„წარმოუდგენელი მხარდაჭერა მივიღე. 5800-მა პედაგოგმა ჩემს ანგარიშზე 1.50 ჩარიცხა. როდესაც სასამართლო პროცესზე გახდა ცნობილი დამაჯარიმეს 5000 ლარით წამომცდა, რომ ლარ-ნახევრით შეიძლებოდა ამ თანხის შეგროვება, რადგან ამ თანხის გადახდას ჩემი შრომით ვერ მოვახერხებდი. მე, როგორც ვიცი პედაგოგების „ჩათებში“ გავრცელდა ეს ინფორმაცია და ჩემმა კოლეგებმა ჩარიცხეს ეს თანხა,“ – გვითხრა ლადო აფხაზავამ.
მზია ამაღლობელის უკანონო პატიმრობასთან დაკავშირებით, ქუთაისში, მოსამართლის სახლთან 30 წუთიანი საპროტესტო შეკრების გამო, შინაგან საქმეთა სამინისტრომ ადმინისტრაციული სამართალდარღვევის ოქმი შეუდგინა აქციის 9 მონაწილეს: გელა მთივლიშვილი – ჟურნალისტი, ნინო ქათამაძე – მუსიკოსი, ვლადიმერ აფხაზავა – მასწავლებლის ეროვნული ჯილდოს პირველი მფლობელი, ხვიჩა ვაშაყმაძე – ჟურნალისტი, ქეთევან ფილაური – ფსიქოლოგი, მაია ცირამუა – ფსიქოლოგი, ირინა ზარანდია – სამოქალაქო აქტივისტი, გივი ცინცაძე – ლანჩხუთის მუნიციპალიტეტის საკრებულოს წევრი, ეკა კუხალაშვილი – „ქუთაისი პოსტის” ჟურნალისტი. სასამართლო პროცესზე მოსამართლემ ცხრავე პირი 5000-5000 ლარით დააჯარიმა. სოციალურ ქსელში მოსამართლის ამ გადაწყვეტილების შემდეგ ამ თანხის დასაფარად არაერთი ინფორმაცია გავრცელდა, რომ მომხდარიყო თანხის შეგროვება.
„მინდა ვთქვა, რომ მსგავსი სოლიდარობა არაერთხელ მომხდარა და ზუსტად ეს არის მთავარი, რომ ამ ქვეყანაში ადამიანებს ერთმანეთი გვიყვარს, შეგვიძლია ერთმანეთის მხარდაჭერა და თანადგომა. 5800 პედაგოგის გარდა არაერთმა ადამიანმა გამოიჩინა სოლიდარობა და ჩარიცხეს თანხა. რა თქმა უნდა, ამ თანხას იმ ადამიანებზე გადავანაწილებ, რომლებიც ჩემთან ერთად დაჯარიმდნენ,“ – აღნიშნა ჩვენთან საუბრის დროს ლადო აფხაზავამ.
