეყნის ერთ-ერთი მთავარი მაგისტრალია. უკმაყოფილო ხალხის ნაკადი მცირე ხნით შეჩერდა პირველ საჯარო სკოლასთან, რომელშიც მეორე საუბნო საარჩევნო კომისიაა დაბინავებული. შენობიდან მათ არავინ გამოხმაურებია.
ამის შემდეგ, დემონსტრანტებმა პოლიციის შუშის შენობისკენ განაგრძეს სვლა. ახალგაზრდებმა სასტვენების გამაყრუებელი ხმაურით გამოხატეს უკმაყოფილება. ჯგუფი მცირე ხნით აქაც შეჩერდა. გამომსვლელებმა მოუწოდეს პოლიციის თანამშრომლებს, გამოსულიყვნენ და საკუთარ ხალხთან დამდგარიყვნენ.
შემდეგი გაჩერება ლანჩხუთის გამგეობის შენობა აღმოჩნდა. გამგეობასთან შედარებით ხანგრძლივი აქცია გაიმართა. გამგეობისა და საკრებულოს რამოდენიმე მაღალჩინოსანი ფანჯრებიდან აკვირდებოდა მოვლენებს. გამომსვლელები დაჟინებით მოითხოვდნენ მათგან, გამოსულიყვნენ და სოლიდარობის მოძრაობას შეერთებოდნენ. გარკვეული დროის შემდეგ, გამგეობის შენობიდან საკრებულოს წევრი მერაბ წილოსანი გამოვიდა. მთელმა ლანჩხუთმა იცის, რომ იგი არასოდეს არიდებს თავს ექსცესების პროვოცირებას და არც თუ თვინიერი ხასიათით გამოირჩევა, მაგრამ ამჯერად საკრებულოს ნაციონალ წევრს არანაირი რეაქცია არ ჰქონია _ რამდენიმე წუთის განმავლობაში მან მდუმარედ გამოხატა ძალადობის მიმართ პროტესტი.
აქციის მონაწილეების მოწოდებას, შეერთებოდა საპროტესტო მსვლელობას, მეორე დეპუტატი უმრავლესობიდან ილო გვარჯალაძე, ცოტა არ იყოს, ცინიკურად შეხვდა.
აქციამ ქალაქის მთავარ პარკში გადაინაცვლა. შეკრებილ ხალხს სიტყვით მიმართა ცნობილმა უფლებადამცველმა ლია მუხაშავრიამ. მან აღნიშნა, რომ მისთვის კარგად იყო ცნობილი ის სისასტიკე და უკანონობა, რომლებიც ბოლო წლების რეალობად იქცა ქართულ “რეფორმირებულ” ციხეებში. მან მოუწოდა ხალხს, მშვიდობიანი პროტესტით მივიდნენ არჩევნებამდე და საარჩევნო ყუთთან გამოუტანონ განაჩენი რეჟიმს, რომელიც საკუთარ პატიმრებს სასიკვდილოდ იმეტებს.
აქციის პირველი დღე დამთავრდა შეთანხმებით, რომ ხვალაც შეიკრიბებოდნენ და კვლავ გააგრძელებდნენ მშვიდობიან წინააღმდეგობას.
20 სექტემბერს, ლანჩხუთის ოპოზიციურმა ძალებმა, საზოგადოების გასაკვირად, კონსოლიდაცია და კოორდინირებული მოქმედება მოახერხეს. საყოველთაო პროტესტის მეორე დღეს, ქალაქის ცენტრში ხალხის გაცილებით დიდი რაოდენობა შეიკრიბა. “არ აწამო!”, “უარი კაცთმოძულე რეჟიმს!” ” ძირს ცოცხების ხელისუფლება!” _ ამ შინაარსის ტრანსპარანტებითა და ლოზუნგებით შეიარაღებული ახალგაზრდები პროცესიის წინ მიდიოდნენ. მსვლელობას თანდათან უერთდებოდნენ რიგითი ლანჩხუთელები, რასაც ვერ ვიტყვით წინა დღის აქციაზე. საპროტესტო მარშრუტი იგივე იყო _ პირველი საჯარო სკოლა, პოლიციის შენობა, ლანჩხუთის გამგეობა და ბოლოს, ქალაქის ცენტრალური პარკი. მაგრამ მეორე დღე შინაარსობლივად მრავალფეროვანი და უფრო დატვირთული გახლდათ.
მრავალრიცხოვანი პროცესიის შედეგად, ნაწილობრივ გადაიკეტა ცენტრალური მაგისტრალი. ჩავლილი მანქანების მძღოლები სიგნალებით გამოხატავდნენ თანაგრძნობას. “ავერსის” კლინიკიდან სოლიდარობის გამოსახატავად მედპერსონალის ნაწილი და პაციენტებიც კი გამოვიდნენ, ხოლო პირველი საჯარო სკოლის პედაგოგთა ნაწილი ფანჯრებიდან ესალმებოდნენ დემონსტრანტებს.
დანამდვილებით შეიძლება ითქვას, რომ ეროვნული მოძრაობის შემდეგ ასეთი საპროტესტო მუხტი ლანჩხუთში აღარ ყოფილა. 2007 წლის ცნობილი მოვლენებისა და ტრაგიკული 26 მაისის შემდეგაც კი ვერ მოახერხა ოპოზიციამ ხალხის ქუჩაში გამოყვანა, თუმცა უკმაყოფილება საზოგადოებაში მაშინაც დიდი იყო.
ლანჩხუთის პოლიციის შენობასთან მისულმა ხალხმა, პროტესტის ნიშნად, ციხეებში წამებისა და შეურაცხყოფის იარაღი _ ცოცხი დაწვა. დემონსტრანტები ყველაზე დიდი ხნით კვლავ გამგეობის შენობასთან გაჩერდნენ. ამჯერად, გამგეობის კიბეებთან რამოდენიმე ცოცხს ერთად წაუკიდეს ცეცხლი.
ჩვენ შევეცადეთ გამგეობის მაღალი სართულებიდან დაგვეფიქსირებინა მოვლენები, მაგრამ გაძლიერებულმა დაცვის სამსახურმა ამის შესაძლებლობა მანამ არ მოგვცა, სანამ გამგეობის პრესცენტრის სამსახურის უფროსმა ეთერ ჭყონიამ არ გასცა განკარგულება. როგორც იქნა “გურია ნიუსმა” მოახერხა შენობაში შეღწევა და შეძლო საკუთარი ფოტოობიექტივით მოვლენების მსვლელობას დაკვირვებოდა.
გარეთ მყოფი საზოგადოების დიდ ინტერესს იწვევდა, თუ როგორ აღიქვამენ ადგილობრივი ხელისუფლების მაღალჩინოსნები თუ რიგითი თანამშრომლები მიმდინარე მოვლენებს. შევეცადეთ ეს ინტერესი ნაწილობრივ მაინც დაგვეკმაყოფილებინა და გაგვერკვია, რას ფიქრობენ ლანჩხუთის “მმართველი თავები.”
ლანჩხუთის გამგებლის მოვალეობის შემსრულებელი კახა ასკურავა, ყოფილი გამგებლისგან განსხვავებით, “გურია ნიუსს” არ წყალობს. იგი შუა აქციის დროს გამოჩნდა შენობასთან და ისე სწრაფად გაუჩინარდა, ვერაფრის კითხვა ვერ მოვასწარით. კომენტარზე უარი განაცხადა საკრებულოს რამოდენიმე წევრმა. ერთადერთი, ვინც ჩვენს შეკითხვებს უპასუხა, კვლავ მერაბ წილოსანი აღმოჩნდა _ ეტყობა საკრებულოს უმრავლესობის წევრებიდან, მხოლოდ მას შერჩა ხალხთან კომუნიკაციის უნარი. ბატონმა მერაბმა გულახდილად გვითხრა, რომ საშინლადაა შეძრული ნანახი კადრებით, მაგრამ არ მოწონს პოლიტიკოსები, რომლებიც გარეთ დგანან. მას მიაჩნია, რომ ახლა ეს ხალხი მანიპულირებს ადამიანების ბედით.
20 სექტემბრის აქცია კვლავ ცენტრალურ პარკში გაგრძელდა და იქვე დასრულდა. შეკრებილ საზოგადოებას შეუერთდნენ “ქრისტიანდემოკრატების”, “ახალი მემარჯვენეების”, “ლეიბორისტებისა” და “თავისუფალი საქართველის” ადგილობრივი ორგანიზაციები. ეს შეიძლება უპრეცედენტო მოვლენად ჩაითვალოს ბოლო წლების ლანჩხუთის სინამდვილეში. აქციაზე სიტყვით გამოვიდა კოალიცია “ქართული ოცნების” მაჟორიტარი დეპუტატობის კანდიდატი თემურ ჩხაიძე. მას მოზღვავებული ემოციისგან საუბარიც კი უჭირდა.
აქციის ბოლოს შეკრებილ საზოგადოებას განუცხადეს, რომ არ დაკმაყოფილდებიან მხოლოდ რამოდენიმე მინისტრის გადადგომით და მანამ გააგრძელებენ საპროტესტო გამოსვლებს, სანამ რეალურად არ დაკმაყოფილდება ხალხის მოთხოვნები და არ დაისჯებიან დამნაშავეები.
21 სექტემბერს ლანჩხუთის საზოგადოება დაემორჩილა საქართველოს პატრიარქის თხოვნას, ღვთისმშობლის ბრწყინვალე დღესასწაულის გამო მთელი საქართველოს მასშტაბით არ ჩაეტარებინათ საპროტესტო მსვლელობები და გამოსვლების ორგანიზება შაბათისთვის გადადეს.
