“წუხანდელი შემთხვევა, ტრაგიკომიკური შინაარსისაა და ნათლად მიუთითებს, თუ როგორი ხერხებით ცდილობს მმართველი პოლიტიკური გუნდი გამარჯვების მიღწევას, _ ამბობს “გურია ნიუსთან” საუბარში დავით უგრელიძე, _ გვიან ღამით, დაახლოებით ორიდან სამ საათამდე, ქალაქის ცენტრში შევამჩნიეთ რამდენიმე მანქანა. მათ შორის ამოვიცანით გიორგი გოგუაძის ვაჟის დავით გოგუაძის და მისი საარჩევნო შტაბის უფროსის რევაზ ჩიტიძის მანქანები. გვქონდა ინფორმაცია, რომ ისინი სწორედ გვიან ღამით ახდენენ ათასგვარ უკანონო ქმედებებს, ამიტომ გადავწყვიტეთ, გავყოლოდით და გვენახა სად წავიდოდნენ. ერთ-ერთ მანქანაში ამოვიცანით საკრებულოს აპარატი უფროსი ნინო ძიძიგურიც. მიხვდნენ, რომ მივდევდით და დაიწყეს აქეთ-იქეთ უმიზნოდ სიარული. სიტუაციამ კომიკური ხასიათი მიიღო: წინ გარბოდნენ მთავრობის მხარდამჭერთა მანქანები, უკან კი ოპოზიციის წარმომადგენლები მისდევდნენ. ყველაფერი დაფიქსირებული გვაქვს ფოტოკამერით. ბოლოს დაიღალნენ ამდენი სირბილით და საპატრულო პოლიცია გამოიძახეს. ჩვენც შევწყვიტეთ მათი დევნა, ჩვენთან ერთად ახალგაზრდებიც იმყოფებოდნენ და მოვერიდეთ სიტუაციის გამწვავებას,” _ ჰყვება დავით უგრელიძე.
ფაქტის გადამოწმება რევაზ ჩიტიძესთან ვცადეთ. ბოლო დროს იგი ჩვენ სატელეფონო ზარებს არ ეხმაურება და იძულებული გავხდით, ესემესის საშუალებით შეგვეტყობინებინა, რომ მისგან კომენტარის ჩაწერას ვცდილობდით. რევაზ ჩიტიძე თავადვე დაგვიკავშირდა და რა თქმა უნდა, კატეგორიულად უარყო რაიმე შეხება წუხელ მომხდარ ინციდენტთან. მან თქვა, რომ მანქანა გიორგი გოგუაძის საარჩევნო შტაბთან ჰყავდა დატოვებული, თვითონ კი გვიან ღამემდე შუხუთის საარჩევნო შტაბში იმყოფებოდა. ჩიტიძემ არც საპატრულო პოლიციის გამოძახების ფაქტი დაადასტურა.
როგორც თემურ ჩხაიძის მხარდამჭერები ამბობენ, მათი ასეთი საქციელი, ადგილობრივი ხელისუფლების მხრიდან უკანონო ქმედებების აღკვეთის სურვილით იყო განპირობებული. ხოლო ის ფაქტი, რომ ხელისუფლების წარმომადგენლები უკანმოუხედავად გარბოდნენ, საეჭვოს ხდის მათი საქმიანობის კანონიერებას.
